തദ്ദേശ സ്വയം ഭരണ സ്ഥാപനങ്ങളിലേക്കുള്ള തെരഞ്ഞടുപ്പ് പൂര്‍ത്തിയാവുകയും നിയമസഭാ തെരഞ്ഞടുപ്പ് പടിവാതുക്കല്‍ എത്തുകയും ചെയ്തതോടെ സിപിഎമ്മിന്റെ ഫണ്ടിംഗ് പ്രോസസ് പൂര്‍വാധികം ഭംഗിയായി പുനരാരംഭിച്ചെന്ന് പ്രതിപക്ഷ ആരോപണം. കഴിഞ്ഞ സര്‍ക്കാരിന്റെ അവസാന കാലത്ത് ബാര്‍ ഉടമകളായിരുന്നു പാര്‍ട്ടിയെ സഹായിക്കാനുണ്ടായിരുണതെങ്കില്‍ ഇക്കുറിയുള്ളത് ലോട്ടറി രാജാവ് സാന്റിയാഗോ മാര്‍ട്ടിനാണെന്നാണ് ആരോപണം.

സംസ്ഥാനത്ത് അന്യസംസ്ഥാന ലോട്ടറി വില്‍പ്പനയ്ക്ക് ഹൈക്കോടതിയാണ് അനുമതി നല്‍കിയതെങ്കിലും കോടതിയില്‍ കേസ് തോറ്റുകെടുക്കുകയാണ് സര്‍ക്കാര്‍ ചെയ്തതെന്ന് പ്രതിപക്ഷം ആരോപിക്കുന്നു. കെ.എം. മാണി ധനമന്ത്രിയായിരിക്കെ മാര്‍ട്ടിനെ വാളയാര്‍ കടത്താതെ നോക്കിയ ജാഗ്രതയും കോണ്‍ഗ്രസ് നേതാക്കള്‍ ചൂണ്ടിക്കാണിക്കുന്നുണ്ട്. നാഗാലാന്‍ഡ് ലോട്ടറി വില്‍പ്പനയ്ക്കാണ് ഹൈക്കോടതി അനുമതി നല്‍കിയത്. ലോട്ടറി രാജാവ് സാന്റിയാഗോ മാര്‍ട്ടിന്റെ ഉടമസ്ഥതയിലുളള സ്ഥാപനമായ ഫ്യൂച്ചര്‍ ഗെയിമിങ് സൊല്യൂഷന്‍സ് നല്‍കിയ ഹര്‍ജിയിലാണ് ഉത്തരവ്. ഉത്തരവിനെതിരെ സര്‍ക്കാര്‍ അപ്പീല്‍ നല്‍കുമെന്ന് പ്രഖ്യാപിച്ചിട്ടുണ്ടെങ്കിലും അപ്പീലില്‍ തീരുമാനമെടുക്കുന്നതില്‍ കാലതാമസം വരും. ഇപ്പോഴത്തെ ഉത്തരവില്‍ സ്‌റ്റേ കിട്ടിയില്ലെങ്കില്‍ മാര്‍ട്ടിന്‍ കേരളത്തിലെത്തി കച്ചവടം തുടങ്ങും.

സംസ്ഥാനത്ത് ഏറെ വിവാദങ്ങളുണ്ടാക്കിയ ഇതര സംസ്ഥാന ലോട്ടറി വില്‍പ്പനയിലാണ് ഹൈക്കോടതി സിംഗിള്‍ ബെഞ്ചിന്റെ നിര്‍ണായക ഉത്തരവ് വന്നത്. നാഗാലാന്‍ഡ് സര്‍ക്കാരിന്റെ ലോട്ടറി വില്‍പ്പനയില്‍ ഇടപെടാന്‍ സംസ്ഥാന സര്‍ക്കാരിന് അവകാശമില്ല. കേന്ദ്ര സര്‍ക്കാര്‍ ചട്ടങ്ങള്‍ പാലിച്ചാണ് ലോട്ടറി വില്‍ക്കുന്നത്. ഈ ചട്ടങ്ങള്‍ ലംഘിക്കുന്നുവെന്ന് സര്‍ക്കാരിന് ബോധ്യപ്പെട്ടാല്‍ കേന്ദ്ര സര്‍ക്കാരിനെ സമീപിക്കുന്നതിന് തടസമില്ല.

