ഒരാളെ മോദി വയ്ക്കണമെങ്കില്... ചന്ദ്രയാന് 2 പോലുള്ള പല നിര്ണായക ദൗത്യങ്ങള്ക്കും തുടക്കം കുറിച്ച ഐഎസ്ആര്ഒ ചെയര്മാന് ഡോ. കെ ശിവന്റെ കാലവാധി കേന്ദ്ര സര്ക്കാര് നീട്ടി നല്കി; ഐഎസ്ആര്ഒയുടെ നിര്ണായക കുതുപ്പിന് നേതൃത്വം നല്കുന്നത് ശിവന് തുടരും
ചന്ദ്രന്റെ അടുത്ത് തൊട്ടുതൊട്ടില്ലെന്ന മട്ടില് ഇന്ത്യയുടെ രണ്ടാം ചാന്ദ്രദൗത്യം പിടിവിട്ടു പോയപ്പോള് ഏതൊരു സാധാരണക്കാരനെയും പോലെ പൊട്ടിക്കരഞ്ഞ ഐഎസ്ആര്ഒ ഡയറക്ടര് കെ. ശിവനെ ഓര്മ്മയില്ലേ. ഇന്ത്യന് ബഹിരാകാശ ഗവേഷണ സംഘടനയുടെ ചെയര്മാനായ ശാസ്ത്രജ്ഞന് ആകാശദൗത്യത്തിലെ ഒരു ഘട്ടം പാളിയതിനു കരയുമോ എന്ന് പലരും ചോദിച്ചു. ഡോ. കെ. ശിവന് എന്ന മണ്ണിന്റെ മകനെ അറിയുന്നവര്ക്കു സംശയമുയരില്ല. സര്ക്കാര് സ്കൂളില് പഠിച്ചു വളര്ന്ന കര്ഷകപുത്രന്. ചില സമയങ്ങളില് കരയുന്നതില് മോശമില്ലെന്നു ചിന്തിക്കുന്ന സാധാരണക്കാരന്. കുട്ടിക്കാലത്തേ കെ. ശിവന് മാനത്തേക്കു നോക്കിയതും സ്വപ്നങ്ങള് നെയ്തതും മണ്ണില് ചവിട്ടിനിന്നാണ്.
20 സെക്കന്ഡിലേറെ നീണ്ട ആശ്ലേഷത്തിലൂടെ ശിവനെ പ്രധാനമന്ത്രി നരേന്ദ്ര മോദി ആശ്വസിപ്പിച്ചതും അസാധാരണ ഉയര്ച്ചയിലെത്തിയ സാധാരണക്കാരനോടുള്ള സ്നേഹത്തിലായിരുന്നു. മോദിയുടെ ചുമലില് മുഖംചേര്ത്തു ശിവന് സങ്കടപ്പെട്ടപ്പോള് ഒരു നിമിഷം ഇന്ത്യയാകെ ആ കണ്ണീരിനൊപ്പം തേങ്ങി. പിന്നെ അഭിമാനത്തോടെ തലയുയര്ത്തി. ചന്ദ്രന്റെ മണ്ണില് തൊടുകയെന്ന സ്വപ്നം അവസാന നിമിഷം വഴുതിമാറിയെങ്കിലും ശിവന്റെ നേതൃത്വത്തില് ഇസ്റോ എഴുതിയതു ചരിത്രമാണ്. മനുഷ്യര്ക്ക് തീര്ത്തും അജ്ഞാതമായ, ചന്ദ്രന്റെ ദക്ഷിണധ്രുവത്തില് ചെന്നിറങ്ങാന് ശ്രമിക്കുക. ലോകത്തെ വന്ശക്തികള് പോലും ധൈര്യപ്പെടാത്ത സാഹസികത. അതാണ് ശിവനിലുള്ള മോദിയുടെ വിശ്വസം.
