ഒ. രാജഗോപാലിനെ വ്യക്തിപരമായി വോട്ട് ചെയ്താണ് നേമത്തുകാര്‍ അദ്ദേഹത്തെ നിയമസഭയിലെത്തിച്ചത്. രാഷ്ട്രീയത്തിനതീതമായി എല്ലാവരുടേയും പ്രശംസ പിടിച്ചു പറ്റാന്‍ രാജഗോപാലിനായി. എന്തിന് ബിജെപിയ്ക്ക് അല്‍പം പ്രയാസമുണ്ടാക്കിയെങ്കില്‍ പോലും സിപിഎം നേതാക്കളുടെ പോലും പ്രശംസയ്ക്ക് രാജഗോപാല്‍ പാത്രമായി. രാജഗോപാല്‍ ഇനി നേമത്ത് മത്സരിക്കില്ലെന്ന് വന്നതോടെ രാജേട്ടന് പകരം ഏത് ചേട്ടന്‍ വരുമെന്ന ചോദ്യമായി. അതിനുത്തരം കുമ്മനം രാജശേഖരനെന്ന രാജേട്ടന്‍ തന്നെ.

മിസോറം മുന്‍ ഗവര്‍ണര്‍ കുമ്മനം രാജശേഖരനെ നിയസഭാ തിരഞ്ഞെടുപ്പില്‍ നേമത്ത് മല്‍സരിപ്പിക്കാന്‍ ബി.ജെ.പിയില്‍ അനൗപചാരിക ധാരണയായി. പി.കെ. കൃഷ്ണദാസിനോട് കാട്ടാക്കടയിലും എ.എന്‍. രാധാകൃഷ്ണനോട് മണലൂരും പ്രവര്‍ത്തനം തുടങ്ങാന്‍ പാര്‍ട്ടി നിര്‍ദ്ദേശിച്ചു. കെ. സുരേന്ദ്രന്‍ മല്‍സരിക്കുമെങ്കിലും മണ്ഡലമേതെന്ന് തീരുമാനിച്ചിട്ടില്ല.

നിയമസഭയിലെ പ്രാതിനിധ്യം കൈവിടാതിരിക്കാനാണ് ബി.ജെ.പി മുന്‍സംസ്ഥാന അധ്യക്ഷനും മുതിര്‍ന്ന നേതാവുമായ കുമ്മനം രാജശേഖരനെ നേമത്ത് മല്‍സരിപ്പിക്കുന്നത്. മുന്‍സംസ്ഥാന അധ്യക്ഷന്‍ പി.കെ. കൃഷ്ണദാസിനോട് കാട്ടാക്കടയിലും സംസ്ഥാന വൈസ് പ്രസിഡന്റ് എ.എന്‍. രാധാകൃഷ്ണനോട് മണലൂരിലും പ്രവര്‍ത്തനംതുടങ്ങാന്‍ പാര്‍ട്ടി നിര്‍ദ്ദേശിച്ചുവെന്നാണ് അറിയുന്നത്. സംസ്ഥാന ജനറല്‍ സെക്രട്ടറി എം.ടി. രമേശ് കോഴിക്കോട് നോര്‍ത്തില്‍ മല്‍സരിച്ചേയ്ക്കും. സംസ്ഥാന അധ്യക്ഷന്‍ കെ. സുരേന്ദ്രന്‍ എവിടെ മല്‍സരിക്കുമെന്ന് ധാരണയായിട്ടില്ല. കഴക്കൂട്ടം, കോന്നി എന്നീ മണ്ഡലങ്ങള്‍ക്കാണ് മുന്‍ഗണന. കഴിഞ്ഞതവണ 84 വോട്ടിന് തോറ്റ മഞ്ചേശ്വരവും പരിഗണിച്ചേയ്ക്കാം. കേന്ദ്രമന്ത്രി വി. മുരളീധരന്‍ സംസ്ഥാന രാഷ്ട്രീയത്തിലേക്ക് മടങ്ങേണ്ടതില്ലെന്നാണ് ഇതുവരെയുള്ള കേന്ദ്രനിലപാട്. വി.വി. രാജേഷ് വട്ടിയൂര്‍ക്കാവിലോ നെടുമങ്ങാട്ടോ മല്‍സരിച്ചേയ്ക്കാം.

