ബാര്‍കോഴക്കേസില്‍ കോണ്‍ഗ്രസിന് അന്ത്യശാസനം നല്‍കി കേരളാ കോണ്‍ഗ്രസ്(എം). 31നകം ബാര്‍കോഴയില്‍ തീരുമാനമായില്ലെങ്കില്‍ ഭവിഷ്യത്ത് ഗുരുതരമാകുമെന്നു കേരളാ കോണ്‍ഗ്രസ് യു.ഡി.എഫിന് അന്ത്യശാസനം നല്‍കി. ബാര്‍കോഴ വിഷയത്തില്‍ ആഭ്യന്തരവകുപ്പും കോണ്‍ഗ്രസുമാണ് തനിക്കെതിരേ ഗൂഢാലോചന നടത്തിയതെന്ന് പാര്‍ട്ടി മുഖപത്രമായ പ്രതിച്ഛായയിലെ അഭിമുഖത്തില്‍ മാണി തുറന്നടിച്ചിരുന്നു. അതിനു പിന്നാലെയാണ് നാലുദിവസത്തിനകം പരിഹാരമുണ്ടാക്കിയില്ലെങ്കില്‍ സര്‍ക്കാരിന്റെ നിലനില്‍പ് തന്നെ അപകടത്തിലാക്കുമെന്ന ശക്തമായ സന്ദേശം മാണിഗ്രൂപ്പ് കോണ്‍ഗ്രസിനു നല്‍കിയിരിക്കുന്നത്.
സ്പീക്കര്‍ ജി. കാര്‍ത്തികേയന്‍ മരിച്ച ഒഴിവില്‍ അരുവിക്കരയില്‍ ജൂണ്‍ 27ന് ഉപതെരഞ്ഞെടുപ്പു നടക്കാനിരിക്കുന്ന സാഹചര്യത്തില്‍ മാണിഗ്രൂപ്പിന്റെ രാഷ്ട്രീയനിലപാട് യു.ഡി.എഫിനെ കൂടുതല്‍ പ്രതിസന്ധിയിലാക്കി. ബാര്‍കോഴയിലെ വിജിലന്‍സ് അന്വേഷണത്തില്‍ കെ.എം. മാണിയ്‌ക്കെതിരേ കുറ്റപത്രം നല്‍കാനുള്ള തെളിവുകളുണ്ടെന്ന വാര്‍ത്തകളെത്തുടര്‍ന്ന് കേരളാ കോണ്‍ഗ്രസ് രൂക്ഷമായി പ്രതികരിച്ചിരുന്നു.അന്വേഷണ റിപ്പോര്‍ട്ടുകള്‍ ചോരുന്നത് യുഡിഎഫിന്റെ അടിത്തറയിളക്കുമെന്ന് കേരളാ കോണ്‍ഗ്രസ് എം മുന്നറിയിപ്പ് നല്‍കി.
ബാര്‍ ഉടമ ബിജു രമേശിന്റെ െ്രെഡവര്‍ അമ്പിളി മാണിയ്‌ക്കെതിരേയുള്ള മൊഴി നുണപരിശോധനയില്‍ ആവര്‍ത്തിച്ചുവെന്ന ഫോറന്‍സിക് ലാബ് ടെസ്റ്റ് പുറത്തുവരുകയും മാണിയ്‌ക്കെതിരേ കുറ്റപത്രം നല്‍കുമെന്ന് ചാനല്‍ വാര്‍ത്തകള്‍ പ്രചരിക്കുകയും ചെയ്തപ്പോള്‍ തന്നെ കെ.എം. മാണി രൂക്ഷമായി പ്രതികരിക്കുകയും അന്വേഷണറിപ്പോര്‍ട്ട് ചോരുന്നതിലുള്ള പ്രതിഷേധം അറിയിക്കുകയും ചെയ്തിരുന്നു. തുടര്‍ന്നാണ് സര്‍ക്കാര്‍ നിര്‍ദേശപ്രകാരം അഡീഷണല്‍ ചീഫ് സെക്രട്ടറി നളിനി നെറ്റോ റിപ്പോര്‍ട്ട് ചോര്‍ച്ച അന്വേഷിക്കാന്‍ െ്രെകം ബ്രാഞ്ചിനെ നിയോഗിച്ചത്. എന്നാല്‍ മാണിയെ അനുനയിപ്പിക്കാനായി നടത്തിയ അന്വേഷണനീക്കത്തിനു പിന്നാലെ അമ്പിളിയുടെ നുണപരിശോധനഫലം പൂര്‍ണരൂപത്തില്‍ പുറത്തുവന്നതോടെ സര്‍വതും കൈവിട്ടുപോയി. ചതിക്കപ്പെടുകയാണെന്ന തോന്നല്‍ കേരളാ കോണ്‍ഗ്രസില്‍ ശക്തമായതിനെത്തുടര്‍ന്നാണ് ഇനി ഇത്തരത്തില്‍ പോകാനാവില്ലെന്നും ബാര്‍കോഴ അന്വേഷണത്തില്‍ ഉടന്‍ തീരുമാനമുണ്ടാകാതെ ഒന്നിച്ചുമുന്നോട്ടുപോകേണ്ട എന്നുമുള്ള ഭീഷണിയിലേയ്ക്കു മാണിഗ്രൂപ്പ് എത്തിയത്. അന്വേഷണവാര്‍ത്തകള്‍ പുറത്തുവരുന്നതിനോടുള്ള അസഹിഷ്ണുത പലതരത്തില്‍ പ്രകടിപ്പിച്ച കെ.എം. മാണി എന്നാല്‍ ബാര്‍കോഴയിലെ അന്വേഷണം മികച്ചരീതിയിലാണു നടക്കുന്നത് എന്നാണു ഇന്നലെ പരസ്യമായി പ്രതികരിച്ചത്.
സംസ്ഥാനം ഇന്നുവരെ കാണാത്ത തരത്തിലുള്ള അന്വേഷണമാണ് ബാര്‍ കോഴ കേസില്‍ നടക്കുന്നതെന്നു യു.ഡി.എഫ്. മധ്യമേഖലാജാഥ കൊച്ചിയില്‍ ഉദ്ഘാടനം ചെയ്യേവേ മാണി പറഞ്ഞു. ബാര്‍ കോഴ കേസില്‍ വിപുലമായ അന്വേഷണമാണു നടക്കുന്നത്. ഇതിലൂടെ സത്യം പുറത്തുവരും. അന്വേഷണവിവരം ചോരുന്നതില്‍ വിഷമമില്ല. എന്നാല്‍ നിറംപിടിച്ച കഥകളിലൂടെ അന്വേഷണത്തെ തടസപ്പെടുത്തുന്നതു ശരിയല്ലെന്നു മാണി പറഞ്ഞു.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha