കൊല്ലത്ത് എംസി റോഡില്‍ ലോവര്‍ കരിക്കത്തിന് സമീപം കാര്‍ സര്‍വീസ് സെന്ററില്‍ തീപിടിത്തം... ഷോര്‍ട്ട് സര്‍ക്യൂട്ടാണ് അപകടകാരണമെന്ന് പ്രാഥമിക നിഗമനം
എംസി റോഡില്‍ ലോവര്‍ കരിക്കത്തിന് സമീപം മുത്തൂറ്റ് ടാറ്റ കാര്‍ സര്‍വീസ് സെന്ററില്‍ തീപിടിത്തം . പത്ത് ലക്ഷത്തോളം രൂപയുടെ നഷ്ടം കണക്കാക്കുന്നു. ഇന്നലെ രാവിലെ പത്ത് മണിയോടെയാണ് സംഭവം നടന്നിരിക്കുന്നത്.
ഷോര്‍ട്ട് സര്‍ക്യൂട്ടാണ് അപകടത്തിന് കാരണമെന്ന് സംശയിക്കുന്നു. പിന്‍ഭാഗത്ത് ആക്രി സാമഗ്രികള്‍ സൂക്ഷിച്ചിരുന്ന മുറിയില്‍ നിന്നാണ് തീ ഉയര്‍ന്നത്. ക്രമേണ മറ്റ് മുറികളിലേക്ക് തീ പടര്‍ന്നു. കെട്ടിട ഭാഗങ്ങളും സ്‌പെയര്‍ പാര്‍ട്‌സുകളും കത്തിയമര്‍ന്നു.
ജീവനക്കാരുടെ വസ്ത്രങ്ങളും ബാഗും സൂക്ഷിച്ച മുറിയിലേക്കും തീ പടര്‍ന്നു. വസ്ത്രങ്ങളും പണവും രേഖകളും അടങ്ങിയ ബാഗുകളും അഗ്‌നിക്കിരയായിരിക്കുകയാണ്. കൊട്ടാരക്കര അഗ്‌നിരക്ഷാസേനയുടെ രണ്ട് യൂണിറ്റുകള്‍ എത്തി തീ കെടുത്തുകയായിരുന്നു.
സമീപ പുരയിടത്തിലേക്കും തീ പടര്‍ന്നു. കൊട്ടാരക്കര അസി. സ്റ്റേഷന്‍ ഓഫിസര്‍ പി.വി.സന്തോഷ്‌കുമാര്‍, ഓഫിസര്‍മാരായ പി.അനില്‍കുമാര്‍, വി.എം.മനോജ്, ജെ.ഷൈന്‍, ഡി.സമീര്‍, പി.പ്രവീണ്‍, ആര്‍.രാജീവ്, സജി ലൂക്കോസ്, എസ്.ആര്‍.രഞ്ജിത്, എം.വി.ശ്രീജേഷ് എന്നിവര്‍ രക്ഷാപ്രവര്‍ത്തനത്തിന് നേതൃത്വം നല്‍കി.
https://www.facebook.com/Malayalivartha
