ഗൂഡല്ലൂരിലെയും നാടുകാണിയിലെയും മലനിരകളിലേക്ക് സഞ്ചാരികളുടെ ഒഴുക്ക്... നീലനിറം പടർത്തി മലഞ്ചെരിവുകളിൽ പൂത്തുനിൽക്കുന്ന മേട്ടുക്കുറിഞ്ഞിയാണ് കഴിഞ്ഞ ദിവസങ്ങളിലായി ഗൂഡല്ലൂരിലെയും നാടുകാണിയിലെയും മലനിരകളിലേക്ക് സഞ്ചാരികളെ ആകർഷിക്കുന്നത്.

ആറു വർഷത്തിലൊരിക്കൽ മാത്രം വിരിയുന്ന ഈ അപൂർവ പുഷ്പം കാണാൻ കേരളത്തിൽ നിന്നടക്കം നൂറുകണക്കിന് ആളുകളാണ് ദിനംപ്രതി ഇവിടേക്ക് എത്തുന്നത്. എന്നാൽ മേട്ടുക്കുറിഞ്ഞിയെ നീലക്കുറിഞ്ഞിയെന്ന് തെറ്റിദ്ധരിച്ച് പൂക്കളും ചെടികളും പറിച്ചെടുക്കുന്ന പ്രവണത വർധിച്ചതോടെ തമിഴ്നാട് വനംവകുപ്പ് കർശന നിയന്ത്രണങ്ങളുമായി രംഗത്തെത്തി. മേട്ടുക്കുറിഞ്ഞി നശിപ്പിക്കുന്നവർക്ക് 25,000 രൂപ വരെ പിഴ ചുമത്തുമെന്നും വനംവകുപ്പ് അടിയന്തര മുന്നറിയിപ്പ് നൽകിയിരിക്കുകയാണ്.