നിയുക്ത ദേവസ്വം മന്ത്രി കെ.രാധാകൃഷ്​ണന്‍ കേരളത്തിലെ ആദ്യത്തെ ദലിത്​ ദേവസ്വം മന്ത്രിയാണെന്നത്​ തെറ്റായ പ്രചാരണമാണെന്ന്​ യൂത്ത്​കോണ്‍ഗ്രസ്​ നേതാവ്​ രാഹുല്‍ മാങ്കൂട്ടത്തില്‍. ശ്രീ കെ രാധാകൃഷ്​ണന്‍ ഇന്ന് ദേവസ്വം വകുപ്പ് മന്ത്രിയായതിനെ ചരിത്രത്തിലെ ആദ്യ നിമിഷമെന്ന് പറയുന്ന അല്‍പ്പജ്ഞാനികളെ ചില പേരുകള്‍ അഭിമാനത്തോടെയും സന്തോഷത്തോടെയും ഓര്‍മ്മിപ്പിക്കം., വെള്ള ഈച്ചരന്‍, കെ. കെ ബാലകൃഷ്​ണന്‍, ദാമോദരന്‍ കാളാശേരി എന്നിവര്‍ വിവിധ മന്ത്രി സഭകളില്‍ ദേവസ്വം വകുപ്പ്​ കൂടി കൈാര്യം ചെയ്​തിരുന്നു. നിയമസഭയിലെ കൂടുതല്‍ ദലിത് എം.എല്‍.എമാരെ എല്ലാക്കാലവും സ്വന്തമാക്കിയിട്ട് ഈ സഭയില്‍ പോലും 99 ല്‍ 13 പേര്‍ സ്വന്തമായി ഉണ്ടായിട്ട് ഒരൊറ്റ ദളിതനെ മാത്രം മന്ത്രിയാക്കിയിട്ട് നവോത്ഥാന വിപ്ലവം എന് പറയാന്‍ ചില്ലറ തൊലിക്കട്ടി പോരെന്നും രാഹുല്‍ പറഞ്ഞു.

രാഹുല്‍ മാങ്കൂട്ടത്തിലിന്റെ ഫേസ്​ബുക്ക് പോസ്​റ്റ്​

വിമാനം ആദ്യമായി കണ്ടു പിടിച്ചത് റൈറ്റ് സഹോദരന്മാരാണ്, അതും 1903ല്‍. 2021 മെയ് 19ന് ആദ്യമായി വിമാനത്തില്‍ യാത്ര ചെയ്യുന്നയൊരാള്‍ താനാണ് വിമാനം കണ്ട് പിടിച്ചതെന്ന് പറയുന്നതിന്നെ അല്പത്തരമെന്നും, വിവരക്കേടെന്നും അല്ലെ പറയുക?

ശ്രീ കെ രാധാകൃഷ്ണന്‍ ഇന്ന് ദേവസ്വം വകുപ്പ് മന്ത്രിയായതിനെ ചരിത്രത്തിലെ ആദ്യ നിമിഷമെന്ന് പറയുന്ന അല്പജ്ഞാനികളെ ചില പേരുകള്‍ അഭിമാനത്തോടെയും സന്തോഷത്തോടെയും ഓര്‍മ്മിപ്പിക്കാം, വെള്ള ഈച്ചരന്‍, കെ. കെ ബാലകൃഷ്ണന്‍, ദാമോദരന്‍ കാളാശേരി.

1970ല്‍ തൃത്താലയില്‍ നിന്നും 1977ല്‍ വണ്ടൂരില്‍ നിന്നും നിയമസഭയിലെത്തിയ കോണ്‍ഗ്രസ്‌ നേതാവ് വെള്ള ഈച്ചരന്‍ കോണ്‍ഗ്രസ്‌ പ്രതിനിധിയായി അച്ചുതമേനോന്‍ സര്‍ക്കാറില്‍ ദേവസ്വം മന്ത്രിയായിരുന്നു. അതെ മന്ത്രി സഭയില്‍ തന്നെ ദാമോദരന്‍ കാളാശേരിയും ദേവസ്വം മന്ത്രിയായി.

കോണ്‍ഗ്രസ്‌ നേതാവ് കെ. കെ ബാലകൃഷ്ണന്‍ ചേലക്കരയുടെ ജനപ്രതിനിധിയായിരിക്കുമ്ബോഴാണ് ദേവസ്വം വകുപ്പിന്റെ മന്ത്രിയായത്.

ഇന്ന് അതേ ചേലക്കരയില്‍ നിന്നാണ് കെ.രാധാകൃഷ്ണനും ജയിച്ച്‌ മന്ത്രിയാകുന്നത്. പറഞ്ഞ് വന്നത് കോണ്‍ഗ്രസ്സ് 4 പതിറ്റാണ്ടപ്പുറത്ത് ചെയ്ത വിപ്ലവമാണ്, പിണറായിയും പാര്‍ട്ടിയും ഇന്ന് ചെയ്തത്. ആ അയിത്തം നിങ്ങള്‍ ഇന്ന് നീക്കിയതില്‍ സന്തോഷം. ഇനി ആ അയിത്തം മാറേണ്ടത് പോളിറ്റ് ബ്യൂറോയിലാണ്, സഖാവ് A K ബാലനിലൂടെ അതും പരിഹരിക്കുക.

