ആ ഒരു വിഷമം മാത്രം... ഇരുപത്തയ്യായിരത്തിലധികം സിനിമാഗാനങ്ങള് ഏഴായിരത്തിലധികം ഗാനങ്ങള്; മലയാളികളുടെ പ്രിയ ഗായിക കെ.എസ്. ചിത്രയ്ക്ക് പദ്മഭൂഷണ് ലഭിച്ചതോടെ അഭിനന്ദന പ്രവാഹം; മാനം മുട്ടെ അഭിമാനവുമായി ചിത്ര കുതിക്കുമ്പോള് കൂപ്പുകൈയ്യോടെ നന്ദിയറിയിച്ച് ചിത്ര
മലയാളികളുടെ പ്രിയഗായിക കെ.എസ്. ചിത്രയെ പദ്മഭൂഷണ് പുരസ്കാരം നല്കി രാജ്യം ആദദിക്കുമ്പോള് മലയാളികള്ക്കാകെ അഭിമാനമാണ്. കേരളത്തിന്റെ വാനമ്പാടി എന്നറിയപ്പെടുന്ന ചിത്ര, തെന്നിന്ത്യന് ഭാഷകളിലും ഹിന്ദി, ബെംഗാളി, അസമീസ് ഭാഷകളിലുമായി ഇരുപത്തയ്യായിരത്തിലധികം സിനിമാഗാനങ്ങള് പാടിയിട്ടുണ്ട്. ഇതിനു പുറമേ ഏഴായിരത്തിലധികം ഗാനങ്ങളും ആലപിച്ചിട്ടുണ്ട്.
മികച്ച പിന്നണി ഗായികയ്ക്കുള്ള ദേശീയ പുരസ്കാരം ആറ് തവണ ലഭിച്ച ചിത്രക്ക് വിവിധ സംസ്ഥാന സര്ക്കാരുകളുടെ പുരസ്കാരവും ലഭിച്ചിട്ടുണ്ട്. 2005ല് ചിത്രയ്ക്ക് പദ്മശ്രീ പുരസ്കാരം നല്കി ആദരിച്ചു.
പുരസ്കാരം ലഭിച്ചതില് ഒരുപാട് സന്തോഷമെന്ന് തൊഴുകൈയ്യോടെ ചിത്ര പറഞ്ഞു. അപ്രതീക്ഷിതമായി ഒരു സന്തോഷം കിട്ടിയതു പോലെയാണിത്. ഗവണ്മെന്റിനും പ്രോത്സാഹനം നല്കിയവര്ക്കും സംഗീതപ്രേമികള്ക്കും നന്ദിയെന്നും അവര് പറഞ്ഞു. സിനിമയില് പാടിപ്പിച്ചവരും പ്രോത്സാഹനം തന്നവരുമായ പ്രൊഡ്യൂസേഴ്സ്, ഡയറക്ടര്മാര്, മ്യൂസിക് ഡയറക്ടര്മാര്, ഗാനരചയിതാക്കള്, റെക്കോഡിസ്റ്റ് വരെ എല്ലാവര്ക്കും പുരസ്കാരം സമര്പ്പിക്കുന്നെന്നും ചിത്ര പറഞ്ഞു.
എനിക്ക് പുരസ്ക്കാരം ലഭിച്ചു എന്നതു പോലെ തന്നെ മനസ്സിനു സന്തോഷം നല്കുന്ന കാര്യമാണ് എസ്.പി.ബി. സാറിനും കൈതപ്രം തിരുമേനിക്കും രാജ്യത്തിന്റെ ആദരം ലഭിച്ചു എന്നത്. ഈ അവസരത്തില് സന്തോഷം നേരിട്ടറിയാക്കാന്, ഏറ്റുവാങ്ങാന് എസ്.പി.ബി സാര് നമുക്കൊപ്പമില്ലല്ലോ എന്നതില് വിഷമമുണ്ടെന്നും ചിത്ര പറഞ്ഞു.
ഇന്നലെ രാത്രിയാണ് പദ്മ പുരസ്കാരങ്ങള് പ്രഖ്യാപിച്ചത്. ജപ്പാന് മുന്പ്രധാനമന്ത്രി ഷിന്സോ ആബെ(പബ്ലിക് അഫയേഴ്സ്), അന്തരിച്ച ഗായകന് എസ്.പി. ബാലസുബ്രഹ്മണ്യം(കല) തുടങ്ങി ഏഴുപേര്ക്ക് പദ്മവിഭൂഷണ്.
മലയാളിയുടെ പ്രിയഗായിക ഗായിക കെ.എസ്.ചിത്ര ഉള്പ്പെടെ 10 പേരാണ് ഇത്തവണ പദ്മഭൂഷണ് പുരസ്കാരത്തിന് അര്ഹരായത്. തരുണ് ഗൊഗോയ്(പബ്ലിക് അഫയേഴ്സ്)ക്കും രാം വിലാസ് പസ്വാനും(പബ്ലിക് അഫയേഴ്സ്) കാല്ബേ സാദിഖിനും കേശുഭായ് പട്ടേലിനും(പബ്ലിക് അഫയേഴ്സ്) മരണാനന്തര ബഹുമതിയായി പദ്മഭൂഷണ് പ്രഖ്യാപിച്ചിട്ടുണ്ട്.
ചന്ദ്രശേഖര് കംബറ(ലിറ്ററേച്ചര് ആന്ഡ് എജ്യുക്കേഷന്), സുമിത്ര മഹാജന്(പബ്ലിക് അഫയേഴ്സ്), നൃപേന്ദ്ര മിശ്ര(സിവില് സര്വീസ്), രജനികാന്ത് ദേവിദാസ് ഷ്റോഫ്(ട്രേഡ് ആന്ഡ് ഇന്ഡസ്ട്രി), തര്ലോചന് സിങ്(പബ്ലിക് അഫയേഴ്സ്) എന്നിവരാണ് പദ്മ ഭൂഷണ് പുരസ്കാരത്തിന് അര്ഹരായ മറ്റുള്ളവര്.
കേരളത്തില്നിന്നു ഗാനരചയിതാവ് കൈതപ്രം ദാമോദരന് നമ്പൂതിരി, കായിക പരിശീലകന് മാധവന് നമ്പ്യാര്, ബാലന് പൂതേരി, തോല്പാവക്കൂത്ത് കലാകാരന് കെ.കെ. രാമചന്ദ്ര പുലവര്, ഡോക്ടര് ധനഞ്ജയ് സുധാകര് എന്നിവര് പദ്മശ്രീ പുരസ്കാരത്തിന് അര്ഹരായി. 102 പേരാണ് ഇത്തവണ പദ്മശ്രീ പുരസ്കാരത്തിന് അര്ഹരായത്.
ക്ഷേത്രങ്ങളുമായി ബന്ധപ്പെട്ട ഐതിഹ്യങ്ങള് ശേഖരിച്ച് പുസ്തകങ്ങളായി പ്രസിദ്ധീകരിച്ച, കാഴ്ചശക്തി ഇല്ലാത്ത വ്യക്തിയാണ് ബാലന് പൂതേരി. മഹാരാഷ്ട്രയിലെ നാഗ്പുര് സ്വദേശിയാണ് ഡി.എസ്. സുഖ്ദേവ്, 1980ല് വയനാട്ടിലെത്തിയ ഇദ്ദേഹം സിക്കിള്സെല് അനീമിയ രോഗികളുള്പ്പടെയുള്ള ആദിവാസികളെ വര്ഷങ്ങളായി ചികിത്സിച്ചു വരികയാണ്.
"
https://www.facebook.com/Malayalivartha