നിര്ണായക നീക്കത്തിലേക്ക്... ബിജെപിയെ വെട്ടിലാക്കി കൊടകര കുഴല്പ്പണക്കവര്ച്ച കേസ്; പോലീസ് നടപടി കടുപ്പിച്ചതോടെ പാര്ട്ടിയിലെ ഒറ്റുകാരും കള്ളന്മാരും ഉടന് പുറത്താകും; കുഴല്പ്പണവുമായി യാതൊരു ബന്ധവുമില്ലെന്ന് ഉറപ്പിച്ച് ബിജെപി; ചോദ്യം ചെയ്യലിന് ഹാജരായില്ലെങ്കില് നടപടിയെന്ന് നേതാക്കള്ക്ക് മുന്നറിയിപ്പ്
ഒറ്റുകാരോ കള്ളന്മാരോ കളിച്ചില്ലെങ്കില് കൊടകര കുഴല്പ്പണം ആരാരുമറിയില്ലായിരുന്നു. ബിജെപിയെ പോലും മുള്മുനയില് നിര്ത്തുന്നതായി ഈ കേസ് മാറി. കുഴല്പ്പണവുമായി യാതൊരു ബന്ധവുമില്ലെന്ന് ഉറപ്പിച്ച് ബിജെപി പറയുമ്പോഴും ബിജെപി നേതാക്കളെ ചോദ്യം ചെയ്യാന് വിളിപ്പിക്കുന്നത് സംഗതി ഗുരുതരമാകും. പാര്ട്ടിക്കുള്ളിലെ ഒറ്റുകാരേയും കള്ളന്മാരേയും പോലീസ് പൊക്കുന്നതോടെ കാര്യങ്ങള് വ്യക്തമാകും.
കൊടകര കുഴല്പ്പണക്കവര്ച്ച കേസില് അന്വേഷണ സംഘത്തിനു മുന്നില് ഹാജരായില്ലെങ്കില് നടപടിയുണ്ടാകുമെന്ന് വ്യക്തമാക്കി മൂന്ന് ബി.ജെ.പി നേതാക്കള്ക്ക് പോലീസ് നോട്ടീസ് അയച്ചു. രണ്ടു ദിവസത്തിനുള്ളില് ഹാജരാകണമെന്നാവശ്യപ്പെട്ടാണ് ബി.ജെ.പി സംഘടനാ ജനറല് സെക്രട്ടറി എം. ഗണേഷ്, സംസ്ഥാന ഓഫീസ് സെക്രട്ടറി ജി. ഗിരീഷ്, ആലപ്പുഴ ജില്ലാ ട്രഷറര് കെ.ജി. കര്ത്ത എന്നിവര്ക്കാണ് പ്രത്യേക അന്വേഷണ സംഘം നോട്ടീസ് അയച്ചത്.
മൂന്നു പേരോടും കേസുമായി ബന്ധപ്പെട്ട വിവരശേഖരണത്തിന് ഹാജരാകണമെന്ന് അന്വേഷണ സംഘം ശനിയാഴ്ച ഫോണിലൂടെ ആവശ്യപ്പെട്ടിരുന്നു. രേഖാമൂലമുള്ള അറിയിപ്പ് കിട്ടാത്തതിനാല് ഇവര് ഹാജരാകുന്നതിന് സാവകാശം തേടി. തുടര്ന്നാണ് നോട്ടീസ് അയച്ചത്.
ബി.ജെ.പി തൃശൂര് ജില്ലാ ജനറല് സെക്രട്ടറി കെ.ആര്. ഹരി, ട്രഷറര് സുജയ് സേനന്, ബി.ജെ.പി മദ്ധ്യമേഖലാ സെക്രട്ടറി കാശിനാഥന് എന്നിവരെ ശനിയാഴ്ച വിളിച്ചുവരുത്തി കേസുമായി ബന്ധപ്പെട്ട വിവരങ്ങള് ശേഖരിച്ചിരുന്നു. ഇതിന്റെ അടിസ്ഥാനത്തിലാണ് എം. ഗണേഷ്, ജി. ഗിരീഷ്, കെ.ജി. കര്ത്ത എന്നിവരോട് ഹാജരാകാനാവശ്യപ്പെട്ടത്.
