മയക്കുമരുന്ന് കേസില്‍ പിടിയിലായ കോക്കാച്ചി എന്ന മിഥുന്‍ സി. വിലാസുമായി ബന്ധമുള്ള സിനിമാ പ്രവര്‍ത്തകരെ ചോദ്യം ചെയ്യാന്‍ കൊച്ചി ഡി.സി.പി. ഹരിശങ്കറിന്റെ നേതൃത്വത്തിലുള്ള പ്രത്യേക അന്വേഷണ സംഘത്തിന്റെ തീരുമാനം. ആരോപണ വിധേയരായ പ്രമുഖ താരദമ്പതികളേയും ചോദ്യം ചെയ്‌തേക്കും. മയക്കുമരുന്നു കേസുകളില്‍ സ്ഥിരം ആരോപണവിധേയരാകുന്ന കൊച്ചിയിലെ ന്യൂജനറേഷന്‍ സിനിമക്കാരെ ഇനിയും കയറൂരി വിടാനാകില്ലെന്ന് പോലീസ് നേതൃത്വം പറയുന്നത്. നടന്‍ ഷൈന്‍ ടോം ചാക്കോ ഉള്‍പ്പെട്ട കൊക്കെയ്ന്‍ കേസില്‍ ആരോപണ വിധേയരായിരുന്ന സംവിധായകതാര ദമ്പതികളും പ്രമുഖ ന്യൂജനറേഷന്‍ നടിയും സുനില്‍ എന്ന നിര്‍മാതാവും അന്വേഷണ സംഘത്തിന്റെ നിരീക്ഷണത്തിലാണ്. നേരത്തെ ഈ കേസിമായി ബന്ധപ്പെട്ട് സംവിധായകന്‍ ആഷിഖ് അബുവിനെ ചോദ്യം ചെയ്യുമെന്ന് ഒരു പ്രമുഖ പത്രം റിപ്പോര്‍ട്ട് ചെയ്തിരുന്നു. 

പോലീസിലെ ഒരു പ്രധാന ഉദ്യോഗസ്ഥന് ഡിസിപി ഹരിശങ്കറിന്റെ പരിധിവിട്ടുള്ള അന്വേഷണത്തോടു താല്‍പര്യമില്ലെന്നാണു സൂചന. കൊക്കെയ്ന്‍ കേസിലടക്കം അന്വേഷണം പാതിവഴിയില്‍ നിലച്ചതും സിനിമക്കാര്‍ രക്ഷപ്പെട്ടതും ഈ ഉദ്യോഗസ്ഥന്റെ കൈകടത്തലുകള്‍ കൊണ്ടാണെന്ന ആക്ഷേപം ശക്തമായിരുന്നു.നേരത്തെ ഈ കേസ് ആന്വേഷിച്ചിരുന്ന ഇപ്പോഴത്തെ തൃശൂര്‍ സിറ്റിപോലീസ് കമ്മീഷണര്‍ നിഷാന്തിനിയെ അന്വേഷണത്തെ അട്ടിമറിച്ചുകൊണ്ട് സ്ഥലം മാറ്റിയിരുന്നു. അതിന് ശേഷം ചാര്‍ജ്ജ് ഏറ്റെടുത്ത ഹരിശങ്കറും പ്രമുഖര്‍ക്കെതിരെയുള്ള അന്വേഷണവുമായി മുന്നോട്ടു പോവുകയായിരുന്നു. ഇതിനിടയിലാണ് പ്രധാന പ്രതിയായ കോക്കാച്ചി എന്ന മിഥുന്‍ പോലീസിന്റെ പിടിയിലായത്. ഇതോടെയാണ് സിനിമാക്കാര്‍ക്ക് കേസുമായിട്ടുള്ള ബന്ധം തെളിഞ്ഞു വന്നത്.
കൊച്ചി കേന്ദ്രീകരിച്ചുള്ള 90 ശതമാനം മയക്കുമരുന്ന് ഇടപാടുകളും കോക്കാച്ചി വഴിയാണു നടന്നിരുന്നതെന്നാണ് പോലീസ് ഭാഷ്യം. നഗരത്തിലെ സിനിമാ നടികളും മോഡലുകളും സമ്പന്ന സ്ത്രീകളും കോളജ് വിദ്യാര്‍ഥിനികളും ഉള്‍പ്പെട്ട വനിതാ മയക്കുമരുന്ന് ശൃംഖലയുടെ മുഖ്യ ദാതാവ് കോക്കാച്ചി മിഥുനായിരുന്നു. എല്‍.എസ്.ഡിയും ആംപ്യൂളുകളുമാണ് സ്ത്രീകള്‍ക്കു പ്രിയമെന്നാണ് കോക്കാച്ചിയുടെ മൊഴി.
ന്യൂ ജനറേഷന്‍ സിനിമാ ബന്ധത്തെക്കുറിച്ചും മയക്കുമരുന്നു വിപണനത്തെക്കുറിച്ചും ആഴത്തിലുള്ള അന്വേഷണമാണ് പോലീസ് ലക്ഷ്യമിടുന്നത്. കൊച്ചിയിലെ പ്രധാനപ്പെട്ട മയക്കുമരുന്ന് കേസുകളിലെല്ലാം ആരോപണവിധേയനായ സുനില്‍ എന്ന നിര്‍മാതാവാണ് കോക്കാച്ചി മിഥുനെ വളര്‍ത്തിയതെന്നാണ് പോലീസിന്റെ പ്രാഥമിക നിഗമനം.ഇയാളുടെ വിശ്വസ്തനായാണ് മിഥുന്‍ അറിയപ്പെട്ടിരുന്നത്. എന്നാല്‍, അടുത്തിടെയായി ഇയാളുമായി ബന്ധമില്ലെന്ന് മിഥുന്‍ പോലീസിനോടു പറഞ്ഞിട്ടുണ്ട്. ഇതു വിശ്വസനീയമല്ലെന്നാണ് പോലീസ് നിലപാട്.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha