സംസ്ഥാനത്തെ സിനിമാ തിയേറ്ററുകള് ഈ മാസം അഞ്ച് മുതല് തുറന്ന് പ്രവര്ത്തിക്കും; പകുതി ടിക്കറ്റുകള് മാത്രം വില്ക്കാന് അനുമതി; കോവിഡ് മാനദണ്ഡങ്ങള് ലംഘിച്ചാല് തിയേറ്ററുകള്ക്കെതിരെ കര്ശന നടപടിയുണ്ടാവുമെന്ന് മുഖ്യമന്ത്രി
സംസ്ഥാനത്തെ സിനിമാ തിയേറ്ററുകള് ഈ മാസം അഞ്ച് മുതല് വീണ്ടും തുറന്ന് പ്രവര്ത്തിക്കാന് സംസ്ഥാന സര്ക്കാര് അനുമതി. നിയന്ത്രണങ്ങളോടെ തിയേറ്ററുകള് തുറക്കാന് തീരുമാനിച്ചതായി മുഖ്യമന്ത്രി പിണറായി വിജയന് വാര്ത്താ സമ്മേളനത്തില് അറിയിച്ചു. 10 മാസത്തോളമായി തിയേറ്ററുകള് അടഞ്ഞിരുന്നതിനാല് ഈ രംഗത്ത് തൊഴിലെടുക്കുന്നവര്ക്ക് നേരിട്ട ബുദ്ധിമുട്ട് കണക്കിലെടുത്താണ് തീരുമാനമെന്നും മുഖ്യമന്ത്രി പറഞ്ഞു.
കോവിഡ് വ്യാപനത്തിന്റെ പശ്ചാത്തലത്തില് നിയന്ത്രണങ്ങളോടെയാണ് തിയേറ്ററുകള് തുറക്കുക. തിയേറ്ററുകളില് സീറ്റുകളുടെ എണ്ണത്തിന്റെ പകുതി ആളുകളെ മാത്രമാണ് പ്രവേശിപ്പിക്കാനാവുക. പകുതി ടിക്കറ്റുകള് മാത്രമാണ് വില്ക്കാന് തിയേറ്ററുകള്ക്ക് അനുമതിയുണ്ടാവൂ.ആരോഗ്യവകുപ്പ് നിര്ദേശിക്കുന്ന ആരോഗ്യ മാനദണ്ഡങ്ങള് തിയേറ്ററുകള് പാലിക്കണം. ഇവ ലംഘിച്ചാല് തിയേറ്ററുകള്ക്കെതിരെ കര്ശന നടപടിയുണ്ടാവുമെന്ന് മുഖ്യമന്ത്രി പറഞ്ഞു. ഇത്രയും കാലം അടഞ്ഞുകിടന്നതുകൊണ്ട് തുറക്കുന്ന അഞ്ചാം തിയതിക്കുമുമ്ബു തന്നെ തിയറ്ററുകള് അണുമുക്തമാക്കാന് നടപടി സ്വീകരിക്കണമെന്നും മുഖ്യമന്ത്രി പറഞ്ഞു.
ആരാധനാലയങ്ങളുമായി ബന്ധപ്പെട്ട ഉത്സവങ്ങളും അതിന്റെ ഭാഗമായ കലാപരിപാടികളും നിയന്ത്രണങ്ങളോടെ ജനുവരി അഞ്ചുമുതല് അനുവദിക്കുമെന്നും മുഖ്യമന്ത്രി അറിയിച്ചു. ആളുകളുടെ പങ്കാളിത്തം നിശ്ചയിക്കപ്പെട്ട എണ്ണത്തില് കൂടാന് പാടില്ല. അക്കാര്യം പൊലീസും സെക്ടറല് മജിസ്ട്രേറ്റുമാരും ഉറപ്പാക്കും. മതപരമായ ഉത്സവങ്ങള്, സാംസ്കാരിക പരിപാടികള്, കലാപരിപാടികള് എന്നിവയ്ക്ക് ഇന്ഡോറില് പരമാവധി നൂറും ഔട്ട്ഡോറില് പരമാവധി ഇരുന്നൂറും പേരെയാണ് അനുവദിക്കുകയെന്നും അദ്ദേഹം പറഞ്ഞു.
"പത്തു മാസത്തിലധികമായി കലാപരിപാടികളൊന്നും നടത്താന് കഴിയാത്ത സാഹചര്യമാണ്. ഇതുമൂലം കലാകാരന്മാര് കടുത്ത പ്രയാസം അനുഭവിക്കുകയാണ്. പരിപാടികള് നടത്താന് കഴിയുന്നില്ലെങ്കില് കലകളുടെ നിലനില്പ്പിനെ തന്നെ അതു ബാധിക്കുമെന്ന ആശങ്ക കലാകാരന്മാര് പ്രകടപ്പിക്കുന്നുണ്ട്. ഉത്സവങ്ങളുമായി ബന്ധപ്പെട്ടതും അല്ലാത്തതുമായ കലാ സാംസ്കാരിക പരിപാടികള് ആളുകളുടെ എണ്ണം നിയന്ത്രിച്ചുകൊണ്ട് നടത്താന് അനുവദിക്കും. അനുവദിക്കുന്ന പരിപാടികള് നിബന്ധനകള് പാലിച്ചാണോ സംഘടിപ്പിക്കുന്നതെന്ന് നിരീക്ഷിക്കാന് പൊലീസിനെയും സെക്ടറല് മജിസ്ട്രേറ്റുമാരെയും നിയോഗിക്കും," മുഖ്യമന്ത്രി പറഞ്ഞു
സ്പോര്ട്സ് പരിശീലനവും നിയന്ത്രണങ്ങളോടെ അനുവദിക്കാനാണ് തീരുമാനമെന്നും അദ്ദേഹം വ്യക്തമാക്കി. നീന്തല് പരിശീലനത്തിനും അനുമതി നല്കും. എക്സിബിഷന് ഹാളുകള് നിയന്ത്രിത പങ്കാളിത്തത്തോടെ അനുവദിക്കുമെന്നും അദ്ദേഹം പറഞ്ഞു.
https://www.facebook.com/Malayalivartha
