പോലീസിനെ കബളിപ്പിച്ച്‌ രക്ഷപ്പെടാന്‍ ശ്രമിച്ച പ്രതി ഷോക്കേറ്റ് മരിച്ചു. എറണാകുളത്താണ് സംഭവം. പാലക്കാട് സ്വദേശി രഞ്ജിത്ത് ആണ് മരിച്ചത്. കഞ്ചാവ് കേസുമായി ബന്ധപ്പെട്ടാണ് രഞ്ജിത്തിനെ പോലീസ് പിടികൂടിയത്.

അംബേദ്കര്‍ സ്റ്റേഡിയം പരിസരത്തു നിന്നാണ് എറണാകുളം പോലീസിന് കീഴിലുള്ള പ്രത്യേക സംഘം നാല് കിലോ കഞ്ചാവുമായി രഞ്ജിത്തിനെ പിടികൂടിയത്. ചോദ്യം ചെയ്യുന്നതിനിടെ പോലീസിനെ കബളിപ്പിച്ച്‌ ഇയാള്‍ ഓടിരക്ഷപ്പെടുകയായിരുന്നു. അംബേദ്കര്‍ സ്റ്റേഡിയത്തിന് അകത്തേക്ക് കയറിയ ഇയാള്‍ സ്റ്റെപ്പില്‍ നിന്നും താഴേക്ക് ചാടിയ ശേഷം സമീപത്തെ വൈദ്യുത പോസ്റ്റില്‍ കയറി ലൈന്‍ കമ്ബിയിലേക്ക് കടക്കവെയാണ് ഷോക്കേറ്റത്. അഗ്‌നിശനമ സേനയെത്തിയാണ് രഞ്ജിത്തിന്റെ മൃതദേഹം താഴെയിറക്കിയത്. പോസ്റ്റുമോര്‍ട്ടത്തിനായി മൃതദേഹം ജനറല്‍ ആശുപത്രിയിലേക്ക് മാറ്റി.