യുഡി എഫിനെ തോല്‍പ്പിക്കാന്‍ ലതികാ സുഭാഷിന് കഴിയുമെന്ന് സി പി എമ്മും കോണ്‍ഗ്രസും കരുതുന്നു. പാര്‍ട്ടിയുടെ കോട്ടയം ജില്ലാ സെക്രട്ടറി വി. എന്‍ . വാസവന്റെ വിജയം സിപി എമ്മിന് അനിവാര്യമാണ്.

വൈപ്പിനില്‍ സീറ്റ് ലഭിച്ചില്ലെങ്കില്‍ താന്‍ ഏറ്റുമാനൂരില്‍ കോണ്‍ഗ്രസ് വിമത സ്ഥാനാര്‍ഥിയായി മസരിക്കുമെന്നും തല മുണ്ഡനം ചെയ്ത് പ്രതിഷേധിക്കുമെന്നും സ്ഥാനാര്‍ത്ഥി പ്രഖ്യാപനത്തിന് മുമ്പ് തന്നെ ലതിക സുഭാഷ് ഉമ്മന്‍ ചാണ്ടി ഉള്‍പ്പെടെയുള്ള നേതാക്കളെ അറിയിച്ചിരുന്നു എന്നാണ് റിപ്പോര്‍ട്ട്. എന്നാല്‍ കോണ്‍ഗ്രസ് നേതാക്കളാരും തന്നെ ലതികയെ സീരിയസായി എടുത്തില്ല. മകന്‍ ചത്താലും വേണ്ടില്ല മരുമകളുടെ താലി അറ്റാല്‍ മതിയെന്ന അമ്മയുടെ നിലപാടാണ് കോണ്‍ഗ്രസ് പിന്തുടരുന്നത്.

സ്ഥാനാര്‍ത്ഥിത്വം നിഷേധിക്കപ്പെട്ടതിനെ തുടര്‍ന്ന് തലമുണ്ഡനം ചെയ്ത് പ്രതിഷേധിച്ച ലതികാ സുഭാഷിന്റെ നടപടിക്ക് പിന്നില്‍ ഗൂഢാലോചന ആരോപിച്ച് കെപിസിസി അധ്യക്ഷന്‍ മുല്ലപ്പള്ളി രാമചന്ദ്രന്‍ രംഗത്തെത്തിയിരുന്നു.. ലതികാ സുഭാഷ് കെപിസിസിക്ക് മുന്നിലെത്തിയത് തിരക്കഥ തയ്യാറാക്കിയാണെന്ന് അദ്ദേഹം പറഞ്ഞു. ചിലരുമായി ഗൂഡാലോചന നടത്തി. ലതിക കോണ്‍ഗ്രസ് പാര്‍ട്ടിക്ക് മുറിവുണ്ടാക്കി. ഈ തിരക്കഥയില്‍ സിപിഎമ്മിന് പങ്കുണ്ട്. മാപ്പ് അര്‍ഹിക്കാത്ത കുറ്റമാണ് ലതിക ചെയ്തത്.

ശാന്തമായിരുന്ന ഏറ്റുമാനൂര്‍ ഇപ്പോള്‍ കലങ്ങി മറിഞ്ഞിരിക്കുകയാണ്. ഒരൊറ്റ ദിവസം കൊണ്ടാണ് ലതിക സുഭാഷ് ഏറ്റുമാനൂരിനെ ശ്രദ്ധാ കേന്ദ്രമാക്കി മാറ്റിയത്. അഭിമാനപുരസരം കോണ്‍ഗ്രസ് സ്ഥാനാര്‍ത്ഥിയെ മുല്ലപ്പള്ളി പ്രഖ്യാപിക്കുന്ന വേള തന്നെയാണ് ലതിക സുഭാഷ് തല മുണ്ഡനത്തിന് തിരഞ്ഞെടുത്തത്. പാര്‍ട്ടി ആസ്ഥാനത്തിന് മുന്നില്‍ അവര്‍ ചരിത്രം സൃഷ്ടിച്ചു. ഇന്ദിരാ ഭവന്‍ മാത്രമല്ല ഹൈക്കമാന്റ് വരെ നടുങ്ങി.

പ്രിന്‍സ് ലൂക്കോസിന് കിട്ടേണ്ട വോട്ടുകള്‍ ലതികക്ക് മറിച്ചു നല്‍കുമെന്ന് കോണ്‍ഗ്രസ് പ്രവര്‍ത്തകര്‍ തന്നെ പറയുന്നു. കേരള കോണ്‍ഗ്രസ് മുന്നണി വിട്ടപ്പോള്‍ ഏറ്റുമാനൂര്‍ തിരികെ കിട്ടുമെന്ന് യു ഡി എഫ് കരുതിയതാണ്. ആ പ്രതീക്ഷ ഇല്ലാതായി. അതിന് പകരം വീട്ടാനുള്ള അവസരമാണ് വന്നുചേര്‍ത്തിരിക്കുന്നത്.

പണ്ട് മുന്‍മന്ത്രി എന്‍. സുന്ദരന്‍ നാടാര്‍ പാറശാലയില്‍ തനിക്ക് ടിക്കറ്റ് നിഷേധിച്ചപ്പോള്‍ ഇത്തരത്തില്‍ പാറശാലയില്‍ നിന്നും റിബലായി മത്സരിച്ച് ജയിച്ചിട്ടുണ്ട്. അതേ കളി തന്നെയാണ് ലതികയും കളിക്കുന്നത്.