തന്‍്റെ പട്ടിണി കൊണ്ട്,ബാബുവിന്റെ വീട്ടിലെ പട്ടിയാകാനാണ് ആഗ്രഹമെന്ന് പറഞ്ഞ KR നാരായണനെഇന്ത്യയുടെ പ്രഥമ പൗരനായി കൈ പിടിച്ചെത്തിച്ച പാര്‍ട്ടിയുടെ പേര് കോണ്‍ഗ്രസ്സെന്നാണ്. മീരാ കുമാറിനെ ലോക്സഭാ സ്പീക്കറാക്കിയും അത്തരം മാറ്റങ്ങളുടെ തുടര്‍ച്ച ഉറപ്പ് വരുത്തി.

CPIM പോളിറ്റ് ബ്യൂറോ പോലെ ദളിതനെ അനുവദിക്കാതിരുന്ന വൈക്കത്ത് നടവഴികളിലും, ഗുരുവായൂര്‍ അമ്ബലനടയില സത്യഗ്രഹ സമരത്തിന് നേതൃത്വം നടത്തിയതും കോണ്‍ഗ്രസ്സാണ്. പിന്നീട് ദളിതരെ ആ ഗുരുവായൂരില്‍ ദേവസ്വം പ്രസിഡന്‍്റുമാക്കി കോണ്‍ഗ്രസ്സ്.അത് പഴയ കാര്യമെന്ന് പറയുന്നവരോട് മല്ലികാര്‍ജുന ഗാര്‍ഗെയെന്ന ദളിത് നേതാവിനെ പ്രതിപക്ഷ നേതാവാക്കിയതും അതിനു മുന്‍പ് സുപ്രധാനമായ റെയില്‍വേ മന്ത്രി സ്ഥാനം നല്‍കിയ പാര്‍ട്ടിയാണ് കോണ്‍ഗ്രസ്.

രാധാകൃഷ്ണനിലേക്ക് മടങ്ങി വരാം, മന്ത്രിസഭയില്‍ സീനിയറായ, പാര്‍ട്ടി കേന്ദ്ര കമ്മിറ്റിയംഗമായ കെ.രാധാകൃഷ്ണന് ദേവസ്വം നല്‍കിയതിനെ വിപ്ലവമായി വാഴ്ത്തുന്നവരോട് ,ദേവസ്വം വകുപ്പില്‍ ഒരു മന്ത്രിക്കും തന്റെ ഭാവനകള്‍ ഉപയോഗിച്ച്‌ പ്രത്യേകിച്ച്‌ ഒന്നും ചെയ്യാനില്ല. താരതമ്യേന ജൂനിയേഴ്സിനു നല്കിയ വ്യവസായമോ, ധനകാര്യമോ, പൊതുമരാമത്തോ, വിദ്യാഭ്യാസമോ അദ്ദേഹത്തിന്നല്‍കാവുന്നതാണല്ലോ? എന്തേ നല്‍കിയില്ല.

പട്ടികജാതി വകുപ്പിന് കൂടുതല്‍ പ്രാധാന്യം നല്‍കുവാന്‍ മുഖ്യമന്ത്രി നേരിട്ട് കൈകാര്യം ചെയ്യുക എന്ന വിപ്ലവം നടത്തിയ ഒരാളുണ്ട് ചരിത്രത്തില്‍, സാക്ഷാല്‍ K കരുണാകരന്‍.അത്തരം പരിഷ്കാരത്തിന് പിണറായി തയ്യാറാണോ..?നിയമസഭയിലെ കൂടുതല്‍ ദളിത് MLA മാരെ എല്ലാക്കാലവും സ്വന്തമാക്കിയിട്ട്, ഈ സഭയില്‍ പോലും 99 ല്‍ 13 ദളിത് MLA മാര്‍ സ്വന്തമായി ഉണ്ടായിട്ട് ഒരൊറ്റ ദളിതനെ മാത്രം മന്ത്രിയാക്കിയിട്ട് നവോത്ഥാന വിപ്ലവം എന് പറയാന്‍ ചില്ലറ തൊലിക്കട്ടി പോരാ...

ഒരു കുട്ടി ആദ്യമായി നടക്കുമ്ബോള്‍ അതിന് കൗതുകം തോന്നുക സ്വഭാവികം. പക്ഷേ അത് ലോകത്തിലെ ആദ്യത്തെ നടത്തം ആണെന്ന് പറഞ്ഞാല്‍ ഏറെ ദൂരം ഓടിയവര്‍ക്ക് ചിരി വരും....