അങ്ങനെ നിമസഭയുടെ ചരിത്രത്തിലാദ്യമായി സമ്മേളനം നടക്കുന്ന ദിവസം സ്പീക്കറുടെ ഒരു സ്റ്റാഫിനെ കസ്റ്റംസ് ചോദ്യം ചെയ്യുകയാണ്. റൂള്‍സ് ഒഫ് ബിസിനസ് 165 ചട്ടപ്രകാരം സ്പീക്കറുടെ ജീവനക്കാര്‍ക്കും പരിരക്ഷ ബാധകമാണെന്ന് പറഞ്ഞ് കസ്റ്റംസ് ചോദ്യം ചെയ്യലിന് അസി. പ്രൈവറ്റ് സെക്രട്ടറി കെ. അയ്യപ്പന്‍ ഇന്ന് ഹാജരാകില്ലെന്നാണ് സ്പീക്കര്‍ പി ശ്രീരാമകൃഷ്ണന്‍ ഇന്നലെ പത്രസമ്മേളനത്തില്‍ പറഞ്ഞത്. ഏഷ്യാനെറ്റിലെ കമലേഷ് ഇതിനെ ചോദ്യം ചെയ്തപ്പോള്‍, നിയമസഭയിലെത്തുന്ന സകലര്‍ക്കും മാധ്യമ പ്രവര്‍ത്തകര്‍, പൊതുജനങ്ങള്‍, എന്തിന് ഏഷ്യാനെറ്റിലെ കമലേഷിന് പോലും സംരക്ഷണമുണ്ടെന്നാണ് പറഞ്ഞത്. എന്നാല്‍ നേരം ഇരുട്ടി വെളുക്കും മുമ്പ് കാര്യങ്ങള്‍ മാറിമറിഞ്ഞു. കുറ്റവാളികളെ സംരക്ഷിക്കാനുള്ളതല്ല ചട്ടം 165 എന്ന് പറഞ്ഞ് കസ്റ്റംസ് നിലപാട് കടുപ്പിച്ചതോടെ കെ. അയ്യപ്പന്‍ ഇന്ന് ഹാജരാകുമെന്നാണ് അറിയുന്നത്.

ഡോളര്‍ കടത്തു കേസില്‍ ചോദ്യം ചെയ്യുന്നത് ഒഴിവാക്കാന്‍ സ്പീക്കര്‍ പി. ശ്രീരാമകൃഷ്ണന്റെ അസി. പ്രൈവറ്റ് സെക്രട്ടറി കെ. അയ്യപ്പന് പ്രത്യേക പരിരക്ഷയില്ലെന്ന് വ്യക്തമാക്കിയ കസ്റ്റംസ്, ഇന്നലെ വീണ്ടും നോട്ടീസ് നല്‍കിയതോടെ ഇന്നു ഹാജരാകാന്‍ തീരുമാനം. രാവിലെ പത്തിന് കൊച്ചിയിലെ കസ്റ്റംസ് ഓഫീസിലെത്താനാണ് നോട്ടീസ്. ഇമെയിലില്‍ നോട്ടീസ് നല്‍കിയെങ്കിലും അയ്യപ്പന്‍ ഹാജരായിരുന്നില്ല. തുടര്‍ന്ന് വീട്ടു വിലാസത്തില്‍ ഇന്നലെ നോട്ടീസ് നല്‍കുകയായിരുന്നു. സ്പീക്കറുടെ യാത്രാവിവരങ്ങളും സന്ദര്‍ശകരുടെ വിവരങ്ങളും ടൂര്‍ ഡയറിയിലെ വിവരങ്ങളും തേടിയാണ് അയ്യപ്പനെ ചോദ്യം ചെയ്യുന്നത്.