വിരമിക്കാനിരുന്ന ഐഎസ്ആര്ഒ ചെയര്മാന് കെ ശിവന്റെ കാലവാധി കേന്ദ്ര സര്ക്കാര് നീട്ട് നല്കി. ഒരു വര്ഷത്തെക്കാണ് കെ ശിവന്റെ സേവന കാലാവധി നീട്ട് നല്കിയത്. ഇതേതുടര്ന്ന് 2022 ജനുവരി 14 വരെ കെ ശിവന് ഐഎസ്ആര്ഒ ചെയര്മാന് പദവിയില് തുടരും. നിയമനകാര്യ സമിതിയാണ് ഇത് സംബന്ധിച്ച ഉത്തരവ് പുറത്തിറക്കിയത്. അടുത്ത മാസം 15 നായിരുന്നു കെ ശിവന്റെ കാലാവധി അവസാനിക്കേണ്ടിയിരുന്നത്. 2018 ല് ജനുവരി 10 നാണ് ഐഎസ്ആര്ഒ ചെയര്മാനായി കെ ശിവനെ നിയമിക്കുന്നത്. എ കെ കിരണ് കുമാറില് നിന്നാണ് ഐ എസ് ആര് ഒ ചെയര്മാനായി കെ ശിവന് എത്തുന്നത്.
ചന്ദ്രയാന്2 പോലുള്ള പല നിര്ണായക ദൗത്യങ്ങള്ക്കും ഐ എസ് ആര് ഒ തുടക്കം കുറിച്ചത് കെ ശിവന് ചെയര്മാനായിരിക്കുമ്പോഴാണ്. നിലവില് ചാന്ദ്രയാന് മൂന്ന് ഉള്പ്പെടെയുള്ള വിവിധ പദ്ധതികള് ഐഎസ്ആര്ഒയില് പുരോഗമിക്കുന്നുണ്ട്. ഈ സാഹചര്യത്തിലാണ് കാലാവധി നീട്ടാന് സര്ക്കാര് തീരുമാനിച്ചതെന്നാണ് റിപ്പോര്ട്ടുകള് വ്യക്തമാക്കുന്നത്. 63 വയസുള്ള കെ ശിവന് നേരത്തെ രണ്ട് വര്ഷം സര്വീസ് നീട്ടി നല്കിയിരുന്നതാണ്.
വെറും സാധാരണക്കാരനായ കെ. ശിവന് കഠിനാധ്വാനത്തിലൂടെയാണ് ഈ സ്ഥാനത്തെത്തിയത്. കേരളത്തോടു ചേര്ന്നു കന്യാകുമാരിയിലെ തരക്കന്വിളയില് ജനിച്ച ശിവന്, സ്വന്തം ഗ്രാമത്തിലെ തമിഴ് മീഡിയം സ്കൂളിലാണു പ്രാഥമിക വിദ്യാഭ്യാസം പൂര്ത്തിയാക്കിയത്. നാഗര്കോവില് ഹിന്ദു കോളജില്നിന്നു ബിരുദ പഠനം പൂര്ത്തിയാക്കി കുടുംബത്തിലെ ആദ്യ ബിരുദധാരിയായി. ട്യൂഷനോ മറ്റു കോച്ചിങ് ക്ലാസുകള്ക്കോ പോകാതെ സ്വന്തം നിലയ്ക്കായിരുന്നു പഠനം. മദ്രാസ് ഐഐടിയില്നിന്ന് 1980ല് എയ്റോനോട്ടിക്കല് എന്ജിനീയറിങ് ബിരുദവും ബെംഗളൂരു ഐഐഎസ്!സിയില് നിന്ന് 1982ല് എയ്റോസ്പേസ് എന്ജിനീയറിങ് ബിരുദാനന്തര ബിരുദവും ബോംബെ ഐഐടിയില് നിന്ന് 2006ല് പിഎച്ച്ഡിയും സ്വന്തമാക്കി.
കര്ഷക കുടുംബത്തില് പിറന്ന് ഐഎസ്ആര്ഒയുടെ മേധാവിസ്ഥാനം വരെയെത്താന് ഡോ. കെ.ശിവനു കഴിഞ്ഞത് എങ്ങനെയെന്ന ചോദ്യത്തിന് ഒറ്റ ഉത്തരമേയുള്ളൂ , കഠിനാധ്വാനം. 'ഉറക്കമില്ലാത്ത ശാസ്ത്രജ്ഞന്' എന്നാണു സഹപ്രവര്ത്തകര് കെ.ശിവനെ ബഹുമാനപൂര്വം വിശേഷിപ്പിക്കുന്നത്. അതേ ആ ശാസ്ത്രജ്ഞനെ നമ്മള് ഉറങ്ങാന് ഇനിയും അനുവദിക്കില്ല. ശിവനെ നമുക്ക് വേണം.
"
https://www.facebook.com/Malayalivartha
