തിരുവനന്തപുരം ജില്ലയിലെ കോവിഡ് പ്രതിരോധ പ്രവര്‍ത്തനങ്ങള്‍ ശക്തിപ്പെടുത്തുന്നതിന്റെ ഭാഗമായി കോവിഡ് 19 പ്രതിരോധത്തില്‍ സര്‍ട്ടിഫിക്കറ്റ് കോഴ്സിനു ജില്ലയില്‍ തുടക്കമായി. തിരുവനന്തപുരം ജില്ലാ ദുരന്ത നിവാരണ അതോറിറ്റിയും ആരോഗ്യ കേരളം പരിശീലന വിഭാഗവുമായി ചേര്‍ന്നു നടത്തുന്ന പദ്ധതി ആരോഗ്യ മന്ത്രി കെ.കെ. ശൈലജ ടീച്ചര്‍ ഉദ്ഘാടനം ചെയ്തു.

'പ്രൊജക്ട് സുരക്ഷ' എന്ന പേരിലാണ് സര്‍ട്ടിഫിക്കറ്റ് കോഴ്സ് ആരംഭിക്കുന്നത്. കോവിഡ് പ്രതിരോധത്തില്‍ തിരുവനന്തപുരം ജില്ലാ ഭരണകൂടത്തിന്റെ പ്രവര്‍ത്തനങ്ങള്‍ മാതൃകാപരമാണെന്ന് ഉദ്ഘാടന ചടങ്ങില്‍ മന്ത്രി പറഞ്ഞു. രോഗികളുടെ എണ്ണം കുറയുന്നുണ്ടെങ്കിലും ജാഗ്രത കൈവിടരുത്.

ജനങ്ങള്‍ക്കിടയില്‍ ബോധവത്കരണം തുടരേണ്ടതും ആവശ്യമാണ്. ജില്ലാ ഭരണകൂടത്തിന്റെ പുതിയ ഉദ്യമത്തിലൂടെ സന്നദ്ധ പ്രവര്‍ത്തകര്‍ക്ക് പൊതുജന ബോധവത്കരണത്തിനുള്ള നേതൃപാടവം ആര്‍ജിക്കാന്‍ കഴിയും.

കോവിഡ് പ്രതിരോധത്തില്‍ സന്നദ്ധ പ്രവര്‍ത്തകര്‍ വലിയ പിന്തുണയാണു സര്‍ക്കാരിനു നല്‍കിയതെന്നും മന്ത്രി പറഞ്ഞു. ജില്ലാ സന്നദ്ധ സേനയിലെ വൊളന്റിയര്‍മാര്‍ക്കായാണ് ആദ്യ ഘട്ട കോഴ്സ്. രണ്ടാം ഘട്ടത്തില്‍ പൊതുജനങ്ങള്‍ക്കും ചേരാം.

രജിസ്റ്റര്‍ ചെയ്യുന്നവര്‍ക്ക് ഓണ്‍ലൈനായി പഠനം പൂര്‍ത്തിയാക്കാനാകും. പരിശീലനം പൂര്‍ത്തിയാക്കുന്നവരെ കോവിഡ് പ്രതിരോധ പ്രവര്‍ത്തനങ്ങളില്‍ വിന്യസിക്കും. കോവിഡിനെക്കുറിച്ചുള്ള അടിസ്ഥാന വിവരങ്ങള്‍, പകര്‍ച്ചവ്യാധി നിയന്ത്രണവും തടയലും, സമൂഹത്തിനു മാനസിക സഹായം നല്‍കല്‍, പള്‍സ് ഓക്സി മീറ്റര്‍, ഇന്‍ഫ്രാറെഡ് തെര്‍മോമീറ്റര്‍ എന്നിവയുടെ ഉപയോഗം തുടങ്ങിയ വിഷയങ്ങളിലാകും പരീശീലനം നല്‍കുക. 20 മുതല്‍ 45 മിനിറ്റ് വരെ ദീര്‍ഘ്യമുള്ള എട്ടു സെഷനുകളിലായാണു കോഴ്സ് നടക്കുക.

ആരോഗ്യ മന്ത്രിയുടെ ഓഫിസില്‍ നടന്ന ചടങ്ങില്‍ ആരോഗ്യ വകുപ്പ് പ്രിന്‍സിപ്പല്‍ സെക്രട്ടറി ഡോ. രാജന്‍ ഖോബ്രഗഡെ, ദേശീയ ആരോഗ്യ ദൗത്യം സ്റ്റേറ്റ് ഡയറക്ടര്‍ ഡോ. രത്തന്‍ ഖേല്‍ക്കര്‍, ജില്ലാ കളക്ടര്‍ ഡോ. നവ്ജ്യോത് ഖോസ, ജില്ലാ ഡെവലപ്മെന്റ് കമ്മിഷണര്‍ ഡോ. വിനയ് ഗോയല്‍, ജില്ലാ മെഡിക്കല്‍ ഓഫിസര്‍ കെ.എസ്. ഷിനു, ദുരന്ത നിവാരണ വിഭാഗം ഡെപ്യൂട്ടി കളക്ടര്‍ ജി.കെ. സുരേഷ് കുമാര്‍ എന്നിവര്‍ പങ്കെടുത്തു.