ബൈക്കിന് സൈഡ് നല്‍കാത്തതിനെ ചൊല്ലി തര്‍ക്കം..... അച്ഛനും മകനും ചേര്‍ന്ന് യുവാവിനെ പട്ടാപ്പകല്‍ നടുറോഡില്‍ കുത്തിക്കൊലപ്പെടുത്തി. . കാവനാട് ഓഞ്ചേഴുത്ത് കാവിന് സമീപം ഓഞ്ചേരില്‍ വടക്കതില്‍ വീട്ടില്‍ ഓട്ടോറിക്ഷാ ഡ്രൈവറായ വിഷ്ണുവാണ് (29) ദാരുണമായി കൊല്ലപ്പെട്ടത്.


സംഭവവുമായി ബന്ധപ്പെട്ട് പള്ളിക്കാവില്‍ വാടകയ്ക്ക് താമസിക്കുന്ന കാവനാട് മാര്‍ക്കറ്റിലെ ഇറച്ചിവെട്ട് തൊഴിലാളിയും മധുര സ്വദേശിയുമായ പ്രകാശ്, മകന്‍ രാജപാണ്ഡ്യന്‍ എന്നിവരെ ശക്തികുളങ്ങര പൊലീസ് അറസ്റ്റ് ചെയ്തു.

പള്ളിക്കാവ് ക്ഷേത്രത്തിന് സമീപത്തായി ഇന്നലെ ഉച്ചയ്ക്ക് ഒന്നോടെയായിരുന്നു സംഭവം നടന്നത്. പൊലീസ് പറയുന്നതിങ്ങനെ രാവിലെ പള്ളിക്കാവ് കുരുമ്പോലില്‍ വച്ച് ബൈക്കിന് സൈഡ് നല്‍കിയില്ലന്നാരോപിച്ച് പ്രകാശ് വിഷ്ണുവിനോട് വഴക്കുണ്ടാക്കിയിരുന്നു. തര്‍ക്കത്തിനിടെ സമീപത്തെ കടയില്‍ നിന്നെടുത്ത സോഡാക്കുപ്പി പൊട്ടിച്ച് പ്രകാശ് വിഷ്ണുവിനെ കുത്താന്‍ ശ്രമിച്ചു.


നാട്ടുകാര്‍ തടഞ്ഞ ശേഷം രണ്ടുപേരെയും പറഞ്ഞയച്ചു. വീട്ടിലെത്തിയ പ്രകാശ് മകന്‍ രാജപാണ്ഡ്യനോട് കാര്യം പറയുകയും ഇരുവരും വിഷ്ണുവിനെ തിരക്കി ഇറങ്ങുകയുമായിരുന്നു. പള്ളിക്കാവ് ക്ഷേത്രത്തിനടുത്ത് വച്ച് ബൈക്കില്‍ വരുകയായിരുന്ന വിഷ്ണുവിനെയും സുഹൃത്തിനെയും പ്രകാശും രാജപാണ്ഡ്യനും ചേര്‍ന്ന് തടഞ്ഞുനിറുത്തി.

പ്രകാശ് ഇറച്ചിവെട്ടുന്ന കത്തി ഉപയോഗിച്ച് വിഷ്ണുവിന്റെ നെഞ്ചില്‍ കുത്തിയശേഷം രാജപാണ്ഡ്യനുമായി അവിടെനിന്ന് രക്ഷപ്പെട്ടു. നിലത്തുവീണ വിഷ്ണുവിനെ സുഹൃത്ത് നാട്ടുകാരുടെ സഹായത്തോടെ ജില്ലാ ആശുപത്രിയില്‍ എത്തിച്ചെങ്കിലും വഴിമദ്ധ്യേ മരിച്ചു.


സ്ഥലത്തെത്തിയ പൊലീസ് നായ മണം പിടിച്ച് കാവനാട് അരവിള കടവിലെത്തി. തുടര്‍ന്ന് കൊല്ലം എ.സി.പി ടി.ബി വിജയന്റെ നേതൃത്വത്തിലുള്ള സംഘം നടത്തിയ തെരച്ചിലില്‍ കുരീപ്പുഴ കടവില്‍ നിന്ന് പ്രതികളെ കസ്റ്റഡിയിലെടുത്തു.

പലയിടങ്ങളിലായി വാടകയ്ക്ക് താമസിക്കുന്ന പ്രകാശ് അടുത്തിടെയാണ് പള്ളിക്കാവിലെത്തിയത്. വിഷ്ണുവിന്റെ മൃതദേഹം ഇന്ന് സംസ്‌കരിക്കും. ഭാര്യ: അശ്വതി. മകന്‍: ആദിത്യന്‍.