ഡി.ജി.പി ടോമിന്‍ ജെ. തച്ചങ്കരിയെ മലയാളികള്‍ക്കെല്ലാമറിയാം. ഇരുന്ന കസേരകളിലെല്ലാം തന്റെ അധികാരം പ്രയോഗിച്ച ആളാണ്. കെഎസ്ആര്‍ടിസിയെ രക്ഷിക്കാന്‍ തച്ചങ്കരി നടത്തിയ ശ്രമം ആരും മറന്നിട്ടില്ല. യൂണിയന്‍കാരെ നിലയ്ക്കു നിര്‍ത്തി കെഎസ്ആര്‍ടിസിയെ ലാഭത്തിലാക്കി. എന്നാല്‍ ആ യൂണിയന്‍കാര്‍ തന്നെ തച്ചങ്കരിയെ മാറ്റി. ഇപ്പോള്‍ തച്ചങ്കരിക്ക് പുതിയ നിയോഗമാണ് വന്നിരിക്കുന്നത്.

പുതിയ പൊലീസ് മേധാവി സ്ഥാനത്തേക്ക് പരിഗണിക്കുന്നതിനിടെ, ഡി.ജി.പി ടോമിന്‍ ജെ. തച്ചങ്കരിയെ കെ.എഫ്.സി. സി.എം.ഡി സ്ഥാനത്തുനിന്ന് സംസ്ഥാന മനുഷ്യാവകാശ കമ്മിഷനിലേക്ക് മാറ്റി. കമ്മിഷനില്‍ ഡയറക്ടര്‍ ജനറല്‍ ഒഫ് ഇന്‍വെസ്റ്റിഗേഷനെന്ന എക്‌സ് കേഡര്‍ തസ്തിക സൃഷ്ടിച്ചാണ് മാറ്റം. ഒരുവര്‍ഷത്തേക്കാണ് ഈ തസ്തിക സൃഷ്ടിച്ചിരിക്കുന്നത്. ഐ.ജി റാങ്കിലുള്ളവരെയാണ് സാധാരണ മനുഷ്യാവകാശ കമ്മിഷനില്‍ നിയമിക്കുക.

പുതിയ പൊലീസ് മേധാവിയെ തിരഞ്ഞെടുക്കാനുള്ള 12 അംഗ പട്ടിക യൂണിയന്‍ പബ്ലിക് സര്‍വീസ് കമ്മിഷന് സര്‍ക്കാര്‍ കൈമാറി മൂന്നു നാള്‍ കഴിഞ്ഞപ്പോഴാണ് ഈ മാറ്റം. 12 പേരില്‍ മികച്ച 3 പേരുടെ പാനലാണ് കേരളം ആവശ്യപ്പെട്ടിരിക്കുന്നത്. അതില്‍ നിന്നൊരാളെ പൊലീസ് മേധാവിയാക്കും. കൊവിഡ് സാഹചര്യത്തില്‍ യു.പി.എസ്.സി സമിതി ഓണ്‍ലൈനായി യോഗം ചേരാന്‍ വൈകിയാല്‍, നിലവിലെ പൊലീസ് മേധാവി ലോക്‌നാഥ് ബെഹ്‌റ വിരമിക്കുന്ന ജൂണ്‍ 30നു മുമ്പ് താത്കാലിക പൊലീസ് മേധാവിയെ നിയമിച്ചേക്കും. അത് തച്ചങ്കരിയാകാനാണ് സാദ്ധ്യത.

10 വര്‍ഷത്തെ കോണ്‍ഫിഡന്‍ഷ്യല്‍ റിപ്പോര്‍ട്ടുകളിലെ മാര്‍ക്കിന്റെ അടിസ്ഥാനത്തില്‍ തച്ചങ്കരിയാണ് ഒന്നാമന്‍. സ്വത്തു സമ്പാദനത്തിന്റെ പേരില്‍ വിജിലന്‍സ് കേസുണ്ടെങ്കിലും കുറ്റപത്രം നല്‍കിയിട്ടില്ല.

സസ്‌പെന്‍സ് തുടരുന്നുപുതിയ പൊലീസ് മേധാവിയുടെ കാര്യത്തില്‍ സസ്‌പെന്‍സ് തുടരുകയാണ്. 12 പേരില്‍ സീനിയറും ഒന്നാമനുമായ എസ്.പി.ജി ഡയറക്ടര്‍ അരുണ്‍ കുമാര്‍ സിന്‍ഹ കേരള സര്‍വീസിലേക്കു വരാന്‍ സാദ്ധ്യതയില്ലാത്തതിനാലാണ് തച്ചങ്കരിയുടെയും വിജിലന്‍സ് ഡയറക്ടര്‍ സുദേഷ് കുമാറിന്റെയും പേരുകള്‍ സജീവമായത്. വിജിലന്‍സ് കേസോ അന്വേഷണമോ ഇല്ലെന്നതു സുദേഷിന് അനുകൂലമാണ്. പൊലീസ് െ്രെഡവറെ മര്‍ദിച്ച കേസ് സുദേഷിന്റെ മകളുടെ പേരിലാണ്.

30 വര്‍ഷം സര്‍വീസുള്ള 1987 മുതല്‍ 1991 വരെ ബാച്ചുകളിലെ 12 ഉദ്യോഗസ്ഥരാണു പട്ടികയില്‍. അഗ്‌നിരക്ഷാസേന മേധാവി ബി. സന്ധ്യ, അനില്‍കാന്ത് (റോഡ് സേഫ്ടി കമ്മിഷണര്‍), നിതിന്‍ അഗര്‍വാള്‍ (കേന്ദ്ര ഡെപ്യൂട്ടേഷന്‍), എസ്. ആനന്തകൃഷ്ണന്‍ (എക്‌സൈസ് കമ്മിഷണര്‍), കെ. പദ്മകുമാര്‍ (എ.ഡി.ജി.പി, ബറ്റാലിയന്‍), ഷെയ്ഖ് ദര്‍വേശ് സാഹിബ് (ഡയറക്ടര്‍, പൊലീസ് അക്കാഡമി), ഹരിനാഥ് മിശ്ര (കേന്ദ്ര ഡെപ്യൂട്ടേഷന്‍), റവാഡ എ. ചന്ദ്രശേഖര്‍ (കേന്ദ്ര ഡെപ്യൂട്ടേഷന്‍), സഞ്ജീവ് കുമാര്‍ പട്‌ജോഷി (കേന്ദ്ര ഡെപ്യൂട്ടേഷന്‍) എന്നിവരാണ് മറ്റ് 9 പേര്‍.

ഊര്‍ജ വകുപ്പ് സെക്രട്ടറിയായി നിലവില്‍ കെ.ടി.ഡി.എഫ്.സി ചെയര്‍മാനും മാനേജിംഗ് ഡയറക്ടറുമായി പ്രവര്‍ത്തിക്കുന്ന ഡോ.ബി. അശോകിനെ നിയമിച്ച് പൊതുഭരണവകുപ്പ് ഉത്തരവായി. കെ.ടി.ഡി.എഫ്.സി ചെയര്‍മാന്‍ കം മാനേജിംഗ് ഡയറക്ടറുടെ അധികച്ചുമതല കൂടിയുണ്ടാകും. ആയുഷ് വകുപ്പ് സെക്രട്ടറി ഡോ. ഷര്‍മ്മിള മേരി ജോസഫിന് കായികയുവജനക്ഷേമ വകുപ്പിന്റെ പൂര്‍ണ അധികച്ചുമതല കൂടി നല്‍കി.

ധനകാര്യ എക്‌സ്പന്‍ഡിച്ചര്‍ വിഭാഗം സെക്രട്ടറി സഞ്ജയ് എം.കൗളിന് കേരള ഫിനാന്‍ഷ്യല്‍ കോര്‍പ്പറേഷന്റെ ചെയര്‍മാന്‍ കം മാനേജിംഗ് ഡയറക്ടറുടെ പൂര്‍ണ അധികച്ചുമതല നല്‍കി. ആഭ്യന്തര, വിജിലന്‍സ് വകുപ്പ് ഒഴിച്ച് അദ്ദേഹം കൈകാര്യം ചെയ്തുവരുന്ന മറ്റ് അധികച്ചുമതലകള്‍ തുടരും.

കെ എഫ് സിയില്‍ നിന്നും തന്നെ മാറ്റണമെന്ന് തച്ചങ്കരി സര്‍ക്കാരിനോട് ആവശ്യപ്പെട്ടതിന്റെ അടിസ്ഥാനത്തിലാണ് ഇപ്പോഴുള്ള ഈ നടപടിയെന്നാണ് സൂചന. ഇതാദ്യമായാണ് ഡിജിപി റാങ്കിലുള്ള ഒരു ഉദ്യോഗസ്ഥന്‍ മനുഷ്യാവകാശ കമ്മീഷനില്‍ എത്തുന്നത്. എന്തായാലും തച്ചങ്കരിയുടെ ലക്ഷ്യമെന്തെന്ന് ഉടന്‍ വ്യക്തമാകും.