മുണ്ഡിത ശിരസുള്ള ലതികയുടെ പോസ്റ്ററുകളാകളാണ് ഇനി മണ്ഡലത്തില്‍ നിറയുക. അതെങ്ങനെ വോട്ടര്‍മാരെ സ്വാധീനിക്കുമെന്ന ഭയം രണ്ട് മുന്നണിക്കുമുണ്ട്. ലതികയുടെ അറ്റകൈ പ്രയോഗത്തില്‍ വെട്ടിലായത് യു.ഡി.എഫും പി.ജെ. ജോസഫ് പക്ഷവുമാണ്.

വൈക്കവും ഏറ്റുമാനൂരും ഇടത് കോട്ടയാണ്. മണ്ഡല പുനരേകീകരണത്തോടെ പഴയ കോട്ടയം സീറ്റിന്റെ സ്വഭാവമാണ് ഏറ്റുമാനൂരിനുള്ളത്. കുമരകം, ആര്‍പ്പുക്കര, അയ്മനം അടക്കം ഇടത് ശക്തികേന്ദ്രങ്ങളായ നാല് പഞ്ചായത്തുകള്‍ ഏറ്റുമാനൂരിന്റെ ഭാഗമായത് ഇടത് കരുത്ത് കൂട്ടി. അതാണ് 2011ല്‍ എല്‍ഡിഎഫിനെ സീറ്റ് തിരിച്ചുപിടിക്കാന്‍ സഹായിച്ചത്.

കോട്ടയത്തെ ഇടതുപക്ഷത്തിന്റെ ഏറ്റവും ജനകീയ മുഖമായ സുരേഷ് കുറുപ്പ് അന്ന് വെറും 1801 വോട്ടിനാണ് ജയിച്ചത്. 2016ല്‍ ഇടത് തരംഗത്തില്‍ ആ ഭൂരിപക്ഷം 8899 ആയി വര്‍ധിച്ചു. 2016ലും ഇന്നത്തെ പോലെ ഒരു റിബല്‍ സ്ഥാനാര്‍ഥിയുണ്ടായിരുന്നു. അതിരപ്പുഴ പഞ്ചായത്ത് പ്രസിഡന്റായിരുന്ന ജോസ്‌മോന്‍ മുണ്ടയ്ക്കല്‍ സീറ്റ് നിഷേധിച്ചതിനെ തുടര്‍ന്ന് കേരള കോണ്‍ഗ്രസ് മാണിയില്‍ നിന്ന് വിമതനായി മത്സരിച്ചു. 3774 വോട്ട് ജോസ്‌മോന്‍ പിടിച്ച് യു.ഡി.എഫ്. പരാജയം ഉറപ്പാക്കി. 3385 വോട്ടുണ്ടായിരുന്ന ബി.ജെ.പി. കഴിഞ്ഞ തവണ ബി.ഡി.ജെ.എസ്. സ്ഥാനാര്‍ഥിയിലൂടെ പിടിച്ചത് 27,540 വോട്ട്.

സുരേഷ് കുറിപ്പിന്റെ വിജയം തുടരേണ്ടത് സി.പി.എമ്മിന് അഭിമാനപ്രശ്‌നം. ഒരു തുടര്‍ഭരണം വിജയം കൂടിയേ തീരൂ. പ്രത്യേകിച്ച് ജില്ലാ സെക്രട്ടറി തന്നെ മത്സരിക്കുന്ന സാഹചര്യത്തില്‍.

ഇടത് വലത് നേര്‍ക്കുനേര്‍ പോരാട്ടം എന്ന ചിത്രം മാറ്റിവരയ്ക്കുന്നതായി ലതികയുടെ വരവ്. പ്രത്യക്ഷത്തില്‍ അവരുടെ സാന്നിധ്യം യു.ഡി.എഫിന്റെ എല്ലാ സാധ്യതയും തകിടം മറിയ്ക്കുമെന്ന് ഉറപ്പ്. ലതിക കളത്തിലിറങ്ങുന്നതോടെ കോണ്‍ഗ്രസ് വോട്ടുകള്‍ അവര്‍ക്ക് അനുകൂലമായി പോയാല്‍ അത്ഭുതപ്പെടാനില്ല.

അതിരമ്പുഴ പഞ്ചായത്തിലും നഗരസഭയിലെ ചിലയിടത്തും ഒഴിച്ചാല്‍ ഏറ്റുമാനൂര്‍ മണ്ഡലത്തില്‍ കേരള കോണ്‍ഗ്രസിന് കാര്യമായ സ്വാധീനമില്ല. ഉള്ള സ്വാധീനമാകട്ടെ ജോസ് കെ മാണിക്ക് മാത്രമാണ്. കോണ്‍ഗ്രസ് വോട്ടുകള്‍ നേടിയെടുക്കാന്‍ യു.ഡി.എഫ്. സ്ഥാനാര്‍ഥി പ്രിന്‍സ് ലൂക്കോസിന് കഴിയുമെന്ന് ആരും കരുതുന്നില്ല. . ഇനി അത് ലതികയ്ക്ക് അനുകൂലമായാല്‍ പ്രിന്‍സ് മൂന്നാം സ്ഥാനത്താകും.

1987ലെ തെരഞടുപ്പില്‍ ജയിച്ചത് കോണ്‍ഗ്രസ് വിമതനാണ് . 2533 വോട്ടിന് വിമതനായ പൊടിപാറ വെന്നിക്കൊടി പാറിച്ചു. യു.ഡി.എഫിന്റെ സ്ഥാനാര്‍ഥിക്ക് കെട്ടിവെച്ച കാശ് പോയി .ഇത് ഇക്കുറിയും ആവര്‍ത്തിക്കുമാ എന്ന് കങ്ങറിയാം.