ഇതരസംസ്ഥാന ലോട്ടറികള്‍ക്ക് നിയന്ത്രണം ഏര്‍പ്പെടുത്തി സംസ്ഥാന സര്‍ക്കാര്‍ കൊണ്ടുവന്ന നിയമഭേദഗതിയും സിംഗിള്‍ ബെഞ്ച് റദ്ദാക്കി. കേരളത്തില്‍ സംസ്ഥാന സ!ര്‍ക്കാരിന്റെ ലോട്ടറി വില്‍പ്പനയുണ്ട്. ഇവിടെ സമ്പൂര്‍ണ ലോട്ടറി നിരോധിത മേഖലയാണെങ്കില്‍ മാത്രമേ ഇതര സംസ്ഥാന ലോട്ടറികളെ നിയന്ത്രിക്കാന്‍ സര്‍ക്കാരിന് അവകാശമുളളു. അല്ലാത്തപക്ഷം നിയമഭേദഗതി വിവേചനപരമാണെന്നും കോടതി നിരീക്ഷിച്ചു.

സാന്റിയാഗോ മാര്‍ട്ടിന്റെ ഉടമസ്ഥതയിലുളള ഫ്യൂച്ചര്‍ ഗെയിമിങ് സൊല്യൂഷന്‍സ് സമര്‍പ്പിച്ച ഹര്‍ജിയിലാണ് ജസ്റ്റിസ് മുഹമ്മദ് മുഷ്താഖിന്റെ ഉത്തരവ്. ഇതോടെ സംസ്ഥാനത്ത് ഇതര സംസ്ഥാന ലോട്ടറി വില്‍പ്പനയ്ക്കുളള വിലക്ക് നീങ്ങി. നികുതി വെട്ടിച്ച് ലോട്ടറി വില്‍പ്പന നടത്തിയെന്നും ഫല പ്രഖ്യാപനത്തിലെ തിരിമറി ആരോപിച്ചുമാണ് വര്‍ഷങ്ങള്‍ക്കുമുമ്പ് സംസ്ഥാന സര്‍ക്കാര്‍ ഇതര സംസ്ഥാന ലോട്ടറി നിരോധിച്ചത്. ഇക്കാര്യത്തില്‍ സിബിഐയും പിന്നീട് അന്വേഷണം നടത്തിയിരുന്നു. ഉത്തരവിന്റെ മറപറ്റി മറ്റ് ഇതര സംസ്ഥാന ലോട്ടറി വില്‍പ്പനക്കാരും സമാന ഉത്തരവിനായി ഹൈക്കോടതിയെ സമീപിച്ചേക്കും. ഇപ്പോള്‍ വന്നത് മാര്‍ട്ടിനാണെങ്കില്‍ പിറകെ ബാക്കിയുള്ളവരും വരും.

വി.എസ്. അചുതാനന്ദന്‍ സര്‍ക്കാരിന്റെ കാലത്ത് ധനമന്ത്രിയായിരിക്കെ ഡോ. തോമസ് ഐസക്കാണ് അന്യസംസ്ഥാന ഭാഗ്യക്കുറിക്ക് ചുവന്ന പരവതാനി വിരിച്ചത്. അന്ന് പാര്‍ട്ടി ചാനലും പാര്‍ട്ടി പത്രവും അന്യസംസ്ഥാന ഭാഗ്യക്കുറി ഉടമയുടെ കൃപാകടാക്ഷത്താല്‍ പച്ച പിടിച്ചതായി ആരോപണം ഉയര്‍ന്നിരുന്നു.