അന്വേഷണ സംഘത്തിലെ ഒരു വിഭാഗം ആലപ്പുഴ കേന്ദ്രീകരിച്ച് കര്ത്തയെ നിരീക്ഷിക്കുന്നുണ്ട്. നിയമസഭാ തിരഞ്ഞെടുപ്പിന് വിനിയോഗിക്കാന് കൊണ്ടുവന്നതാണ് മൂന്നരക്കോടിയെന്ന് ആരോപണമുണ്ടായിരുന്നു. പണം കൊണ്ടുവന്ന കാര് കൊടകരയില് മറ്റൊരു വാഹനം കൊണ്ട് ഇടിച്ച് തട്ടിക്കൊണ്ട് പോകുകയായിരുന്നു. ഏപ്രില് മൂന്നിനായിരുന്നു സംഭവം. കേസില് 19 പ്രതികളെ അറസ്റ്റ് ചെയ്തു. ഒരുകോടിയോളം രൂപ കണ്ടെടുത്തു. പരാതിക്കാരനായ ധര്മ്മരാജനെയും അദ്ദേഹത്തിന്റെ വെളിപ്പെടുത്തലിന്റെ അടിസ്ഥാനത്തില് യുവമോര്ച്ച മുന് സംസ്ഥാന ട്രഷറര് സുനില് നായികിനെയും വിളിച്ചുവരുത്തി വിവരങ്ങള് ശേഖരിച്ചിരുന്നു.
പണം വന്നത് കര്ണാടകയില് നിന്നാണെന്ന് അന്വേഷണസംഘത്തിന് വ്യക്തമായി. എന്നാല്, പണത്തിന്റെ ഉറവിടം തേടുന്നതിന് കേരള പൊലീസിന് അധികാരമില്ലെന്നും സാമ്പത്തിക കുറ്റാന്വേഷണ വിഭാഗമായ കേന്ദ്ര ഏജന്സികളാണ് അന്വേഷിക്കേണ്ടതെന്നുമാണ് ബി.ജെ.പിക്ക് ലഭിച്ച നിയമോപദേശമെന്നാണ് സൂചന. മറ്റു സംസ്ഥാനങ്ങളുമായി ചേര്ന്നുള്ള അന്വേഷണം വേണമെന്നതിനാല് കേന്ദ്ര ഏജന്സികളെ ഏല്പ്പിച്ചേക്കും.
സംഭവത്തില് പണത്തിന്റെ ഉറവിടം അന്വേഷിക്കണമെന്നാവശ്യപ്പെട്ട് സാമ്പത്തിക കുറ്റാന്വേഷണ വിഭാഗത്തിന് തൃശൂര് വരന്തരപ്പിള്ളി സ്വദേശി ടി.എന്. മുകുന്ദന് പരാതി നല്കി. എന്ഫോഴ്സ്മെന്റ് ഡയറക്ടര് സഞ്ജയ് കുമാര് മിശ്ര, കൊച്ചി സോണല് ജോയിന്റ് ഡയറക്ടര് മനീഷ് ഗോധ്റ എന്നിവര്ക്കാണ് പരാതി നല്കിയത്.
തിരഞ്ഞെടുപ്പിന് ചെലവഴിക്കാന് പണം കടത്തിയത് ഗുരുതരമായ കുറ്റമായി കാണണമെന്നും കള്ളപ്പണം കടത്തല് രാജ്യത്തിന്റെ സമ്പദ് വ്യവസ്ഥയെ തകര്ക്കുമെന്നും പരാതിയിലുണ്ട്. എല്.ജെ.ഡി യുവജന വിഭാഗം സംസ്ഥാന പ്രസിഡന്റ് സലിം മടവൂര് ഇതേ ആവശ്യമുന്നയിച്ച് ഇ.ഡിക്ക് പരാതി നല്കിയിരുന്നെങ്കിലും നടപടിയെടുത്തില്ല.
എന്തായാലും അന്വേഷണം പുരോഗമിക്കുമ്പോള് ചില നേതാക്കള് വിയര്ക്കുക തന്നെ ചെയ്യും.
https://www.facebook.com/Malayalivartha