റൂള്‍സ് ഒഫ് ബിസിനസ് 165 ചട്ടപ്രകാരം സ്പീക്കറുടെ ജീവനക്കാര്‍ക്കും പരിരക്ഷ ബാധകമാണെന്ന് നിയമസഭാ സെക്രട്ടറി എസ്.വി. ഉണ്ണികൃഷ്ണന്‍ നായര്‍ നല്‍കിയ കത്ത് സ്വീകാര്യമല്ലെന്ന് കസ്റ്റംസ് മറുപടി നല്‍കി. കുറ്റവാളികളെ സംരക്ഷിക്കാനുള്ളതല്ല ചട്ടം 165 എന്ന് മറുപടിയില്‍ വിശദീകരിച്ചിട്ടുണ്ട്. സെക്രട്ടറിയെ ചോദ്യംചെയ്യാന്‍ സ്പീക്കറുടെ അനുമതി ആവശ്യമില്ല. അറസ്റ്റ് ചെയ്യുകയാണെങ്കില്‍ മാത്രമേ അനുമതി ആവശ്യമുള്ളൂവെന്ന് കസ്റ്റംസ് അറിയിച്ചു.

പതിനാലാം കേരള നിയമ സഭയുടെ 22ാം സമ്മേളനത്തിന് ഇന്ന് തുടക്കമാകും. അതേസമയം സ്പീക്കര്‍ക്കെതിരെ നിയസഭയില്‍ ആഞ്ഞടിക്കാനൊരുങ്ങുകയാണ് പ്രതിപക്ഷം. സ്പീക്കറെ നീക്കണമെന്ന പ്രതിപക്ഷ നോട്ടീസിന് മേല്‍ യുക്തമായ നടപടി സ്വീകരിക്കുമെന്ന് സ്പീക്കര്‍ പി ശ്രീരാമകൃഷ്ണന്‍ ഇന്നലെ വ്യക്തമാക്കിയിരുന്നു. നോട്ടീസ് ചട്ട പ്രകാരമാണെന്നും ഈ വിഷയം ചര്‍ച്ചയ്ക്ക് എടുക്കാമെന്നുമാണ് സ്പീക്കര്‍ വ്യക്തമാക്കിയിരിക്കുന്നത്.

തന്റെ പിഎ അയ്യപ്പന് ലഭിച്ച കസ്റ്റംസ് നോട്ടീസില്‍ അന്വേഷണത്തെ തടസപ്പെടുത്തുകയല്ലെന്നും അദ്ദേഹം പറഞ്ഞു. ചട്ടം 165 എംഎല്‍എമാര്‍ക്ക് മാത്രമല്ല നിയമസഭ സ്റ്റാഫിനും ബാധകമാണെന്നും അദ്ദേഹം വ്യക്തമാക്കി. കസ്റ്റംസിന്റെ അന്വേഷണം ഒരുതരത്തിലും തടസപ്പെടുത്താന്‍ ശ്രമിച്ചിട്ടില്ല. സ്പീക്കറുടെ പേഴ്‌സണല്‍ സ്റ്റാഫിന് കസ്റ്റംസ് നോട്ടീസ് ചട്ടപ്രകാരം നല്‍കണമെന്നാണ് ആവശ്യപ്പെട്ടത്. ചട്ടം 165 സഭാംഗങ്ങള്‍ക്ക് മാത്രമല്ല. കസ്റ്റംസ് നോട്ടീസ് ചട്ടപ്രകാരം നല്‍കണമെന്ന് ആവശ്യപ്പെടുകയാണ് ഉണ്ടായത്. നിയമസഭാ വളപ്പില്‍ നോട്ടീസ് നല്‍കുന്നതിന് സ്പീക്കറുടെ അനുമതി വേണമെന്ന കാര്യം അറിയിച്ചിട്ടുണ്ടെന്നും സ്പീക്കര്‍ വ്യക്തമാക്കി

തനിക്കെതിരെ പല വാര്‍ത്തകള്‍ വരുന്നുണ്ട്. 40 വര്‍ഷമായി പൊതു രംഗത്തുള്ളയാളാണ് താന്‍. ഒരു രൂപയുടെ അഴിമതി നടത്തിയെന്ന് തെളിയിച്ചാല്‍ പൊതുപ്രവര്‍ത്തനം നിര്‍ത്തും. തനിക്ക് ഒരു ഭയവും ഇല്ല. വിവാദങ്ങളില്‍ കൂടുതല്‍ പറയാനില്ലെന്നും സ്പീക്കര്‍ പറഞ്ഞു. എന്തായാലും അയ്യപ്പന്‍ കസ്റ്റംസിന് മുമ്പില്‍ എത്തുന്നതോടെ കാര്യങ്ങള്‍ നിയമസഭയില്‍ മാറി മറിയുക തന്നെ ചെയ്യും.