പൂട്ടുവീണ ശിവശങ്കര്... എന്ഫോഴ്സ്മെന്റും കസ്റ്റംസും രജിസ്റ്റര് ചെയ്ത 2 വ്യത്യസ്ത കേസുകളില് ശിവശങ്കറിന് ജാമ്യം ലഭിച്ചെങ്കിലും പുറത്തിറങ്ങാനാവില്ല; ശിവശങ്കര് പുറത്തിറങ്ങാതിരിക്കാനായി കസ്റ്റംസ് നടത്തിയ നീക്കം ഫലം കണ്ടു; ഡോളര് കടത്തിയ കേസില് അറസ്റ്റുള്ളതിനാല് ഇതിലും ജാമ്യം ലഭിച്ചാലേ പുറത്തിറങ്ങാനാകൂ
ഇന്നലത്തെ ദിവസം മുഖ്യമന്ത്രിയുടെ മുന് പ്രിന്സിപ്പല് സെക്രട്ടറി എം. ശിവശങ്കറെ സംബന്ധിച്ച് നിര്ണായകമായിരുന്നു. വളരെ മാസങ്ങള്ക്ക് ശേഷം ഇന്നലെ ജയില് മോചിതനായി പുറത്തിറങ്ങാന് കഴിയുമെന്നാണ് ശിവശങ്കര് പ്രതീക്ഷിച്ചിരുന്നത്.
എല്ലാ കേസുകളിലും ജാമ്യം നേടി പുറത്തിറങ്ങാന് കഴിയുമെന്നാണ് കരുതിയത്. എന്നാല് കസ്റ്റംസ് നടത്തിയ ചടുലമായ നീക്കത്തില് ശിവശങ്കറിന് ഒരു കേസില് പുറത്തിറങ്ങാനായില്ല.
സ്വര്ണക്കടത്തില് എന്ഫോഴ്സ്മെന്റും കസ്റ്റംസും രജിസ്റ്റര് ചെയ്ത വ്യത്യസ്ത കേസുകളിലാണ് എം. ശിവശങ്കറിന് ജാമ്യം അനുവദിച്ചത്. എന്ഫോഴ്സ്മെന്റ് കേസില് ഹൈക്കോടതിയും, കസ്റ്റംസ് കേസില് സാമ്പത്തിക കുറ്റകൃത്യം പരിഗണിക്കുന്ന കോടതിയുമാണ് ജാമ്യം നല്കിയത്. ഡോളര് കടത്തിയ കേസിലും അറസ്റ്റുള്ളതിനാല് ഇതിലും ജാമ്യം ലഭിച്ചാലേ ശിവശങ്കറിന് പുറത്തിറങ്ങാനാകൂ.
രണ്ട് ബാങ്കുകളിലെ ലോക്കറില് സൂക്ഷിച്ച പണം ശിവശങ്കറിന്റേതാണെന്ന് സ്വപ്നയുടെ മൊഴിയുണ്ടെന്ന ഇ.ഡി.യുടെ ആരോപണം ഭാഗികമായി ഹൈക്കോടതി സിംഗിള് ബെഞ്ച് തള്ളി.
എസ്.ബി.ഐ ലോക്കറില് നിന്ന് കണ്ടെടുത്ത 64 ലക്ഷം രൂപയുടെ കള്ളപ്പണം വെളുപ്പിക്കലുമായി മാത്രമേ ശിവശങ്കറിനെ ബന്ധിപ്പിക്കാനാകൂ. ഫെഡറല് ബാങ്കിലെ സ്വപ്ന സുരേഷിന്റെ പേരിലെ ലോക്കറില് ശിവശങ്കറിനുള്ള ബന്ധം സ്ഥാപിക്കുന്ന തെളിവോ സൂചനകളോയില്ല. ഒരു കോടി രൂപയില് താഴെയുള്ള കള്ളപ്പണം വെളുപ്പിക്കലുമായി ബന്ധപ്പെട്ടവ മാത്രമേ ശിവശങ്കറിന് മേല് നിലനില്ക്കൂ. സ്വര്ണക്കടത്തില് ശിവശങ്കറിന്റെ നേരിട്ടുള്ള ബന്ധം തെളിയിക്കാന് സാധിച്ചിട്ടില്ലെങ്കിലും സ്വപ്നയുടെ സ്വര്ണക്കടത്ത് ഇടപാടുകളെക്കുറിച്ച് ശിവശങ്കറിന് അറിയാമായിരുന്നു.
