മീനമാസ പൂജയ്ക്കായി ശബരിമല നടതുറക്കുമ്പോള്‍ ദിവസവും 10,000 പേര്‍ക്ക് ദര്‍ശനം നടത്താമെന്ന് ഹൈക്കോടതി. എന്നാല്‍, വെര്‍ച്വല്‍ ക്യൂ ഒഴിവാക്കണമെന്ന ശബരിമല സ്‌പെഷ്യല്‍ കമ്മിഷണറുടെ ആവശ്യം ജസ്റ്റിസ് സി.ടി. രവികുമാറും ജസ്റ്റിസ് മുരളി പുരുഷോത്തമനും അടങ്ങിയ ദേവസ്വംബെഞ്ച് അംഗീകരിച്ചില്ല.

നിലവില്‍ 5000 പേര്‍ക്കായിരുന്നു ദിവസവും ദര്‍ശനത്തിന് അനുമതി നല്‍കിയിരുന്നത്. ആര്‍.ടി.പി.സി.ആര്‍. പരിശോധനയിലൂടെ കോവിഡ് നെഗറ്റീവ് റിപ്പോര്‍ട്ടുമായിവരുന്ന എല്ലാവരെയും ശബരിമലദര്‍ശനത്തിന് അനുവദിക്കണമെന്നായിരുന്നു ദേവസ്വത്തിന്റെ ആവശ്യം. ഇതും കോടതി അംഗീകരിച്ചില്ല.

വെര്‍ച്വല്‍ ക്യൂവഴി ബുക്ക് ചെയ്തായിരിക്കണം മാര്‍ച്ച് 15-ന് നടതുറക്കുമ്പോഴും എത്തേണ്ടത്. ദര്‍ശനത്തിന് 48 മണിക്കൂറിനുള്ളില്‍ ലഭിച്ച ആര്‍.ടി.പി.സി.ആര്‍. പരിശോധനയിലൂടെയുള്ള കോവിഡ് നെഗറ്റീവ് സര്‍ട്ടിഫിക്കറ്റും കൈവശം ഉണ്ടാകണം. പോലീസിന്റെ നിയന്ത്രണത്തിലൂടെയുള്ള വെബ്‌സൈറ്റ് വഴിയാണ് വെര്‍ച്വല്‍ ക്യൂവിനായി ബുക്കുചെയ്യേണ്ടത്.

ബുക്കിങ് ആരംഭിക്കുന്നയുടനെ 5000 സ്ലോട്ടുകള്‍ പൂര്‍ണമായി ബുക്കുചെയ്യപ്പെടുമെന്നും ഇതില്‍ പാതിയെ ദര്‍ശനത്തിന് എത്തുന്നുള്ളുവെന്നും ശബരിമല സ്‌പെഷ്യല്‍ കമ്മിഷണര്‍ കഴിഞ്ഞദിവസം കോടതിക്ക് റിപ്പോര്‍ട്ട് നല്‍കിയിരുന്നു.

അതിനാല്‍ ഈ ബുക്കിങ് സംവിധാനം ഒഴിവാക്കണമെന്ന് കമ്മിഷണര്‍ കോടതിയെ അറിയിച്ചു.ഇതിന്റെ അടിസ്ഥാനത്തില്‍ എല്ലാ സ്ലോട്ടുകളും ബുക്കുചെയ്യപ്പെടുന്നതിനുപിന്നില്‍ എന്തെങ്കിലും അസ്വഭാവികമായ കാരണങ്ങളുണ്ടോയെന്ന് അറിയിക്കാന്‍ കോടതി സംസ്ഥാന പോലീസ് മേധാവിയോട് ആവശ്യപ്പെട്ടിരുന്നു.

എന്നാല്‍, വെള്ളിയാഴ്ച ഹര്‍ജി പരിഗണിച്ചപ്പോള്‍ പോലീസ് മേധാവിയുടെ ഈ റിപ്പോര്‍ട്ട് കോടതിക്ക് ലഭിച്ചിരുന്നില്ല. മീനമാസപൂജയ്ക്ക് മാര്‍ച്ച് 15-ന് തുറക്കുന്ന ശബരിമലനട ഉത്രംമഹോത്സവവും കഴിഞ്ഞ് മാര്‍ച്ച് 28-നെ അടയ്ക്കൂ.



ദര്‍ശനത്തിന് എത്തുന്നവര്‍ക്ക് നിലയ്ക്കലില്‍ കോവിഡ് പരിശോധന നടത്താനുള്ള സൗകര്യം ഉണ്ടാകും. ഇവിടെനിന്ന് ഒരുമണിക്കൂറിനുള്ളില്‍ റിപ്പോര്‍ട്ട് ലഭിക്കുമെന്നാണ് സ്‌പെഷ്യല്‍ കമ്മിഷണര്‍ കോടതിയെ അറിയിച്ചത്.