ഒരു വര്‍ഷം 11300 കോടിയുടെ വിരുവരവും 1300 കോടിയുടെ ലാഭവുമാണ് ഭാഗ്യക്കുറി കേരളത്തിന് സമ്മാനിക്കുന്നത്. ഇതില്‍ ലാഭം നികുതിയായി മാറും. 16ശതമാനം നികുതി വര്‍ധിപ്പിക്കുമ്പോള്‍ അതില്‍ പകുതിയും പോകുന്നത് കേന്ദ്ര സര്‍ക്കാരിന്റെ പോക്കറ്റിലേക്കാണ്. ലോട്ടറിയും മദ്യവുമാണ് സര്‍ക്കാരിന് ബമ്പര്‍ ലാഭം സമ്മാനിക്കുന്നത്.

സംസ്ഥാനങ്ങളില്‍ കേരളം മാത്രമാണ് നേരിട്ട് ലോട്ടറി നടത്തുന്നത്. സ്വകാര്യ ഭാഗ്യക്കുറി തുടങ്ങിയാല്‍ ജനങ്ങള്‍ സ്വകാര്യ ലോട്ടറിയിലേക്ക് തിരിയും. കാരണം വില അതിനായിരിക്കും കുറവ്. കേരള സര്‍ക്കാര്‍ 50 രൂപക്ക് വിറ്റിരുന്ന ലോട്ടറികള്‍ കഴിഞ്ഞവര്‍ഷം 30 രൂപയാക്കി കുറച്ചത് ഇതര സംസ്ഥാനക്കാര്‍ കേരളത്തിലേക്ക് വരുന്നത് മുന്‍കൂട്ടി കണ്ടു കൊണ്ടാണ്. 28ശതമാനം നികുതി നല്‍കി കേരളത്തില്‍ ലോട്ടറി വില്‍ക്കുന്നത് ലാഭമല്ലെന്ന് കണ്ടാണ് ഇതര സംസ്ഥാനക്കാര്‍ കേരളത്തില്‍ നിന്നും മാറി നിന്നത്.

കെ.എം മാണി ധനമന്ത്രിയായിരിക്കെയാണ് ഇതര സംസ്ഥാന ഭാഗ്യക്കുറി മാഫിയയെ കൃത്യമായി തകര്‍ത്തത്.അദ്ദേഹം വിവിധ കോടതികളില്‍ കേസ് നടത്തിയാണ് ഇതര സംസ്ഥാനക്കാരെ നിയന്ത്രിച്ചത്. സാന്റിയാഗോ മാര്‍ട്ടിന്‍ അദ്ദേഹത്തെ സ്വാധീനിക്കാന്‍ ശ്രമിച്ചെങ്കിലും നടന്നില്ല.

ഇതര സംസ്ഥാനക്കാര്‍ വരുന്നത് കൊണ്ടുള്ള ഏക നേട്ടം ഭരിക്കുന്ന കക്ഷിക്കാണ്. അത് കമ്മീഷന്‍ ഇനത്തില്‍ ലഭിക്കുന്ന സാമ്പത്തിക ലാഭം തന്നെയാണ്. മാര്‍ട്ടിന്‍ പാര്‍ട്ടി പത്രത്തിനു നല്‍കിയ ബോണ്ട് തിരിച്ചു കൊടുത്ത നാടകം കേരളം മറന്നിട്ടില്ല. മാര്‍ട്ടിന്‍ വരുന്നതോടെ കേരളം വീണ്ടും ഒറ്റനമ്പര്‍ കുരുക്കിലാവും. ആയിര കണക്കിന് ചെറുപ്പക്കാരുടെ ജീവിതം ഇല്ലാതാക്കിയ ഒന്നാണ് ഒറ്റനമ്പര്‍ ഭാഗ്യക്കുറി. പൊതു തെരഞ്ഞടുപ്പിന് ദിവസങ്ങള്‍ മാത്രം ശേഷിക്കെ ലോട്ടറി രാജാക്കന്‍മാരുടെ വരവ് സി പി എമ്മിന്റെ സാമ്പത്തിക നില ഭദ്രമാക്കുമെന്ന കാര്യത്തില്‍ സംശയമില്ല.