ലോക്ക്ഡൗണിനിടെ വ്യാജവാറ്റ് വ്യാപകമാവുന്നു; ആര്യനാട് മാത്രം ഒരാഴ്ച്ചക്കുളളില്‍ രണ്ടായിരം ലിറ്റര്‍ കോട പിടികൂടി; ബാറുകളും ബിവറേജസ് ഔട്ട്‌ലെറ്റുകളും കള്ളുഷാപ്പും പൂട്ടിയതോടെയാണ് വ്യാജവാറ്റ് വീണ്ടും വ്യാപകമായി
തിരുവനന്തപുരം ജില്ലയില്‍ ട്രിപ്പിള്‍ ലോക്ഡൗണ്‍ ആണ്. എന്നാല്‍ ഈ ലോക്ക്ഡൗണിന്റെ മറവിലും വ്യാപകമായി വ്യാജ വാറ്റ് നടക്കുന്നതായിയാണ് എക്‌സൈസിന് ലഭിക്കുന്ന വിവരം. കഴിഞ്ഞ ഒരാഴ്ച്ചക്കുളളില്‍ രണ്ടായിരം ലിറ്റര്‍ കോടയാണ് ആര്യനാട് മാത്രം എക്‌സൈസ് പിടികൂടിയത്. വിളപ്പില്‍ ശാലയില്‍ വാറ്റുപകരണങ്ങളുമായി യുവാവ് പിടിയിലായി.
ബാറുകളും ബിവറേജസ് ഔട്ട്‌ലെറ്റുകളും കള്ളുഷാപ്പും പൂട്ടിയതോടെയാണ് ജില്ലയില്‍ വ്യാജവാറ്റ് വീണ്ടും വ്യാപകമായതെന്നാണ് എക്‌സൈസ് സംഘം ആരോപിക്കുന്നത്. ഇവ പൂട്ടിയപ്പോള്‍ മുതല്‍ തന്നെ എക്‌സൈസ് സംഘം ജാഗ്രത കാട്ടിയിരുന്നു. ഇതോടെയാണ് വ്യാജ വാറ്റ് നിര്‍മ്മാണം വ്യാപകമായി പിടികൂടാന്‍ എക്‌സൈസിനെ സഹായിച്ചത്. മണ്ണൂര്‍ക്കര മലവിള കോളനിയില്‍ നിന്ന് 800 ലിറ്റര്‍ കോടയാണ് എക്‌സൈസ് ഇന്നലെ പിടിച്ചെടുത്തത്. കട്ടിയുളള പോളിത്തീന്‍ കവറില്‍ മൂന്നിടങ്ങളിലായി സൂക്ഷിച്ച നിലയിലായിരുന്നു ഇത്. പെയിന്റ് ടിന്നിലും കുടങ്ങളിലുമായി സൂക്ഷിച്ചിരുന്ന കോടയും എക്‌സൈസ് കണ്ടെത്തി നശിപ്പിച്ചു.
പ്രതികള്‍ക്കായുള്ള അന്വേഷണം പുരോഗമിക്കുകയാണെന്ന് എക്‌സൈസ് അറിയിച്ചു. ആളൊഴിഞ്ഞ പുരയിടങ്ങളും കെട്ടിടങ്ങളിലുമാണ് വ്യാജവാറ്റ് നടക്കുന്നത്. കരമനയാറിന്റെ തീരത്തും വ്യാജവാറ്റ് നടക്കുന്നതായി ആക്ഷേപമുണ്ട്. വിളപ്പില്‍ശാല ചെറുകോടിയില്‍ 100 ലിറ്റര്‍ കോടയും വാറ്റുപകരണങ്ങളുമായി യുവാവ് പിടിയിലായി. ചെറുകോട് കുന്നുമല സ്വദേശി പ്രസാദിനെയാണ് വിളപ്പില്‍ശാല പൊലിസ് പിടികൂടിയത്. ഇയാളുടെ സ്‌കൂട്ടറും പൊലിസ് പിടിച്ചെടുത്തു. വ്യാജവാറ്റ് കൂടുതലുളള സ്ഥലങ്ങളില്‍ പരിശോധന കര്‍ശനമാക്കിയെന്ന് എക്‌സൈസ് അറിയിച്ചു.
https://www.facebook.com/Malayalivartha
