പിജെ ആര്‍മിയിലും പോരാളി ഷാജിയിലും നിറയെ പാര്‍ട്ടിക്കാരാണ്. ഒന്നിച്ച് നിന്ന് പൊരുതി എതിരാളികളെ മലര്‍ത്തിയടിക്കുന്നവരാണ് രണ്ട് ഗ്രൂപ്പുകാരും. എന്നാല്‍ ഇവര്‍ രണ്ടുപേരും പാര്‍ട്ടിയ്‌ക്കെതിരെ വളരെ പെട്ടന്ന് തിരിഞ്ഞത് വലിയ ക്ഷീണമായി. അതോടെയാണ് അജ്ഞാത ശക്തികള്‍ക്കെതിരെ എഎ റഹീം തന്നെ രംഗത്തെത്തിയത്. ഇതോടെ റഹീമിനെതിരെ പോരാളി ഷാജി പോരാട്ടം തുടങ്ങി.

സൈബര്‍ ഇടങ്ങളില്‍ സി.പി.എമ്മിനും പിണറായി സര്‍ക്കാരിനും ഒരുപോലെ തലവേദനയായി മാറിയ പോരാളി ഷാജിക്കും പി.ജെ. ആര്‍മിക്കുമെതിരേ നിലപാട് കടുപ്പിച്ച് പാര്‍ട്ടി. സൈബര്‍ പ്രചാരണരംഗത്തു സി.പി.എം. സുസജ്ജമാകുന്നതിനു മുമ്പ് പോരാളി ഷാജി ആയിരുന്നു പാര്‍ട്ടിയുടെ പ്രധാന സൈബര്‍മുഖം. എന്നാല്‍, പുതിയ പശ്ചാത്തലത്തില്‍ സൈബര്‍ സഖാക്കള്‍ കൂട്ടത്തോടെ പോരാളി ഷാജിയെ അണ്‍ഫോളോ ചെയ്തുതുടങ്ങി.

പാര്‍ട്ടിക്കെതിരായ വിമര്‍ശനങ്ങള്‍ക്കു പ്രതിരോധം തീര്‍ക്കാനും എതിരാളികളെ ആക്രമിച്ചു വീഴ്ത്താനുമൊക്കെ രാപകലില്ലാതെ പ്രവര്‍ത്തിച്ച പോരാളി ഷാജി വളരെ വേഗമാണ് സ്വീകാര്യത നേടിയത്. എന്നാലിന്ന് പരിശീലനം നേടിയ വളണ്ടിയര്‍മാരും കൃത്യമായ നിരീക്ഷണ സംവിധാനങ്ങളും സമ്പൂര്‍ണ സ്റ്റുഡിയോകളും അടക്കം ഏരിയാതലം മുതല്‍ സി.പി.എമ്മിനു ശക്തമായ സൈബര്‍ സംഘമുണ്ട്. ആ നിലയ്ക്ക്, പോരാളി ഷാജിയെ പോലുള്ള സ്വയംപ്രഖ്യാപിത പാര്‍ട്ടി സൈബര്‍ ഗ്രൂപ്പുകള്‍ ബാധ്യതയാകുമെന്ന തിരിച്ചറിവിലാണ് സി.പി.എം.

പോരാളി ഷാജി എന്ന ഫെയ്‌സ്ബുക്ക് പേജിനു പിന്നില്‍ ഒറ്റയാനാണെന്നതാണ് പാര്‍ട്ടിയുടെ തലവേദന. മുതിര്‍ന്ന നേതാക്കളെയും പാര്‍ട്ടി നിലപാടിനെയും പോരാളി ഷാജി പരസ്യമായി ചോദ്യംചെയ്തു തുടങ്ങുകയും ചെയ്തു. സൗദി അറേബ്യയില്‍നിന്നു നിയന്ത്രിക്കപ്പെടുന്ന ഈ പേജിനു പിന്നില്‍ പ്രവാസി സെയില്‍സ്മാനായ അന്‍വര്‍ എന്ന മലപ്പുറം സ്വദേശിയാണ്. പ്രവാസലോകത്തെ സി.പി.എം. അനുകൂല സംഘടനകള്‍ക്കും പോരാളി ഷാജിയോട് വിയോജിപ്പുണ്ട്.

