തലയുയര്‍ത്തി നിന്ന വലിയ കെട്ടിടം ഒരു നിമിഷം കൊണ്ട് മണ്‍കൂനയായി. മൂവാറ്റുപുഴനഗരത്തിനു സമീപം എം.സി. റോഡരികില്‍ വെള്ളൂര്‍ക്കുന്നത്ത് മലയിടിഞ്ഞു വീണ് മൂന്നുനില കെട്ടിടം തകര്‍ന്നു. ഇന്നലെ പുലര്‍ച്ചെ 5.45 നായിരുന്നു അപകടം. കെട്ടിടത്തില്‍ ആള്‍ത്താമസമില്ലായിരുന്നു. ഏതാനും വ്യാപാരസ്ഥാപനങ്ങള്‍മാത്രമായിരുന്നു ഇതില്‍ പ്രവര്‍ത്തിച്ചിരുന്നത്. കെട്ടിടത്തിന്റ പിന്നിലുണ്ടായിരുന്ന മലയിടിഞ്ഞാണു ദുരന്തം. കെട്ടിടം തകര്‍ന്നു റോഡിലേക്കു പതിച്ച നേരത്ത് ഇതുവഴി യാത്രക്കാരുമായി വന്ന കെ.എസ്.ആര്‍.ടി.സി. അടൂര്‍ സൂപ്പര്‍ഫാസ്റ്റ് ബസ് തലനാരിഴയ്ക്കാണു രക്ഷപ്പെട്ടത്. കെട്ടിടം പൂര്‍ണമായി തകര്‍ന്നതിനു പുറമേ താഴത്തെ നില ഭൂമിയിലേക്കു താഴ്ന്നുപോയതായും സംശയിക്കപ്പെടുന്നു. 12 വര്‍ഷത്തോളം പഴക്കമുള്ള മൂന്നു നിലകെട്ടിടമാണ് മണ്ണടിഞ്ഞത്. ആറായിരം ചതുരശ്ര അടി വിസ്തൃതിയുണ്ടായിരുന്നു. മലയിടിച്ചിലിനൊപ്പം അസ്തിവാരം തകര്‍ന്നതും നാശകാരണമായി. മലയുടെ ഏറ്റവും മുകളിലായി വാട്ടര്‍ അഥോറിറ്റിയുടെ കൂറ്റന്‍ ടാങ്ക് സ്ഥിതിചെയ്യുന്നുണ്ട്. മലയുടെ ഒരുഭാഗത്തെ മണ്ണ് ഒലിച്ചുപോയെങ്കിലും ടാങ്കില്‍ വെള്ളം കുറവായിരുന്നതിനാല്‍ ഇതിനു കേടുപാടുകള്‍ സംഭവിച്ചില്ല. മറിച്ചായിരുന്നെങ്കില്‍ ടാങ്ക് തകര്‍ന്ന് വന്‍ ദുരന്തം സംഭവിക്കുമായിരുന്നെന്നു ചൂണ്ടിക്കാണിക്കപ്പെടുന്നു. വൈദ്യുതിയില്ലാതിരുന്നതിനാലാണ് ടാങ്കില്‍ വെള്ളം നിറയ്ക്കാതിരുന്നത്. 12 ലക്ഷം ലിറ്റര്‍ വെള്ളം കൊള്ളുന്ന ടാങ്കിന്റെ നിലനില്‍പ് മണ്ണിടിഞ്ഞതോടെ ഭീഷണിയിലായി. ജലവിതരണം തടസപ്പെടാനും സാധ്യതയേറെയാണ്. സമീപത്തുള്ള രണ്ട് വൈദ്യുതി പോസ്റ്റുകളും ഒടിഞ്ഞുവീണു.
മൂവാറ്റുപുഴ കാവുംപടി സ്വദേശി രാജന്റേതാണു കെട്ടിടം. ബില്‍ഡിങ്ങിലുണ്ടായിരുന്ന മൂന്നുകടകള്‍ തകര്‍ന്നു. 25 ലക്ഷത്തോളം രൂപയുടെ നഷ്ടമുണ്ടായതായാണ് പ്രാഥമിക നിഗമനം. കുന്നില്‍ ഒരേക്കറോളം സ്ഥലത്ത് മണ്ണിടിച്ചിലുണ്ട്. കുന്നിടിച്ച് ഒരുഭാഗത്തു നടത്തിയ വന്‍ മണ്ണെടുപ്പാണ് മലയിടിച്ചിലിനു കാരണമായതെന്നു കരുതുന്നു. ജല അഥോറിറ്റിയുടെ ടാങ്കില്‍നിന്നുള്ള ഓവര്‍ഫ്‌േളാ ജലം അരിച്ചിറങ്ങി മലയിലെ മണ്ണിനെ ദുര്‍ബലപ്പെടുത്തിയതും മലയിടിച്ചിലിന് മറ്റൊരു കാരണമായി. കെട്ടിടാവശിഷ്ടങ്ങള്‍ പതിച്ചതോടെ എം.സി. റോഡില്‍ മണിക്കൂറുകള്‍ ഗതാഗതം സ്തംഭിച്ചു. കോട്ടയം, തൊടുപുഴ, പെരുമ്പാവൂര്‍ മേഖലകളിലേക്കുള്ള ഗതാഗതമാണ് തടസപ്പെട്ടത്.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha