ഗവര്‍ണര്‍ ആരിഫ് മുഹമ്മദ് ഖാന്‍ സര്‍ക്കാരിനെ വെള്ളം കുടിപ്പിച്ചത് നമ്മള്‍ കണ്ടതാണ്. അവസാനം സ്പീക്കറും രണ്ട് മന്ത്രിമാരും എത്തിയാണ് ഗവര്‍ണറെ തണുപ്പിച്ചത്. അതിന് ശേഷമാണ് കര്‍ഷക നിയമത്തിനെതിരെ പ്രത്യേക സമ്മേളനം നടത്താന്‍ സര്‍ക്കാര്‍ അനുമതി നല്‍കിയത്.

അതേസമയം ഗവര്‍ണര്‍ക്ക് കൊടുത്ത നയ പ്രസംഗത്തിലും വിവാദ കര്‍ഷക നിയമത്തിനെതിരെ പറയുന്നുണ്ട്. അത് തിരുത്തണമെന്ന് ഗവര്‍ണര്‍ സര്‍ക്കാരിനോട് ആവശ്യപ്പെട്ടിട്ടില്ല. പകരം ഇന്ന് നടക്കുന്ന നയപ്രഖ്യാപനത്തില്‍ ഇത് വായിക്കുമോ ഇല്ലയോ എന്നാണ് എല്ലാവരും ആകാംക്ഷയോടെ കാത്തിരിക്കുന്നത്.

നിയമസഭയുടെ ബജറ് സമ്മേളനത്തിനാണ് ഇന്ന് തുടക്കമാകുന്നത്. ഗവര്‍ണരുടെ നയപ്രഖ്യാപനത്തോടെ ആരംഭിക്കുന്ന സഭാസമ്മേളനത്തില്‍, പിണറായി സര്‍ക്കാരിന്റെ അവസാന ബജറ്റ് 15ന് അവതരിപ്പിക്കും. സ്പീക്കര്‍ സ്ഥാനത്ത് നിന്ന് പി ശ്രീരാമകൃഷ്ണനെ മാറ്റണമെന്ന പ്രതിപക്ഷ പ്രമേയം സഭ ചര്‍ച്ചചെയ്യും.

സ്വര്‍ണക്കടത്ത് കേസുമായി ബന്ധപ്പെട്ട് സ്പീക്കര്‍ക്കെതിരെ ഉയര്‍ന്ന ആരോപണങ്ങള്‍, സ്പീക്കറുടെ അസിസ്റ്റന്റ് പ്രൈവറ്റ് സെക്രട്ടറിക്ക് കസ്റ്റംസ് ചോദ്യം ചെയ്യാന്‍ നോട്ടിസ് നല്‍കിയതും അനുബന്ധ വിവാദവും പ്രതിപക്ഷം രാഷ്ട്രീയ ആയുധമാക്കും. സ്പീക്കറെ ചോദ്യം ചെയ്യാന്‍ കേന്ദ്ര അന്വേഷണ ഏജന്‍സികള്‍ നോട്ടിസ് നല്‍കിയാല്‍ അത് വലിയ രാഷ്ട്രീയ കോളിളക്കത്തിന് ഇടയാക്കും. ഒരന്വേഷണത്തെയും തടസപ്പെടുത്തില്ലെന്നും തന്നെ കേന്ദ്ര ഏജന്‍സികള്‍ ചോദ്യം ചെയ്യുമെന്ന് കരുതുന്നില്ലെന്നുമാണ് സ്പീക്കറുടെ നിലപാട്.

തദ്ദേശ തിരഞ്ഞെടുപ്പില്‍ നേടിയ വിജയം മുന്‍നിറുത്തിയാവും ഭരണപക്ഷം പ്രതിപക്ഷത്തെ നേരിടുക. നിയമസഭാ തിരഞ്ഞെടുപ്പിന് മുമ്പുളള അവസാന സമ്മേളനം പ്രതിപക്ഷത്തിനും നിര്‍ണായകമാണ്. കോണ്‍ഗ്രസില്‍ നേതൃമാറ്റ ചര്‍ച്ചകള്‍ കൊടുമ്പിരി കൊണ്ടിരിക്കെയാണ് സഭാ സമ്മേളനം ചേരുന്നത്.യു ഡി എഫില്‍ നിന്നുളള ജോസ് കെ മാണി പക്ഷത്തിന്റെ കൊഴിഞ്ഞുപോക്ക് പ്രതിപക്ഷത്തിന് ക്ഷീണം ഉണ്ടാക്കിയിട്ടുണ്ട്. വിപ്പുലംഘനം സംബന്ധിച്ച ജോസഫ്, ജോസ് വിഭാഗങ്ങളുടെ തര്‍ക്കം സ്പീക്കറുടെ പരിഗണനയിലാണ്. ഇന്ന് ഗവര്‍ണര്‍ നയപ്രഖ്യാപന പ്രസംഗത്തില്‍ കര്‍ഷക സമരത്തെക്കുറിച്ച് പരാമര്‍ശിക്കുമോ എന്നതും പ്രാധാന്യമര്‍ഹിക്കുന്നു.

