നെയ്യാറ്റിന്‍കരയില്‍ ആത്മഹത്യ ചെയ്ത ദമ്ബതികൾക്കെതിരെ കോടതിവിധി തടസ്സപ്പെടുത്തിയതിനും ആത്മഹത്യയ്ക്കും കേസെടുത്ത കേരള പോലീസിന്റെ നടപടി അങ്ങേയറ്റം മനുഷ്യത്വരഹിതമാണ് എന്ന് രമേശ് ചെന്നിത്തല. ഫേസ്ബുക്കിലൂടെയാണ് ഇത്തരത്തിൽ പ്രതികരണം നടത്തിയിരിക്കുന്നത്.

ഫേസ്ബുക്ക് കുറിപ്പ് ഇങ്ങനെ;

നെയ്യാറ്റിൻകരയിൽ ആത്മഹത്യ ചെയ്ത രാജനെതിരെ കോടതിവിധി തടസ്സപ്പെടുത്തിയതിനും ആത്മഹത്യയ്ക്കും കേസെടുത്ത കേരള പോലീസിന്റെ നടപടി അങ്ങേയറ്റം മനുഷ്യത്വരഹിതമാണ്.

പോലീസിന്റെ ദുഷ് ചെയ്തികൾ മാധ്യമങ്ങൾക്ക് മുന്നിലും പൊതുസമൂഹത്തിനു മുന്നിലും തുറന്നു കാണിച്ചത് രാജന്റെയും അമ്പിളിയുടെയും രണ്ട് ആൺമക്കൾ ചേർന്നാണ്. അവരുടെ മനോവീര്യം തകർത്തുകളയാനാണ് മരിച്ച രാജനെതിരെ പോലീസ് വീണ്ടും കേസെടുക്കുന്നത്. പോലീസ് സേനയ്ക്കും ഈ നാടിനാകെയും അപമാനമാണ് ഈ നടപടി.

മാതാപിതാക്കളുടെ മരണത്തിനുശേഷം ആ രണ്ട് ആൺമക്കൾക്ക് ജീവിതം കെട്ടിപ്പടുക്കുന്നതിന് അവസരം നൽകുന്നതിനു പകരം അവരുടെ മാതാപിതാക്കൾക്കെതിരെ അന്യായമായി കേസെടുത്ത് ക്രൂരതയുടെ മറ്റൊരു മുഖം വെളിപ്പെടുത്തുകയാണ് കേരള പോലീസ്.