നേമത്ത് കുമ്മനം ഏറെക്കുറെ ഉറപ്പായതിനാല്‍ സംസ്ഥാന സെക്രട്ടറി എസ്. സുരേഷ് കോവളത്തോ തിരുവനന്തപുരത്തോ മല്‍സരിക്കും. പത്തിന് അനൗപചാരിക യോഗം ചേര്‍ന്നശേഷം പതിനൊന്നിന് തൃശൂരില്‍ സംസ്ഥാന സമിതി ചേരേണ്ടതായിരുന്നു. എന്നാല്‍ സുരേന്ദ്രന് കോവിഡ് ബാധിച്ചതിനാല്‍ യോഗം മാറ്റി. ശോഭാസുരേന്ദ്രന്റെ പ്രശ്‌നവും ചര്‍ച്ചചെയ്യേണ്ടതായിരുന്നു. വാര്‍ഡ്തല പ്രവര്‍ത്തനത്തിന് പകരം ബൂത്ത് കേന്ദ്രീകരിച്ച് പ്രവര്‍ത്തിക്കാന്‍ തീരുമാനിച്ചിട്ടുണ്ട്. ഈ മാസം 25 ന് മുമ്പ് മണ്ഡലതല പഠനശിബിരങ്ങള്‍ പൂര്‍ത്തിയാക്കും. ഒപ്പം പ്രചാരണ പ്രവര്‍ത്തനങ്ങള്‍ക്കും തുടക്കമാകും. ആടുത്തമാസം ആദ്യവാരത്തോടെ നിയമസഭാ തിരഞ്ഞെടുപ്പിലെ ആദ്യപട്ടികയ്ക്ക് രൂപമാകും.

വരാനിരിക്കുന്ന നിയമസഭാ തിരഞ്ഞെടുപ്പില്‍ മത്സരിക്കില്ലെന്ന് നേമം എം.എല്‍.എ ഒ. രാജഗോപാല്‍ അറിയിച്ചതിന് പിന്നാലെ തിരക്കിട്ട നീക്കവുമായി ബി.ജെ.പി. രംഗത്തെത്തിയത്. നേമത്ത് ഏറെ വിജയ സാദ്ധ്യതയുള്ള നേതാവിനെ നിറുത്തുകയെന്നതാണ് ബി.ജെ.പി നേരിട്ട വെല്ലുവിളി. അതിന്റെ അവസാനമാണ് കുമ്മനത്തെ തീരുമാനിക്കാന്‍ ധാരണയായത്.

ഇതിന്റെ ഭാഗമായി കുമ്മനത്തിന് വേണ്ടി നേമത്ത് വീട് വാടകയ്‌ക്കെടുത്തിരിക്കുകയാണ് പാര്‍ട്ടി. ലോക്‌സഭാ തിരഞ്ഞെടുപ്പിന് ശേഷം സംസ്ഥാന രാഷ്ട്രീയത്തില്‍ അത്ര സജീവമല്ലാതിരുന്ന കുമ്മനത്തോട് വീണ്ടും നേമത്ത് ശ്രദ്ധ കേന്ദ്രീകരിക്കാന്‍ പാര്‍ട്ടി നിര്‍ദ്ദേശം നല്‍കി. തീരുമാനമായ സ്ഥാനാര്‍ത്ഥികളോട് അതത് മണ്ഡലങ്ങളില്‍ വാടകയ്ക്ക് താമസസ്ഥലം തയ്യാറാക്കാന്‍ പാര്‍ട്ടി ആവശ്യപ്പെട്ടിട്ടുണ്ട്. ഇത് മുന്‍നിര്‍ത്തിയാണ് കുമ്മനത്തിനുവേണ്ടിയും വാടകയ്ക്ക് വീട് എടുത്തിരിക്കുന്നത്.

നേമത്ത് ബി.ജെ.പിക്ക് അതീതമായി രാജഗോപാലിനുണ്ടായിരുന്ന ജനപിന്തുണ കണക്കിലെടുത്താണ് കഴിഞ്ഞ തവണ സീറ്റ് നല്‍കിയത്. രാജഗോപാലിനുള്ള ജനപിന്തുണ ജനകീയനായ കുമ്മനത്തിലൂടെ നേടിയെടുക്കാമെന്നാണ് ബി.ജെ.പിയുടെ നിലവിലെ കണക്കുകൂട്ടല്‍.

2016ലെ നിയമസഭാ തിരഞ്ഞെടുപ്പില്‍ നേമത്ത് രാജഗോപാല്‍ നേടിയ വിജയത്തിലൂടെയാണ് ബി.ജെ.പി കേരളത്തില്‍ അക്കൗണ്ട് തുറന്നത്. കേരള നിയമസഭയിലെ ഏക ബി.ജെ.പി എം.എല്‍.എയാണ് അദ്ദേഹം. 8671 വോട്ടുകളുടെ ഭൂരിപക്ഷത്തോടെയായിരുന്നു ഒ.രാജഗോപാല്‍ നിയമസഭയിലെത്തിയത്. രാജഗോപാലിനെതിരെ സി.പി.ഐ.എം കളത്തിലിറക്കിയ സിറ്റിംഗ് എം.എല്‍.എ വി ശിവന്‍കുട്ടിക്ക് 59,142 വോട്ടുകള്‍ മാത്രമാണ് ലഭിച്ചത്. രാജഗോപാലിന് 67,813 വോട്ടും ലഭിച്ചു. ഇത് അല്‍പസ്വല്‍പം ഏറ്റക്കുറച്ചിലുണ്ടാകുമെങ്കിലും കുമ്മനത്തിലൂടെ നേമം പിടിക്കാനാകുമെന്ന് തന്നെയാണ് ബിജെപി കണക്ക് കൂട്ടുന്നത്.