ശ്രീനാദേവി കുഞ്ഞമ്മയെ അപമാനിച്ച കേസില് ജാമ്യത്തിലിറങ്ങി വീണ്ടും വീഡിയോ ചെയ്തു
ജില്ലാ പഞ്ചായത്ത് അംഗവും കോണ്ഗ്രസ് നേതാവുമായ ശ്രീനാദേവി കുഞ്ഞമ്മയെ സമൂഹമാധ്യമങ്ങളിലൂടെ വ്യക്തിഹത്യ നടത്തുകയും അപമാനിക്കുകയും ചെയ്ത കേസില് അറസ്റ്റിലായ യൂട്യൂബര് രാജന് ജോസഫിനെതിരെ പൊലീസ് വീണ്ടും കേസെടുത്തു. കഴിഞ്ഞ ദിവസം കോടതിയില് നിന്ന് ജാമ്യം നേടി പുറത്തിറങ്ങിയതിന് പിന്നാലെ, ശ്രീനാദേവി കുഞ്ഞമ്മയെ ലക്ഷ്യമിട്ട് ഇയാള് വീണ്ടും സമൂഹമാധ്യമങ്ങളില് അപകീര്ത്തികരമായ വീഡിയോകള് പ്രചരിപ്പിച്ചതിനെ തുടര്ന്നാണ് ഈ പുതിയ നടപടി.
ശ്രീനാദേവി കുഞ്ഞമ്മ നല്കിയ പുതിയ പരാതിയുടെ അടിസ്ഥാനത്തില് അടൂര് പൊലീസാണ് കേസ് രജിസ്റ്റര് ചെയ്തത്. ഈ കേസില് യൂട്യൂബര് രാജന് ജോസഫിനെ ഒന്നാം പ്രതിയായും, സിബി തോമസ് എന്നയാളെ രണ്ടാം പ്രതിയായും ചേര്ത്താണ് പൊലീസ് എഫ്.ഐ.ആര് ഇട്ടിരിക്കുന്നത്.
നേരത്തെ ശ്രീനാദേവി കുഞ്ഞമ്മ നല്കിയ പരാതിയെ തുടര്ന്ന് ജാമ്യമില്ലാ വകുപ്പ് പ്രകാരം കേസെടുത്തതോടെ രാജന് ജോസഫ് ഒളിവില് പോയിരുന്നു. തുടര്ന്ന് അടൂര് പൊലീസ് നടത്തിയ അന്വേഷണത്തില് ഈ മാസം 11-ന് രാത്രി എറണാകുളത്ത് വെച്ചാണ് ഇയാളെ പിടികൂടിയത്. മലപ്പുറം സ്വദേശിയായ രാജന് ജോസഫിനെതിരെ മറ്റ് ചില പൊലീസ് സ്റ്റേഷനുകളിലും സമാനമായ രീതിയില് കേസുകള് നിലവിലുണ്ട്.
ചൂരല്മല ദുരന്തബാധിതനായ നൗഫലും പരാതി നല്കി
ശ്രീനാദേവി കുഞ്ഞമ്മയുടെ പരാതിക്ക് പുറമേ, വയനാട് ചൂരല്മല ഉരുള്പൊട്ടല് ദുരന്തത്തില് സര്വ്വതും നഷ്ടപ്പെട്ട നൗഫല് എന്ന യുവാവിനെതിരെയും ഈ യൂട്യൂബര് വ്യാജപ്രചരണം നടത്തുന്നതായി പരാതി ഉയര്ന്നിട്ടുണ്ട്. ദുരന്തബാധിതര്ക്കായി ഒരുക്കിയ പുനരധിവാസ ടൗണ്ഷിപ്പിലെ നൗഫലിന്റെ വീടിന്റെ മുകള്ഭാഗത്ത് വിള്ളല് വീണത് വലിയ വാര്ത്തയും വിവാദവുമായിരുന്നു. ഇതിന് പിന്നാലെ നൗഫലിനെ വ്യക്തിപരമായി അധിക്ഷേപിച്ചും വ്യാജ ആരോപണങ്ങള് ഉന്നയിച്ചും രാജന് ജോസഫ് നിരന്തരം യൂട്യൂബ് വീഡിയോകള് ചെയ്യുകയായിരുന്നു.
യൂട്യൂബറുടെ ഈ ക്രൂരമായ വേട്ടയാടല് കാരണം തന്റെ ജീവിതം പൂര്ണ്ണമായും പ്രതിസന്ധിയിലായെന്ന് നൗഫല് തുറന്നുപറഞ്ഞു. ഇയാള് നിരന്തരം ചെയ്യുന്ന അപകീര്ത്തികരമായ വീഡിയോകള് കാരണം തനിക്ക് ജോലിക്ക് പോലും പോകാന് പറ്റാത്ത അവസ്ഥയാണെന്നും, മാനസികാവസ്ഥ തകര്ന്ന നിലയിലാണെന്നും നൗഫല് വ്യക്തമാക്കി. നിരന്തരമായ ഈ അധിക്ഷേപങ്ങള് കാരണം വലിയ മാനഹാനി ഉണ്ടാകുന്നതായി ചൂണ്ടിക്കാണിച്ച് നൗഫല് വയനാട് ജില്ലാ പൊലീസ് മേധാവിക്ക് (എസ്.പി) പരാതി നല്കിയിട്ടുണ്ട്.
https://www.facebook.com/Malayalivartha
