ആറ്റിങ്ങലില്‍ വീട്ടമ്മയെ തലയ്ക്കടിയേറ്റു മരിച്ച നിലയില്‍ കണ്ടെത്തി. സംഭവത്തെ തുടര്‍ന്നു മാനസിക രോഗിയായ മകനെ പോലീസ് കസ്റ്റഡിയിലെടുത്തു. ആലംകോട് പള്ളിമുക്ക് അപര്‍ണഭവനില്‍ പ്രസന്നന്റെ ഭാര്യ ഉഷ (46) ആണു കൊല്ലപ്പെട്ടത്. സംഭവവുമായി ബന്ധപ്പെട്ടു മകന്‍ അഖില്‍ എന്ന വിഷ്ണുവിനെ (19) ആണ് ആറ്റിങ്ങല്‍ പോലീസ് കസ്റ്റഡിയിലെടുത്തത്.
സംഭവത്തെക്കുറിച്ചു പോലീസ് ഭാഷ്യം ഇങ്ങനെ- മാനസിക രോഗിയായ വിഷ്ണു ചൊവ്വാഴ്ച വൈകുന്നേരം അക്രമസാക്തനായി പിതാവ് പ്രസന്നനെയും സഹോദരി അപര്‍ണയെയും ആക്രമിച്ചു. പിന്നീട് നാട്ടുകാര്‍ക്കു നേരെ ആക്രമണം നടത്താന്‍ തുനിഞ്ഞ വിഷ്ണുവിനെ നാട്ടുകാര്‍ ബലമായി തടഞ്ഞു വയ്ക്കുകയും ആശുപത്രിയില്‍ കൊണ്ടുപോകാനും തീരുമാനിച്ചു. എന്നാല്‍ വീട്ടുകാര്‍ സഹകരിച്ചില്ല. ആക്രമണത്തില്‍ പരിക്കേറ്റ പിതാവും സഹോദരിയും കഴിഞ്ഞ രാത്രിയില്‍ ബന്ധുവീട്ടിലാണു താമസിച്ചിരുന്നത്.
പ്രസന്നന്റെ വീട്ടില്‍ ഉഷയും മകന്‍ വിഷ്ണുവുമാണു താമസിച്ചിരുന്നത്. ഇന്നു രാവിലെ പ്രസന്നനും അപര്‍ണയും വീട്ടിലെത്തിയപ്പോഴാണു രക്തത്തില്‍ കുളിച്ചു കിടക്കുന്ന ഉഷയുടെ മൃതദേഹം കാണപ്പെട്ടത്. സമീപത്തു നിലവിളക്കും കണെ്ടത്തി. നാട്ടുകാര്‍ വിവരമറിയിച്ചതിനെ തുടര്‍ന്നു സ്ഥലത്തെത്തിയ പോലീസ് സംഘം വിഷ്ണുവിനെ കസ്റ്റഡിയിലെടുത്തു. വിരലടയാള വിദഗ്ധരും ഫോറന്‍സിക് വിദഗ്ധരും സ്ഥലത്തെത്തി. മേല്‍നടപടികള്‍ സ്വീകരിച്ചു. മൃതദേഹം പോസ്റ്റുമോര്‍ട്ടത്തിനായി മെഡിക്കല്‍ കോളജ് ആശുപത്രിയിലേക്കു മാറ്റി.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha