സംസ്ഥാനത്തെ സര്‍ക്കാര്‍, എയ്ഡഡ്, അംഗീകൃത അണ്‍എയ്ഡഡ് പൊതുവിദ്യാലയങ്ങളില്‍ ഒന്നാം ക്ലാസ് പ്രവേശനം ഓണ്‍ലൈനായി ബുധനാഴ്ച ആരംഭിക്കും. ഇത് സംബന്ധിച്ച വിശദ മാര്‍ഗനിര്‍ദേശങ്ങള്‍ വിവരിച്ചുള്ള സര്‍ക്കുലര്‍ പൊതുവിദ്യാഭ്യാസ ഡയറക്ടര്‍ കെ ജിവന്‍ബാബു സ്‌കൂളുകള്‍ക്ക് നല്‍കി.

എട്ട് വരെയുള്ള ക്ലാസുകളിലേക്ക് വിദ്യാഭ്യാസ അവകാശ നിയമപ്രകാരം ആകും പ്രവേശനം ലഭിക്കുക. പുതുതായി സ്‌കൂളില്‍ ചേരാന്‍ രക്ഷിതാക്കകള്‍ക്ക് സമ്പൂര്‍ണ പോര്‍ട്ടലില്‍ (sampoorna.kite.kerala.gov.in) സൗകര്യം ഒരുക്കിയിട്ടുണ്ട്. ഈ സൗകര്യം ഉപയോഗിക്കാനാകുന്നില്ലെങ്കില്‍ പ്രധാനാധ്യാപകര്‍ക്ക് ഫോണ്‍മുഖേനയും രക്ഷിതാക്കളെ വിളിച്ച് വിദ്യാര്‍ഥികളുടെ പ്രവേശന നടപടികള്‍ പൂര്‍ത്തിയാക്കാം. അനുബന്ധരേഖകളും മറ്റ് വിശദാംശങ്ങളും ലോക്ഡൗണ്‍ പിന്‍ലിച്ചശേഷം സ്‌കൂളുകളിലെത്തിച്ചാല്‍ മതി. ലോക് ഡൗണ്‍ പിന്‍ലവിച്ചശേഷവും കുട്ടികളെ സ്‌കൂളില്‍ ചേര്‍ക്കാം.

ലോക്ക് ഡൗൺ സമയത്ത് അഡ്മിഷൻ നേടുന്ന കുട്ടികളുടെ അനുബന്ധരേഖകളും മറ്റു വിശദാംശങ്ങളും ലോക്ക് ഡൗൺ പിൻവലിച്ച ശേഷം സ്കൂളുകളിൽ എത്തിച്ചാൽ മതിയാകും. മറ്റു സംസ്ഥാനങ്ങളിൽ നിന്നോ , വിദേശ രാജ്യങ്ങളിൽ നിന്നോ വന്ന കുടുംബത്തിലെ കുട്ടികളുടെ അനുബന്ധരേഖകളും മറ്റു വിശദാംശങ്ങളും കുറവുണ്ടെങ്കിൽ പോലും കുട്ടികളെ സ്കൂളിൽ പ്രവേശിപ്പിക്കാം.

സ്കൂൾ മാറണമെന്ന് ഉള്ളവർക്കും സ്കൂളുകളിൽനിന്ന് ടി സി ലഭിക്കും. ടി സിക്ക് ആയുള്ള അപേക്ഷയും ഓൺലൈനായി സമർപ്പിക്കാവുന്നതാണ്. കുട്ടികളുടെ സ്ഥാനക്കയറ്റ നടപടികൾ ഈ മാസം 25 നകം പൂർത്തിയാക്കണമെന്നും പൊതു വിദ്യാഭ്യാസ വകുപ്പ് പുറത്തിറക്കിയ സർക്കുലറിൽ പറയുന്നു.

ഒന്നാം ക്ലാസ് മുതൽ എട്ടാം ക്ലാസ് വരെയുള്ള മുഴുവൻ കുട്ടികളെയും വിദ്യാഭ്യാസ അവകാശ നിയമത്തിന്റെ അടിസ്ഥാനത്തിലും ഒമ്പതാം ക്ലാസുകാരെ നിലവിലെ പ്രത്യേക സാഹചര്യത്തിന്റെ അടിസ്ഥാനത്തിലും തൊട്ടടുത്ത ക്ലാസിലേക്ക് ജയിപ്പിക്കും

കുട്ടികളുടെ സ്ഥാനക്കയറ്റ നടപടികൾ അധ്യാപകർ വീടുകളിൽ ഇരുന്ന് തന്നെ പൂർത്തിയാക്കേണ്ടതാണ്. അതുപോലെ സ്ഥാനക്കയറ്റം ലഭിച്ച വിദ്യാർഥികളെ അതാത് ക്ലാസ് ടീച്ചർമാർ ഫോൺ വഴി ബന്ധപ്പെട്ട് കുട്ടികളുടെ വൈകാരിക പാശ്ചാത്തലം, അക്കാദമിക് നില എന്നിവ സംബന്ധിച്ച് വിശദമായി സംസാരിക്കണം

ഡിജിറ്റല്‍ ക്ലാസുകളിലൂടെ നടത്തിയ പഠന പ്രവര്‍ത്തനങ്ങള്‍ അവലോകനം ചെയ്യുന്നത് മെയ് 30 നകം അധ്യാപകര്‍ പൂര്‍ത്തിയാക്കണം. ഇത് സംബന്ധിച്ച റിപ്പോര്‍ട്ട് പ്രധാനാധ്യാപകര്‍ക്ക് നല്‍കണം. അവര്‍ ബന്ധപ്പെട്ട ഉപജില്ല/ ജില്ലാ വിദ്യാഭ്യാസ ഓഫീസര്‍മാര്‍ക്ക് സമര്‍പപിക്കണം. തുടര്‍ന്ന് ഇവ ഉപഡയറക്ടര്‍മാര്‍ മുഖാന്തിരം ഇ മെയില്‍ വഴി (supdtqip@kerala.gov.in) പൊതുവിദ്യാഭ്യാസ ഡയറക്ടറുടെ ഓഫീസിലേക്ക് അയയ്ക്കണം എന്നും പറയുന്നു .