സിദ്ധ ദിനം സംസ്ഥാനതല ഉദ്ഘാടനം കെ.കെ. ശൈലജ ടീച്ചര് നിര്വഹിച്ചു; ഇന്ത്യയിലെ ഏറ്റവും പഴക്കമുള്ള സിദ്ധ ചികിത്സ ശാസ്ത്രത്തിന്റെ ആദ്യ ഗുരുവായി അറിയപ്പെടുന്ന അഗസ്ത്യ മഹര്ഷിയുടെ ജന്മദിനം
സിദ്ധ ദിനം സംസ്ഥാനതല ഉദ്ഘാടനം ആരോഗ്യ വകുപ്പ് മന്ത്രി കെ.കെ. ശൈലജ ടീച്ചര് നിര്വഹിച്ചു. ഇന്ത്യയിലെ ഏറ്റവും പഴക്കമുള്ള സിദ്ധ ചികിത്സ ശാസ്ത്രത്തിന്റെ ആദ്യ ഗുരുവായി അറിയപ്പെടുന്ന അഗസ്ത്യ മഹര്ഷിയുടെ ജന്മദിനമാണ് സിദ്ധ ദിനമായി ആചരിക്കുന്നത്. ഭാരതീയ ചികിത്സ വകുപ്പിന്റെയും നാഷണല് ആയുഷ് മിഷന്റെയും സംയുക്ത ആഭിമുഖ്യത്തില് ഓണ്ലൈന് മുഖേനയാണ് നാലാമത് സിദ്ധ ദിനം ആചരിച്ചത്.
ആയുഷ് വകുപ്പിലെ മറ്റ് ശാസ്ത്ര ശാഖകള്ക്കെന്നപോലെ സിദ്ധ വിഭാഗത്തിനും പ്രാധാന്യം നല്കിയുള്ള നടപടികളാണ് സര്ക്കാര് സ്വീകരിക്കുന്നതെന്ന് മന്ത്രി കെ.കെ. ശൈലജ ടീച്ചര് പറഞ്ഞു. കോവിഡ് പ്രതിരോധവുമായി ബന്ധപ്പെട്ട പ്രവര്ത്തനങ്ങളില് സിദ്ധ ചികിത്സയുടെ പ്രാധാന്യം മനസിലാക്കി രോഗപ്രതിരോധ പ്രവര്ത്തനങ്ങള്ക്ക് സിദ്ധ ചികിത്സയ്ക്ക് സര്ക്കാര് അനുമതി നല്കിയിരുന്നു. ദ്രാവിഡ സംസ്കാരത്തില് ഏറ്റവും കരുത്തുറ്റ സംഭാവനകളിലൊന്നാണ് സിദ്ധവൈദ്യം. തമിഴ്നാട്ടില് മാത്രമല്ല കേരളത്തിലും ഇന്ത്യയ്ക്കു പുറത്ത് വിവിധ രാജ്യങ്ങളിലും ഈ ചികിത്സയ്ക്ക് പ്രചാരമുണ്ടെന്ന് മന്ത്രി വ്യക്തമാക്കി.
ഭാരതീയ ചികിത്സ വകുപ്പിന് കീഴിലുള്ള 20 കിടക്കകളുള്ള വള്ളക്കടവിലെ സിദ്ധ ആശുപത്രിക്ക് 2.75 കോടി രൂപ ചെലവില് ആധുനിക സജ്ജീകരണങ്ങളോട് കൂടിയ പുതിയ കെട്ടിടം നിര്മ്മിച്ച് പ്രവര്ത്തനസജ്ജമാക്കി. സ്ഥിരം സിദ്ധ ചികിത്സ സ്ഥാപനങ്ങള് ഇല്ലാതിരുന്ന പത്തനംതിട്ട, കോട്ടയം, എറണാകുളം, തൃശൂര്, കോഴിക്കോട്, വയനാട്, കണ്ണൂര്, കാസര്ഗോഡ് തുടങ്ങിയ ജില്ലകളില് പുതുതായി സിദ്ധ യൂണിറ്റ് ആരംഭിച്ചു. 2018 മുതല് ഔഷധിയില് നിന്ന് ആദ്യമായി സിദ്ധ ഔഷധങ്ങളുടെ നിര്മ്മാണം ആരംഭിച്ചു.
ചെന്നൈ സവീത മെഡിക്കല് കോളേജിലെ പ്രൊഫസര് ഡോ. എസ്. ബാലരാമ കൈമള് സിദ്ധദിന പ്രഭാഷണം നടത്തി. ഭാരതീയ ചികിത്സാ വകുപ്പ് ഡയറക്ടര് ഡോ. കെ.എസ്. പ്രിയ സ്വാഗതമാശംസിച്ച ചടങ്ങില് നാഷണല് ആയുഷ് മിഷന് സംസ്ഥാന ഡയറക്ടര് ഡോ. ദിവ്യ എസ്. അയ്യര് അധ്യക്ഷത വഹിച്ചു. ഔഷധി മാനേജിംഗ് ഡയറക്ടര് ഉത്തമന്, ഹോമിയോപ്പതി വകുപ്പ് ഡയറക്ടര് ഡോ. എം.എന്. വിജയാംബിക, ഹോമിയോപ്പതി മെഡിക്കല് വിദ്യാഭ്യാസ വകുപ്പ് പ്രിന്സിപ്പാള് ആന്റ് കണ്ട്രോളിംഗ് ഓഫീസര് ഡോ. സുനില്രാജ്, ആയുര്വേദ മെഡിക്കല് വിദ്യാഭ്യാസ വകുപ്പ് ഡയറക്ടര് ഇന് ചാര്ജ് ഡോ. ഹരികൃഷ്ണന് തിരുമംഗലത്ത്, ഡോ. കനകരാജന്, ഡോ. ടി.കെ. ഹൃദിക്, ഡോ. ആര്. ജയനാരായണന്, ഡോ. വി.ബി. വിജയകുമാര് എന്നിവര് പങ്കെടുത്തു. ഐഎസ്എം സ്റ്റേറ്റ് പ്രോഗ്രാം മാനേജര് ഡോ. എം. സുഭാഷ് കൃതജ്ഞത പറഞ്ഞു.
https://www.facebook.com/Malayalivartha
