സംസ്ഥാനത്ത് നാളെയും ശക്തമായ മഴ തുടരാന് സാധ്യത; നാളെ ഏഴ് ജില്ലകളില് ജാഗ്രതാ നിര്ദേശം
സംസ്ഥാനത്ത് നാളെയും ശക്തമായ മഴ തുടരാന് സാധ്യത. തെക്ക് കിഴക്കന് അറബി കടലില് ന്യൂനമര്ദ്ദം രൂപപ്പെടുന്നതിന്റെ ഭാഗമായാണ് മഴ തുടരുന്നത്. നാളെ ഏഴ് ജില്ലകളിലാണ് ജാഗ്രതാ നിര്ദേശം നല്കിയിരിക്കുന്നത്. തിരുവനന്തപുരം, കൊല്ലം, പത്തനംതിട്ട, ആലപ്പുഴ, കോട്ടയം, എറണാകുളം, ഇടുക്കി എന്നീ ജില്ലകളില് യെല്ലൊ അലര്ട്ട് പ്രഖ്യാപിച്ചു.
തെക്ക് കിഴക്കന് അറബിക്കടലില് മേയ് 14 ന് രാവിലെയോടെ ന്യൂനമര്ദം രൂപപ്പെടാന് സാധ്യതയെന്നാണ് കാലാവസ്ഥ വകുപ്പിന്റെ മുന്നറിയിപ്പ്. ലക്ഷദ്വീപിനു സമീപം വടക്ക് പടിഞ്ഞാറു ദിശയില് സഞ്ചരിക്കുന്ന ന്യൂനമര്ദം മേയ് 16 ഓടെ ഈ വര്ഷത്ത ആദ്യത്തെ ചുഴലിക്കാറ്റായി മാറാന് സാധ്യതയുണ്ടെന്നും കേന്ദ്ര കാലാവസ്ഥ വകുപ്പ് അറിയിച്ചു.
തലസ്ഥാന ജില്ലയില് ചൊവ്വാഴ്ച മുതല് പെയ്യുന്ന ശക്തമായ മഴയില് കനത്ത നാശനഷ്ടമാണ് ഉണ്ടായിരിക്കുന്നത്. മഴയ്ക്കൊപ്പമുണ്ടായ ഇടിമിന്നലേറ്റ് ഒരാള് മരിച്ചു. വിവിധ ഭാഗങ്ങളിലായി രണ്ടു വീടുകള് പൂര്ണമായും 26 വീടുകള് ഭാഗീകമായും നശിച്ചു.
അഞ്ചുതെങ്ങ് പഴനട സ്വദേശി സതീഷ്(18) ആണ് ഇടിമിന്നലേറ്റു മരിച്ചത്. തിരുവനന്തപുരം, നെയ്യാറ്റിന്കര, വര്ക്കല താലൂക്കുകളിലായിരുന്നു മഴക്കെടുതിയുടെ രൂക്ഷത ഏറെയും. തിരുവനന്തപുരം താലൂക്കില് ഒരു വീട് പൂര്ണമായും 10 എണ്ണം ഭാഗീകമായും തകര്ന്നു. വര്ക്കല താലൂക്കില് ഒരു വീട് പൂര്ണമായും രണ്ടു വീടുകള് ഭാഗീകമായും തകര്ന്നു. നെയ്യാറ്റിന്കര താലൂക്കില് 14 വീടുകള് ഭാഗീകമായി തകര്ന്നു.
തമ്ബാനൂര് റെയില്വേ സ്റ്റേഷന് പരിസരവും ട്രാക്കും ഉള്പ്പടെ വെള്ളത്തിനടിയിലായി. കെഎസ്ആര്ടിസി ബസ് സ്റ്റാന്ഡ്, എസ് എസ് കോവില് റോഡ്, തിരുവിള വലിയവിള റോഡ് തുടങ്ങിയ സ്ഥലങ്ങള് വെള്ളക്കെട്ടിലായി. തെക്കന് കേരളത്തിന്റെ തീരദേശ മേഖലകളില് കനത്ത മഴയാണ് ഇന്നലെ ലഭിച്ചത്.
https://www.facebook.com/Malayalivartha
