തിരുവനന്തപുരം വിമാനത്താവളം അദാനിക്ക് കൈമാറി; എയര്പോര്ട്ട് അതോറിറ്റിയും അദാനി എന്റര്പ്രൈസസും ലിമിറ്റഡും തമ്മില് കരാറില് ഒപ്പിട്ടു; മൂന്ന് മാസത്തിനകം വിമാനത്താവളങ്ങള് ഏറ്റെടുക്കണമെന്ന് കരാര്; സുപ്രീം കോടതി വരെ നീണ്ട നിയമ പോരാട്ടങ്ങള്ക്കെടുവില് അദാനി
തിരുവനന്തപുരം വിമാനത്താവളം അദാനിക്ക് കൈമാറിക്കൊണ്ടുള്ള കരാര് ഒപ്പിട്ടു. ഡല്ഹിയില് ചൊവ്വാഴ്ച രാവിലെ എയര്പോര്ട്ട് അതോറിറ്റിയും അദാനി എന്റര്പ്രൈസസും ലിമിറ്റഡും തമ്മിലാണ് കരാറില് ഒപ്പിട്ടത്. തിരുവനന്തപുരത്തിന് പുറമേ ജയ്പൂര്, ഗുവാഹാട്ടി വിമാനത്താവളങ്ങളും അദാനി ഗ്രൂപ്പിന് കൈമാറിയിട്ടുണ്ട്. എയര്പോര്ട്ട് അതോറിറ്റി എക്സിക്യൂട്ടീവ് ഡയറക്ടര് എന്.വി സുബ്ബറായ്ഡുവും അദാനി എയര്പോര്ട്ട്സ് സിഇഒ ബെഹ്നാദ് സാന്തിയും തമ്മിലാണ് കരാറില് ഒപ്പുവെച്ചത്.
മൂന്ന് മാസത്തിനകം വിമാനത്താവളങ്ങള് ഏറ്റെടുക്കണമെന്ന കരാറിലാണ് മൂന്ന് വിമാനത്താവളങ്ങളും കൈമാറിയത്. 50 വര്ഷത്തേക്കാണ് കരാര് ഒപ്പുവച്ചിരിക്കുന്നത്. ഇതോടൊപ്പം ജയ്പൂര്, ഗുവാഹത്തി വിമാനത്താവളങ്ങളുടെ കരാറുകളും ഒപ്പുവച്ചിട്ടുണ്ട്. ഈ വിമാനത്താവളങ്ങളുടെ നടത്തിപ്പ് ചുമതല, ഓപ്പറേഷന്സ്, വികസനം എന്നിവയെല്ലാം ഇനി അദാനി എയര്പോര്ട്ട്സ് ലിമിറ്റഡ് എന്ന സ്വകാര്യകമ്പനിക്കാകും. വിമാനത്താവളങ്ങളുടെ നടത്തിപ്പ്, പരിപാലനം, വികസനം എന്നിവയ്ക്കുള്ള അനുമതിയാണ് അദാനി ഗ്രൂപ്പിന് നല്കിയിരിക്കുന്നത്.
തിരുവനന്തപുരം വിമാനത്താവളങ്ങളുമായി ബന്ധപ്പെട്ട് ഉയര്ന്ന വിവാദങ്ങള് ഇതോടെ അവസാനിക്കുകയാണ്. വിമാനത്താവളം സ്വകാര്യവത്കരിക്കുന്നതിനെതിരേ സുപ്രീം കോടതി വരെ നീണ്ട നിയമ പോരാട്ടങ്ങള്ക്കെടുവിലാണിപ്പോള് വിമാനത്താവളത്തിന്റെ നടത്തിപ്പ് ചുമതല അദാനിക്ക് കൈമാറിയുള്ള കരാറില് ഒപ്പിട്ടത്.
അതെ സമയം ഇന്ത്യയിലെ രണ്ടാമത്തെ വലിയ വിമാനത്താവളമായ മുംബൈ അടക്കം രാജ്യത്തെ ഏഴ് പ്രമുഖ വിമാനത്താവളങ്ങള് അദാനി ഗ്രൂപ്പിന്റെ കയ്യില് എത്തുന്നതിനെതിരെ ധന മന്ത്രാലയവും നീതി ആയോഗും രേഖാമൂലം എതിര്പ്പ് ഉയര്ത്തിയിരുന്നുവെന്നും എന്നാല് അതിനെയൊക്കെ മറികടന്ന് കേന്ദ്ര സര്ക്കാര് അദാനിക്ക് തന്നെ കൊടുക്കുകയായിരുന്നുവെന്നും വെളിപ്പെടുത്തല്. ഇന്ത്യന് എക്സ്പ്രസ്സ് പത്രത്തിന് ലഭിച്ച രേഖകളിലാണ് ഈ വെളിപ്പെടുത്തല്. നേരത്തെ കയ്യടക്കിയ ആറ് വിമാനത്താവളങ്ങള് കൂടാതെ മുംബൈക്ക് വേണ്ടി അദാനി ഗ്രൂപ്പ് കഴിഞ്ഞ ഓഗസ്റ്റില് താല്പര്യപത്രം ഒപ്പിട്ടിരുന്നുവെങ്കിലും ഇക്കഴിഞ്ഞ ദിവസം, ജനുവരി 12 ന് മാത്രമാണ് എയര്പോര്ട്ട് അതോറിറ്റി ഓഫ് ഇന്ത്യ അതിന് അന്തിമ അനുമതി നല്കിയത്.
മുന്ദ്രയില് ഒരു സ്വകാര്യ എയര് സ്ട്രിപ്പ് പ്രവര്ത്തിപ്പിക്കുന്നതില് നിന്നും തുടങ്ങി രാജ്യത്തെ ഏഴ് പ്രമുഖ വിമാനത്താവളങ്ങളുടെ പ്രവര്ത്തനം നിയന്ത്രിക്കുന്ന കമ്പനിയായി അദാനി ഗ്രൂപ്പ് മാറി, അതും ധനമന്ത്രാലയത്തിന്റെയും നീതി ആയോഗിന്റെയും എതിര്പ്പുകളെ മറികടന്ന്.
കൈകാര്യം ചെയ്യുന്ന വിമാനത്താവളങ്ങളുടെ എണ്ണം വച്ച് നോക്കുമ്പോള് രാജ്യത്തെ ഏറ്റവും വലിയ സ്വകാര്യ ഡവലപ്പറാണ് അദാനി ഗ്രൂപ്പ് ഇന്ന്. അഹമ്മദാബാദ്, മംഗളൂരു, ലഖ്നൗ, ജയ്പൂര്, ഗുവാഹത്തി, തിരുവനന്തപുരം എന്നിവ കൂടാതെ ഇപ്പോള് മുംബൈയും. ഇവയെല്ലാം ചേര്ന്ന് കഴിഞ്ഞ സാമ്പത്തിക വര്ഷം 7.90 കോടി രാജ്യാന്തര യാത്രക്കാരെ കൈകാര്യം ചെയ്തു. ഇത് രാജ്യത്തെ മൊത്തം വിമാനത്താവളങ്ങള് കൈകാര്യം ചെയ്യുന്ന 34.10 കോടി യാത്രക്കാരുടെ നാലിലൊന്ന് വരും.
ഇതിനു പുറമെ, സര്ക്കാറിന്റെ പ്രാദേശിക കണക്റ്റിവിറ്റി സ്കീമിന് കീഴില് 2018 ല് വാണിജ്യ വിമാന സര്വീസുകള് ആരംഭിച്ച മുന്ദ്ര വിമാനത്താവളം ഒരു സമ്പൂര്ണ്ണ അന്താരാഷ്ട്ര വാണിജ്യ വിമാനത്താവളമാക്കി മാറ്റുന്നതിനും അനുമതി നല്കിക്കഴിഞ്ഞു. നവി മുംബൈയില് നിര്മ്മിക്കുന്ന ഗ്രീന്ഫീല്ഡ് വിമാനത്താവളത്തിലും അദാനിക്ക് കാര്യമായ ഓഹരിയുണ്ട്.
https://www.facebook.com/Malayalivartha