അതേസമയം ഇന്ന് നിയമസഭയില്‍ നടക്കുന്ന ഗവര്‍ണറുടെ നയപ്രഖ്യാപനത്തോട് സഹകരിച്ചുകൊണ്ട്, പ്രതിപക്ഷം സ്പീക്കര്‍ക്കെതിരെ പ്രതിഷേധമുയര്‍ത്തും.

സ്പീക്കര്‍ക്കെതിരായ ആക്രമണത്തിന് ഊന്നല്‍ നല്‍കുകയാണ് പ്രതിപക്ഷ തന്ത്രം. ഇത് സംബന്ധിച്ച് ഇന്ന് രാവിലെ സമ്മേളനം തുടങ്ങുന്നതിന് മുമ്പ് ചേരുന്ന നിയമസഭാ കക്ഷി യോഗത്തിലാവും തീരുമാനം. കഴിഞ്ഞ വര്‍ഷം പൗരാവകാശ നിയമഭേദഗതിയുമായി ബന്ധപ്പെട്ട വിവാദത്തില്‍ ഗവര്‍ണര്‍ക്കെതിരെ പ്രതിപക്ഷം സഭയ്ക്കകത്ത് പ്രതിഷേധമുയര്‍ത്തിയിരുന്നു. നയ പ്രഖ്യാപനത്തിന് സഭയിലേക്ക് കടന്നുവന്ന ഗവര്‍ണറെ തടഞ്ഞു. പ്രതിപക്ഷ അംഗങ്ങളെ ബലം പ്രയോഗിച്ച് നീക്കിയ വാച്ച് ആന്‍ഡ് വാര്‍ഡിന്റെ സംരക്ഷണയിലാണ് പിന്നീട് ഗവര്‍ണര്‍ നയപ്രഖ്യാപനം നടത്തിയത്.

കുറച്ചുനേരം പ്രതിഷേധമുയര്‍ത്തിയ പ്രതിപക്ഷം പിന്നീട് നയപ്രഖ്യാപനം ബഹിഷ്‌കരിച്ചു. ഇക്കുറി ഗവര്‍ണര്‍ക്ക് നേരെ തിരിയേണ്ടതില്ലെന്നാണ് നിലപാട്.

സ്പീക്കറെ തല്‍സ്ഥാനത്ത് നിന്ന് നീക്കണമെന്നാവശ്യപ്പെട്ട് പ്രതിപക്ഷം നല്‍കിയ നോട്ടീസ് ഇന്നാരംഭിക്കുന്ന നിയമസഭാ സമ്മേളനത്തില്‍ ചര്‍ച്ചയ്‌ക്കെടുക്കുമെന്ന് സ്പീക്കര്‍ പി. ശ്രീരാമകൃഷ്ണന്‍ തന്നെ ഇന്നലെ വ്യക്തമാക്കി. പതിനാല് ദിവസത്തെ മുന്‍കൂര്‍ നോട്ടീസ് വേണമെന്ന നിബന്ധന ഉള്‍പ്പെടെ പാലിക്കപ്പെടുന്നതിനാല്‍ ഇക്കുറി പ്രതിപക്ഷത്തിന്റെ നോട്ടീസ് ചട്ടവിരുദ്ധമല്ല.

ചട്ടങ്ങളും കീഴ്‌വഴക്കങ്ങളും പാലിച്ച് യുക്തമായ നടപടി സ്വീകരിക്കുമെന്നും സ്പീക്കര്‍ പറഞ്ഞു. എന്തായാലും ഗവര്‍ണറുടെ നയപ്രസംഗവും പ്രതിപക്ഷത്തിന്റെ നിലപാടുമാണ് ഏറെ പ്രധാനം.