മലയാളികളുടെ സ്വകാര്യ അഹങ്കാരം... ഗാനഗന്ധര്വ്വന് യേശുദാസിന് ഇന്ന് പിറന്നാള്; കോവിഡ് മഹാമാരി തടാമായതോടെ യേശുദാസ് ഇത്തവണ പിറന്നാള് ആഘോഷത്തിനായി കൊല്ലൂരില് എത്തില്ല; ദാസേട്ടന് വേണ്ടി മൂകാംബികയില് കാഞ്ഞങ്ങാട് രാമചന്ദ്രന് പാടുന്നു
മലയാളികളുടെ സ്വകാര്യ അഹങ്കാരമാണ് ഗാനഗന്ധര്വന് കെ.ജെ. യേശുദാസ്. യേശുദാസിന്റെ ഒരു ഗാനമെങ്കിലും കേള്ക്കാതെ ശരാശരി മലയാളിയുടെ ഒരു ദിനം അവസാനിക്കില്ല. അത്രയ്ക്കാണ് യേശുദാസ് മലയാളികളുടെ ഹൃദയത്തിലുള്ളത്. അത്രയേറെ സ്നേഹിക്കുന്ന യേശുദാസ് ഇന്ന് 81ന്റ നിറവാണ്. കൊല്ലൂര് മൂകാബിക സന്നിധിയിലെ പതിവ് പിറന്നാള് ദര്ശനത്തിന് അദ്ദേഹം എത്തില്ലെങ്കിലും പ്രിയപ്പെട്ട ദാസേട്ടന് വേണ്ടി കാഞ്ഞങ്ങാട് രാമചന്ദ്രന് രണ്ട് പതിറ്റാണ്ടായി തുടരുന്ന സംഗീതാര്ച്ചന മുടങ്ങില്ല. കോവിഡ് മഹമാരി കാരണമാണ് ഇത്തവണ മൂകാംബികയിലെ പിറന്നാള് ആഘോഷം യേശുദാസ് മാറ്റിവച്ചത്. മൂകാബികയിലെ ദര്ശനം മുടങ്ങിയതില് ദേശുദാസിന് വേദനയുണ്ട്. എന്നാല് ദാസേട്ടന് വേണ്ടി ഇരുപത് വര്ഷമായി തുടരുന്ന സംഗീതാര്ച്ചന മുടക്കാന് കാഞ്ഞങ്ങാട് രാമചന്ദ്രന് തയ്യാറല്ല. കോവിഡ് പ്രോട്ടോക്കോള് പാലിച്ച് ഇന്ന് രാവിലെ ആറു മുതല് വൈകിട്ട് ആറ് വരെ കൊല്ലൂരില് രാമചന്ദ്രന്റെ നേതൃത്വത്തില് സംഗീതാര്ച്ചന നടക്കും.
കഴിഞ്ഞ 48 വര്ഷങ്ങളായി മൂകാംബിക ക്ഷേത്ര സന്നിധിയിലാണ് ഗാന ഗന്ധര്വ്വന്റെ പിറന്നാള് ആഘോഷം. ലോകത്തിന്റെ ഏതു കോണിലായാലും ജനുവരി 10ന് തന്റെ പിറന്നാള് ദിനത്തില് ഗാനഗന്ധര്വന് കെ ജെ യേശുദാസ് കുടുംബസമേതം കൊല്ലൂര് മൂകാംബിക ക്ഷേത്രസന്നിധിയില് എത്തും.
48 വര്ഷമായി തുടരുന്ന പതിവിനാണ് ഇത്തവണ മുടക്കം വന്നിരിക്കുന്നത്. കഴിഞ്ഞവര്ഷം എണ്പതാം പിറന്നാള് ആഘോഷത്തിനായി ഭാര്യ പ്രഭയ്ക്കും മക്കളായ വിനോദ്, വിജയ്, വിശാല് എന്നിവര്ക്കും ഒപ്പമാണ് യേശുദാസ് മൂകാംബിക ദേവിയുടെ സന്നിധിയില് എത്തിയത്. സംഗീത സാഹിത്യ രംഗങ്ങളിലെ പ്രഗല്ഭരായ നിരവധി പേരാണ് അന്ന് പിറന്നാള് ആശംസകള് നേരാനായി ക്ഷേത്രനഗരിയില് എത്തിയത്. സംഗീത സാഹിത്യ രംഗങ്ങളിലെ പ്രഗല്ഭരായ നിരവധി പേരാണ് അന്ന് പിറന്നാള് ആശംസകള് നേരാനായി ക്ഷേത്രനഗരിയില് എത്തിയത്.
