ആഭ്യന്തര വകുപ്പിനെതിരെ രൂക്ഷവിമര്‍ശനവുമായി ധനമന്ത്രി കെ.എം. മാണി. ബാര്‍ക്കോഴ വിഷയത്തില്‍ രണ്ടു നീതിയാണ് ആഭ്യന്തരവകുപ്പ് നടപ്പിലാക്കിയതെന്നാണ് മാണിയുടെ ആരോപണം. ഒരേസമയം ആരോപണവിധേയരായ കോണ്‍ഗ്രസ് മന്ത്രിമാരെ സംരക്ഷിക്കുകയും അപ്പോള്‍ തന്നെ തനിക്കെതിരെ ഗൂഢാലോചന നടത്താന്‍ ആഭ്യന്തര വകുപ്പ് ശ്രമിക്കുകയും ചെയ്യുന്നുവെന്നാണ് മാണിയുടെ പരാതി. ബാബുവടക്കമുള്ള മന്ത്രിമാര്‍ക്കെതിരെ ഒരു നടപടിയും സ്വീകരിക്കാന്‍ ആഭ്യന്തര വകുപ്പ് തയാറായില്ലെന്നും മാണി കുറ്റപ്പെടുത്തി. കേരള കോണ്‍ഗ്രസ് പ്രസിദ്ധീകരണമായ പ്രതിച്ഛായയിലാണ് മാണിയുടെ പ്രതികരണം.
കേസ് അന്വേഷിക്കുന്ന വിജിലന്‍സ് ഉദ്യോഗസ്ഥരെയും വകുപ്പിന്റെ ചുമതലക്കാരനായ ആഭ്യന്തര മന്ത്രി രമേശ് ചെന്നിത്തലയെയും പ്രതിക്കൂട്ടില്‍ നിര്‍ത്തിയാണ് മാണിയുടെ ആരോപണം.
അതേസമയം നുണപരിശോധനാ ഫലത്തെ മാത്രം അടിസ്ഥാനമാക്കി വിജിലന്‍സിന് മുന്നോട്ടു പോകാന്‍ സാധിക്കില്ലെന്നും മാണി പറയുന്നു. വിജിലന്‍സ് സംഘത്തിന് മുമ്പാകെ മൊഴി നല്‍കിയപ്പോള്‍ അമ്പിളി ആദ്യം പറഞ്ഞത് രാജ്കുമാര്‍ ഉണ്ണി പണവുമായി അകത്തേക്ക് കയറി പോകുന്നത് കണ്ടുവെന്നായിരുന്നു. എന്നാല്‍ കോഴ കൊടുക്കുന്നത് കാണാതെ സാക്ഷിയാക്കാന്‍ സാധിക്കില്ലെന്ന് ഉദ്യോഗസ്ഥര്‍ പറഞ്ഞപ്പോള്‍ മൊഴി മാറ്റിപ്പറയുകയായിരുന്നു. തന്നെ കുടുക്കാന്‍ ഉദ്യോഗസ്ഥര്‍ നീക്കിയ കരുനീക്കത്തിന്റെ ഭാഗമാണ് ഇപ്പോഴത്തെ സംഭവവികാസങ്ങള്‍. ഇങ്ങനെ മൊഴിമാറ്റി പറഞ്ഞതുകൊണ്ടാണ് അമ്പിളിയെ നുണപരിശോധനയ്ക്ക് വിധേയമാക്കിയത്. ഇത് തന്നെ അമ്പിളിയുടെ മൊഴി കളവാണെന്നതിന് ഉദാഹരണമാണെന്നും മാണി വ്യക്താമാക്കുന്നുണ്ട്. ഇതിന് പിന്നില്‍ പിസി ജോര്‍ജ്ജിന്റെ കളിയും തള്ളിക്കളയാനാവില്ലന്നും മാണ് വിശ്വസിക്കുന്നുണ്ട്.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha