ഏവരെയും കീഴടക്കിയ പാട്ടായിരുന്നു കിംകിംകിം . സന്തോഷ് ശിവൻ ചിത്രമായ ജാക്ക് ആൻഡ് ജില്ലിലെ കിംകിം കിം എന്ന മഞ്ജു വാരിയർ പാടിയ പാട്ട് ഹിറ്റാകുകയാണ്. എന്നാൽ അതിനിടയിൽ പഴയ ‘കാന്താ..’ എന്ന പാട്ടിലും കിംകിംകിം ഉണ്ട്. ഈണത്തിലും സാമ്യമുണ്ട് . അതോടെ മോഷണം എന്ന ആരോപണം എന്ന മട്ടിലുള്ള ആരോപണങ്ങളും ആക്രമണവും സമൂഹ മാധ്യമങ്ങളിൽ തുടങ്ങി. എന്നാൽ ഈ പാട്ടിന്റെ സംഗീത സംവിധായകൻ ‘ രാം സുരേന്ദർ പറയുന്നത് ഇങ്ങനെയാണ് . ആ പാട്ടിന്റെ ക്രെഡിറ്റ്സ് കാണാത്തതുകൊണ്ട് ഉയരുന്ന ആരോപണം മാത്രമാണ് . ഈ പാട്ട് പഴയ കാന്താ പാട്ടിൽ നിന്നു പ്രചോദനം ഉൾക്കൊണ്ടു തയ്യാറാക്കിയതാണെന്ന് ക്രെഡിറ്റിൽ വ്യക്തമാക്കിയിട്ടുണ്ട്.

പാരിജാത പുഷ്പാഹരണം എന്ന പഴയകാല നൃത്തസംഗീത നാടകത്തിൽ വക്കം മണി എന്ന കലാകാരൻ പാടിയഭിനയിച്ച പാട്ടിലുണ്ട് ഈ കിംകിംകിം... കാന്താ എന്നുള്ള വിളിയും.

‘കാന്താ തൂകുന്നു തൂമണം... ഇതെങ്ങു നിന്ന്...

മുമ്പിതുപോലിമ്പമെഴും ഗന്ധം ഗന്ധിച്ചതില്ല...

കിംകിംകിം... മേമേമേ... എന്നാണ് ആ പാട്ട്.

അതിൽ നിന്ന് കിംകിമ്മിനേയും കാന്തനേയുമാണ് സന്തോഷ് ശിവനും സംഘവും പാട്ടിലേക്കെടുത്തത്. എടുക്കും മുൻപ് പഴയ അണിയറപ്രവർത്തകരുടെ ബന്ധുക്കളെ കാണുകയും ചെയ്തു. പഴയ പാട്ടിലെ കാന്താ എന്ന വാക്കും കിംകിംകിം, മേമേമേ പ്രയോഗങ്ങളും എടുത്തശേഷം മറ്റുവരികളെല്ലാം ഹരിനാരായണൻ എഴുതി മനോഹരമാക്കി. രാം സുരേന്ദർ അതിമനോഹരമായി പുതിയ ഈണത്തിലുമാക്കി. അരവിന്ദൻ സംവിധാനം ചെയ്ത ഒരിടത്ത് എന്ന സിനിമയിൽ നടൻ ജഗന്നാഥൻ ഇതു പാടി അഭിനയിച്ചിട്ടുണ്ട്.. നെടുമുടി വേണുവിനോടൊപ്പമുള്ള രംഗത്തിൽ.

പഴയകാലങ്ങളെ ഓർമിപ്പിക്കുന്ന ഒരു പാട്ടുവേണമെന്നു സംവിധായകൻ ആവശ്യപ്പെട്ടപ്പോൾ ഹരിനാരായണനും രാം സുരേന്ദറും സന്തോഷ് ശിവനുമുൾപ്പെട്ട സംഘം ഈ പാട്ടിലേക്ക് എത്തിച്ചേർന്നു.. പഴയകാലത്തെ പാട്ടിനെ ആധുനിക തരത്തിൽ ചിട്ടപ്പെടുത്തന്നതിന് ഏറെ പാടുപെട്ടുവെന്ന് രാം സുരേന്ദർ പറയുന്നു. ഒരു ‘കിളിപോയ ലൈനിലുള്ള പാട്ട്’ വേണമെന്നായിരുന്നു സന്തോഷ് ശിവന്റെ നിർദേശം. അനുപല്ലവിയുടെ സംഗീതം പലതവണ പരിഷ്കരിച്ചാണ് ഈ രൂപത്തിലേക്ക് എത്തിച്ചതെന്നും രാം സുരേന്ദർ പറയുന്നു. ചെമ്പകമേ... ചെമ്പകമേ... എന്ന എക്കാലത്തെയും ഹിറ്റ് ഗാനത്തിനും മിഴിയഴക് പൊഴിയും രാധാ... എന്ന സൂപ്പർ ഗാനത്തിനും ഓർക്കസ്ട്രേഷൻ നിർവഹിച്ചയാളാണു രാം സുരേന്ദർ. ഇപ്പോൾ കിം കിം കിം ആ പ്രശസ്തിയിലേക്ക് എത്തുന്നു.