സംസ്ഥാനത്ത് ബിജെപി ആദ്യമായി അക്കൗണ്ട് തുറക്കുന്നത് 2016 ലെ നിയമസഭാ തെരഞ്ഞെടുപ്പില്‍ നേമം മണ്ഡലത്തിലൂടെയാണ്. ഇത്തവണയും നേമം നിലനിര്‍ത്തുമെന്നാണ് ബിജെപി അവകാശപ്പെടുന്നത്.

അതുകൊണ്ടുതന്നെ നേമം നിയമസഭാ മണ്ഡലത്തില്‍ ഒ രാജഗോപാലിനു പകരക്കാരനായി കുമ്മനം രാജശേഖരനെ കൊണ്ടുവരാനൊരുങ്ങി ബിജെപി. മണ്ഡലത്തില്‍ ശ്രദ്ധകേന്ദ്രീകരിക്കാന്‍ കുമ്മനത്തിനു പാര്‍ടി നിര്‍ദേശം നല്‍കിക്കഴിഞ്ഞു. ഇതിന്റെ ഭാഗമായി നേമം മണ്ഡലത്തില്‍ കുമ്മനം വീട് വാടകയ്‌ക്കെടുത്തു. രാജഗോപാലിന് 91 വയസ്സായി. ഒരു തെരഞ്ഞെടുപ്പില്‍ കൂടി രാജഗോപാലിനെ സ്ഥാനാര്‍ഥിയാക്കാന്‍ ബിജെപി ഒരുക്കമല്ല. അതുകൊണ്ടാണ് രാജഗോപാലിന് പകരക്കാരനെ തേടുന്നത്. കുമ്മനം രാജശേഖരന്‍ നേമത്ത് മത്സരിക്കണമെന്നാണ് പാര്‍ട്ടിയിലെ താല്‍പര്യം.
ബി ഗോപാലകൃഷ്ണന്‍, എ എന്‍ രാധാകൃഷ്ണന്‍ എന്നിവര്‍ തൃശൂര്‍ ജില്ലയിലെ വിവിധ മണ്ഡലങ്ങളില്‍ മത്സരിക്കാനും സാധ്യതയുണ്ട്. ശോഭാ സുരേന്ദ്രനെ അനുനയിപ്പിക്കാനുള്ള ശ്രമങ്ങള്‍ കേരള ബിജെപിയില്‍ തുടരുകയാണ്. നിയമസഭാ തെരഞ്ഞെടുപ്പിന് മുന്‍പ് ശോഭാ സുരേന്ദ്രനെ പാര്‍ട്ടിയില്‍ സജീവമാക്കണമെന്നാണ് ഒരു വിഭാഗം ആവശ്യപ്പെടുന്നത്. ശോഭാ സുരേന്ദ്രനും കെ സുരേന്ദ്രനും തമ്മിലുള്ള അഭിപ്രായഭിന്നത തുടര്‍ന്നാല്‍ നിയമസഭാ തെരഞ്ഞെടുപ്പില്‍ ദോഷം ചെയ്യുമെന്നാണ് വിലയിരുത്തല്‍.
ബിജെപി സംസ്ഥാന അധ്യക്ഷന്‍ കെ സുരേന്ദ്രന്‍ മത്സരരംഗത്തുണ്ടാകണമെന്നും ആര്‍എസ്എസ് നേതൃത്വം നിര്‍ദേശിച്ചിട്ടുണ്ട്. പാര്‍ടി നേതൃത്വത്തിന്റെ അഭിപ്രായമറിഞ്ഞശേഷം ഇക്കാര്യത്തില്‍ തീരുമാനമെടുക്കും. മത്സരിക്കാന്‍ തീരുമാനിച്ചാല്‍ തിരുവനന്തപുരത്തോ, പത്തനംതിട്ടയിലോ മത്സരിക്കും. പ്രധാന നേതാക്കളുടെ മണ്ഡലങ്ങള്‍ സംബന്ധിച്ച് അന്തിമ തീരുമാനം കേന്ദ്ര നേതൃത്വത്തിന്റേതാകും.
2011 ലെ തെരഞ്ഞെടുപ്പില്‍ വി ശിവന്‍കുട്ടി ഒ രാജഗോപാലിനെ 6415 വോട്ടുകള്‍ക്ക് പരാജയപ്പെടുത്തിയിരുന്നു. 2006 ല്‍ നടന്ന തെരഞ്ഞെടുപ്പില്‍ കോണ്‍ഗ്രസ് നേതാവ് എന്‍ ശക്തന്‍ 10,749 വോട്ടുകള്‍ക്കു വിജയിച്ചപ്പോള്‍, മൂന്നാമതായ ബിജെപി സ്ഥാനാര്‍ഥി മലയിന്‍കീഴ് രാധാകൃഷ്ണനു ലഭിച്ചത് 6705 വോട്ടുകള്‍ മാത്രം.