ആഘോഷം കഴിഞ്ഞ് ഫെബ്രുവരി പകുതിയോടെ യേശുദാസ് അമേരിക്കയിലെ ഡല്ലാസിലേക്കാണ് പോയത്. എല്ലാ വര്ഷവും മാര്ച്ച് മാസം അവസാനം പിതാവ് അഗസ്റ്റിന് ജോസഫിന്റെ ഓര്മ ദിനത്തില് ഫോര്ട്ടുകൊച്ചി അധികാരി വളപ്പില് നടക്കുന്ന സംഗീത കച്ചേരിക്ക് എത്താമെന്നായിരുന്നു ഉദ്ദേശിച്ചിരുന്നത്. അതിനിടെയാണ് ലോകത്തെ നടുക്കിയ മഹാമാരി പടര്ന്നുപിടിച്ചത്. ഇതോടെ യാത്ര അനിശ്ചിതത്വത്തിലായി.
ശരീരം കൊണ്ട് മൂകാംബിംക ദേവിയുടെ തിരുസന്നിധിയില് എത്താന് ആവില്ലെങ്കിലും ഇക്കുറിയും ജനുവരി 10ന് യേശുദാസിന്റെ ഗന്ധര്വ സംഗീതം ക്ഷേത്ര നടയിലെത്തും. വെബ്കാസ്റ്റ് വഴിയാണ് യേശുദാസിന്റെ സംഗീതാര്ച്ചന കൊല്ലൂര് മൂകാംബിക ദേവിക്ക് മുന്നിലെത്തുക. ഇതിനായി ക്ഷേത്രത്തിലെ സരസ്വതി മണ്ഡപത്തില് പ്രത്യേക സ്ക്രീന് സൗകര്യമൊരുക്കും.
കഴിഞ്ഞ ഇരുപത് വര്ഷമായി പ്രശസ്ത സംഗീതജ്ഞന് കാഞ്ഞങ്ങാട് രാമചന്ദ്രന്റെ നേതൃത്വത്തില് പിറന്നാള് ദിനത്തില് ഗാനഗന്ധര്വന്റെ ആയുരാരോഗ്യത്തിനായി കൊല്ലൂരില് അഖണ്ഡ സംഗീതാര്ച്ചന നടത്തി വരുന്നുണ്ട്. ഇക്കുറിയും യേശുദാസ് സംഗീതോത്സവം മൂകാംബിക ക്ഷേത്രത്തില് സംഘടിപ്പിക്കും. ഗാനഗന്ധര്വന്റെ സാന്നിധ്യമില്ലെങ്കിലും ഗാനാര്ച്ചനയും ചണ്ഡികാ ഹോമം അടക്കമുള്ള ചടങ്ങുകളും പതിവുപോലെ ഇത്തവണയും കൊല്ലൂരില് നടക്കും.
അതേസമയം ദാസേട്ടന് ഗായിക കെഎസ് ചിത്ര നല്കിയ പിറന്നാള് സമ്മാനം ആരാധകരുടെ മനം കീഴടക്കുന്നതാണ്. യേശുദാസിന്റെ വിവിധ ഗാനങ്ങള് ഉള്പ്പെടുത്തിക്കൊണ്ടുള്ള വിഡിയോ ആണ് പുറത്തിറക്കിയിരിക്കുന്നത്. ചിത്രയ്ക്കൊപ്പം മലയാളത്തിലെ പ്രിയ ഗായകരും ദാസേട്ടന്റെ ഇഷ്ടഗാനങ്ങളുമായി വിഡിയോയില് പ്രത്യക്ഷപ്പെടുന്നുണ്ട്. ചിത്ര തന്നെയാണ് തന്റെ ഫേയ്സ്ബുക്ക് പേജിലൂടെ ട്രിബ്യൂട്ട് വിഡിയോ പങ്കുവെച്ചത്. അങ്ങനെ ലോകത്തെമ്പാടുമുള്ള മലയാളികള് ദാസേട്ടന് ആയുരാരോഗ്യ സൗഖ്യം നേരുകയാണ്.
"
https://www.facebook.com/Malayalivartha