സൗദി അറേബ്യയില്‍ ഓരോ പ്രവിശ്യയിലും പാര്‍ട്ടിക്ക് ഔദ്യോഗികമായ സംഘടനയുണ്ട്. റിയാദില്‍ കേളി സാംസ്‌കാരികവേദി, ദമാമിലും ജിദ്ദയിലും നവോദയ. പാര്‍ട്ടി നേരിട്ട് നിയന്ത്രിക്കുന്ന വര്‍ഗബഹുജന സംഘടനകളാണിത്. ഇടതുപക്ഷ ആഭിമുഖ്യമുള്ളവര്‍ ഈ സംഘടനകളുമായി ബന്ധപ്പെട്ടാണ് പ്രവാസലോകത്ത് പ്രവര്‍ത്തിക്കുന്നത്.

ഇതിലൊന്നും അംഗമാകാതെ സ്വയം പ്രഖ്യാപിത പാര്‍ട്ടി എന്ന രീതിയിലാണ് അന്‍വറിന്റെ പ്രവര്‍ത്തനമെന്ന് പ്രവാസി സഖാക്കള്‍ക്കിടയില്‍ വിമര്‍ശനമുണ്ട്. 'ഞാനാണ് പാര്‍ട്ടി ' എന്ന പോരാളി ഷാജിയുടെ നിലപാടിനെതിരേ പ്രവാസി സഖാക്കള്‍ നേരത്തേയും പാര്‍ട്ടിയുടെ ശ്രദ്ധ ക്ഷണിച്ചിരുന്നു. അന്നൊക്കെ പോസ്റ്റുകള്‍ പാര്‍ട്ടിക്ക് അനുകൂലമായതിനാല്‍ നേതൃത്വം മൗനം പാലിക്കുകയായിരുന്നു. എന്നാല്‍, ഔദ്യോഗിക നിലപാടിനെതിരായ പോരാളി ഷാജിയുടെ വണ്‍മാന്‍ ഷോ ഇനി അനുവദിക്കരുതെന്ന് പ്രവാസി സഖാക്കള്‍ നേതൃത്വത്തോട് ശക്തമായി ആവശ്യപ്പെട്ടു കഴിഞ്ഞു.

രണ്ടാം പിണറായി സര്‍ക്കാരിലെ മന്ത്രിമാരെ തീരുമാനിച്ച നടപടിയെ അടക്കം ചോദ്യംചെയ്തതാണ് ഷാജിക്കെതിരേ പൊടുന്നനെ എതിര്‍പ്പ് ഉയര്‍ത്തിയത്. കുറ്റിയാടിയിലെ ജനരോഷം കണ്ട് തീരുമാനം തിരുത്തിയതുപോലെ കെ.കെ. ശൈലജ ടീച്ചറെ തിരികെവിളിക്കണമെന്ന് ആവശ്യപ്പെട്ട് ക്യാമ്പെയ്‌നും തുടങ്ങിയതോടെ പേജിനെ തള്ളി പാര്‍ട്ടി രംഗത്തുവന്നു.

കണ്ണൂരിലെ സമ്മുന്നത നേതാവായ പി. ജയരാജന്റെ ഫാന്‍സ് സംഘം നിയന്ത്രിക്കുന്ന പേജാണ് പി.ജെ. ആര്‍മി. പോരാളി ഷാജിയുടെ നിലപാടിന് പി.ജെ. ആര്‍മി പിന്തുണയുമായി രംഗത്തെത്തിയതോടെ രണ്ടിനെയും ഒരുമിച്ച് ഒതുക്കാനാണ് പാര്‍ട്ടി തീരുമാനം. ഇത് എത്ര വിജയിക്കുമെന്ന് കണ്ടറിയാം.