സ്വപ്നയുടെ ഇടപാടിലൂടെ ശിവശങ്കറിനും നേട്ടമുണ്ടായിട്ടുണ്ടെന്ന് കരുതേണ്ടിവരുമെന്നും ഹൈക്കോടതി വിലയിരുത്തി. രോഗങ്ങള് മൂലം ബുദ്ധിമുട്ടുന്ന സാഹചര്യത്തില് ചില കര്ശന വ്യവസ്ഥകള് ഒഴിവാക്കുകയും ചെയ്തു. ജാമ്യത്തില് വിട്ടാല് ഹര്ജിക്കാരന് കുറ്റകൃത്യം ചെയ്യാന് സാദ്ധ്യതയുണ്ടെന്ന് പ്രോസിക്യൂഷന് സ്ഥാപിക്കാനായില്ലെന്നും സിംഗിള്ബെഞ്ച് പറഞ്ഞു.
അറസ്റ്റു ചെയ്ത് 60 ദിവസം പിന്നിട്ടിട്ടും കുറ്റപത്രം സമര്പ്പിക്കാത്തതിനാലാണ് സാമ്പത്തിക കുറ്റകൃത്യം പരിഗണിക്കുന്ന കോടതി സ്വഭാവിക ജാമ്യം അനുവദിച്ചത്. രണ്ടു ലക്ഷം രൂപയുടെയും തുല്യതുകയ്ക്ക് രണ്ടുപേരുടെ ഉറപ്പിലുമാണ് ജാമ്യം. കുറ്റപത്രം സമര്പ്പിക്കും വരെയോ മൂന്നു മാസം വരെയോ അന്വേഷണ ഉദ്യോഗസ്ഥന് മുന്നില് ഹാജരാകണം. ജയില് മോചിതനായി ഏഴു ദിവസത്തിനകം പാസ്പോര്ട്ട് കോടതിയില് സമര്പ്പിക്കണം. സാക്ഷികളെ സ്വാധീനിക്കാനോ ഭീഷണിപ്പെടുത്താനോ ശ്രമിക്കരുതെന്നും നിര്ദ്ദേശമുണ്ട്.
വിദേശത്തേയ്ക്ക് ഡോളര് കടത്തിയെന്ന കേസില് ശിവശങ്കറിനെ കസ്റ്റഡിയില് കിട്ടാന് കസ്റ്റംസ് അപേക്ഷ സമര്പ്പിച്ചു. ഒന്നരക്കോടി രൂപയുടെ ഡോളര് കടത്തില് ശിവശങ്കറിന്റെ പങ്കിന് ശക്തമായ തെളിവുണ്ടെന്നും കസ്റ്റംസ് അറിയിച്ചു. ബുധനാഴ്ച ശിവശങ്കറിനെ കോടതിയില് ഹാജരാക്കാന് കോടതി ഉത്തരവിട്ടു.
ബുധനാഴ്ച ശിവശങ്കറിനെ സംബന്ധിച്ച് നിര്ണായകമാണ്. സ്പീക്കര് പി. ശ്രീരാമകൃഷ്ണനെ ചോദ്യം ചെയ്യുന്നതു വരെയെങ്കിലും ശിവശങ്കറെ പുറത്തിറക്കാന് കസ്റ്റംസ് അനുവദിക്കുകയില്ല. തെളിവുകള് ചോരുമെന്ന കാരണം പറഞ്ഞ് ശിവശങ്കറെ പൂട്ടാനായിരിക്കും കസ്റ്റംസ് നോക്കുക. ഏതായാലും എന്തുണ്ടാകുമെന്ന് ഉടനറിയാം.
"
https://www.facebook.com/Malayalivartha
