എം.ബി. രാജേഷ് ഇനി സഭാനാഥന്; കന്നി പ്രവേശനത്തില് തന്നെ സ്പീക്കര് പദവിലേക്ക്; 23-ാം സ്പീക്കര് തിരഞ്ഞെടുപ്പ് 21-ാം സ്പീക്കര്; 56 വോട്ടിന്റെ ഭൂരിപക്ഷത്തില് പിസി വിഷ്ണുനാഥിനെ പരാജയപ്പെടുത്തി; മൂന്നു പേര് വോട്ടു ചെയ്തില്ല
കേരള നിയമസഭയില് കന്നി പ്രവേശനത്തില് തന്നെ നിയമസഭയുടെ നാഥനായിരിക്കുകയാണ് എം.ബി. രാജേഷ് (50). തൃത്താലയില്നിന്നുള്ള സിപിഎമ്മിന്റെ നിയമസഭാംഗമായ അദ്ദേഹം 10 വര്ഷം ലോക്സഭാംഗമായിരുന്നെങ്കിലും കേരള നിയമസഭയില് പുതുമുഖമാണ്.
നിയമസഭയില് എത്തുമ്പോള് തന്നെ ഒരാള് സ്പീക്കറാകുന്നത് ഇത് മൂന്നാം തവണയാണ്. നിയമസഭയിലെ ആദ്യ അവസരത്തില് സ്പീക്കറായ മറ്റു രണ്ടുപേര് കൂടിയുണ്ട്, ടി.എസ് ജോണ്, എ.സി. ജോസ് എന്നിവരാണ് അവര്. ഇരുവരും എംഎല്എ എന്ന നിലയിലെ ആദ്യ ടേമിന്റെ അവസാന കാലത്താണ് സ്പീക്കറായത്. 4-ാം നിയമസഭയില് അഞ്ചേകാല് വര്ഷം കഴിഞ്ഞ് 1976 ഫെബ്രുവരി 17ന് ടി.എസ്. ജോണും 6-ാം നിയമസഭയില് രണ്ടു വര്ഷം കഴിഞ്ഞ് 1982 ഫെബ്രുവരി 3ന് എ.സി. ജോസും സ്പീക്കര് ആയിട്ടുണ്ട്. യഥാക്രമം കെ. മൊയ്തീന്കുട്ടി ഹാജിയും എ.പി. കുര്യനും രാജിവച്ച ഒഴിവിലാണിത്.
ആകെ 136 അംഗങ്ങളാണ് വോട്ട് രേഖപ്പെടുത്തിയത്. എം.ബി. രാജേഷിന് 96 വോട്ട് ലഭിച്ചു. യുഡിഎഫിന്റെ സ്ഥാനാര്ഥി, കുണ്ടറയില് നിന്നുള്ള കോണ്ഗ്രസ് അംഗം പി.സി. വിഷ്ണുനാഥിന് 40 വോട്ട് ലഭിച്ചു. അറിവും അനുഭവവും സമന്വയിച്ച വ്യക്തിത്വത്തിന്റെ ഉടമയാണ് എം.ബി. രാജേഷ് എന്ന് മുഖ്യമന്ത്രി പിണറായി വിജയന് പറഞ്ഞു. സഭയ്ക്ക് അഭിമാനകരമായ കാര്യമാണിതെന്നും എം.ബി. രാജേഷിനെ അഭിനന്ദിക്കുന്നുവെന്നും മുഖ്യമന്ത്രി പറഞ്ഞു.
ആരോഗ്യ കാരണങ്ങളാല് ഇന്നലെ സത്യപ്രതിജ്ഞ ചെയ്യാന് കഴിയാത്ത മൂന്നു പേര് വോട്ടു ചെയ്തില്ല. രാവിലെ 9ന് വോട്ടെടുപ്പ് ആരംഭിച്ചു. സഭയ്ക്കുള്ളില് സ്പീക്കറുടെ ഇരിപ്പിടത്തിനു പിന്നിലായി സജ്ജീകരിച്ച 2 ബൂത്തുകളില് ബാലറ്റിലൂടെയാണ് അംഗങ്ങള് വോട്ട് രേഖപ്പെടുത്തിയത്. മുഖ്യമന്ത്രി പിണറായി വിജയന് ആദ്യ വോട്ട് രേഖപ്പെടുത്തി.
ഇന്നലെ 53 പുതുമുഖങ്ങള് അടക്കം 136 പേര് പ്രോട്ടെം സ്പീക്കര് പി.ടി.എ. റഹീം മുന്പാകെ സഭാംഗങ്ങളായി സത്യപ്രതിജ്ഞ ചെയ്തു. പി.ടി.എ. റഹീം നേരത്തേ ഗവര്ണര് മുന്പാകെ സത്യപ്രതിജ്ഞ ചെയ്തിരുന്നു. ആരോഗ്യ കാരണങ്ങളാല് മന്ത്രി വി.അബ്ദുറഹിമാന് (താനൂര്), കെ.ബാബു (നെന്മാറ), എം.വിന്സന്റ് (കോവളം) എന്നിവര്ക്ക് എത്താനായില്ല. ഇവര് ഇനി സ്പീക്കറുടെ ചേംബറില് പ്രതിജ്ഞയെടുത്ത് സഭാംഗങ്ങളാകും.
23ാമത്തെ സ്പീക്കര് തിരഞ്ഞെടുപ്പാണ് ഇന്ന് നടക്കുന്നത്. കേരള നിയമസഭയുടെ 21-ാമത്തെ സ്പീക്കര് ആയിട്ടാണ് എം.ബി.രാജേഷ് തിരഞ്ഞെടുക്കപ്പെടുക. വക്കം പുരുഷോത്തമന് (7, 11 നിയമസഭകള്), തേറമ്പില് രാമകൃഷ്ണന് (9, 11 നിയമസഭകള്) എന്നിവര് രണ്ടു തവണ വീതം സ്പീക്കറായിരുന്നതുകൊണ്ടാണ് ഈ വ്യത്യാസം. രണ്ടാം നിയമസഭയില് മൂന്നും 4, 6, 7, 9, 11, 13 നിയമസഭകളില് രണ്ടു വീതവും സ്പീക്കര്മാരുണ്ടായി.
https://www.facebook.com/Malayalivartha