സംസ്ഥാനത്ത് നടന്ന വന്‍ വനംകൊള്ളയുടെ ഉത്തരവാദിത്വം മുഖ്യമന്ത്രിക്കും മുന്‍ റവന്യൂ-വനം വകുപ്പ് മന്ത്രിമാര്‍ക്കുമെന്ന് ബി.ജെ.പി ദേശീയ നിര്‍വാഹക സമിതിയംഗം പി.കെ. കൃഷ്ണദാസ്. സി.പി.എമ്മും സി.പി.ഐയും സംയുക്തമായി നടത്തിയ നീക്കമാണ് കൊള്ളക്ക് പിന്നില്‍. ഉന്നത ഉദ്യോഗസ്ഥരും വനം മാഫിയയുമായി ചേര്‍ന്നാണ് കൊള്ള നടന്നിട്ടുള്ളതെന്നും കൃഷ്ണദാസ് പറഞ്ഞു. വനംകൊള്ള നടന്ന തൃശൂര്‍ ജില്ലയിലെ പുലക്കോട്, അകമല പൂക്കോട്, പൂമല പ്രദേശങ്ങള്‍ സന്ദര്‍ശിച്ച ശേഷം മാധ്യമങ്ങളോട് സംസാരിക്കുകയായിരുന്നു അദ്ദേഹം.

മരം മുറിക്കാനുള്ള ഉത്തരവ് ഇറക്കാന്‍ സംസ്ഥാന വനം, റവന്യൂ മന്ത്രിമാര്‍ക്ക് അധികാരമില്ല എന്നതാണ് വസ്തുത. ഒന്നാം പിണറായി സര്‍ക്കാറിന്‍റെ കാലഘട്ടത്തില്‍ നടന്ന വനംകൊള്ളയിലൂടെ സമ്ബാദിച്ച അയ്യായിരം കോടി രൂപയുടെ കള്ളപ്പണമാണ് കഴിഞ്ഞ നിയമസഭ തെരഞ്ഞെടുപ്പില്‍ ഇടതു മുന്നണി കേരളത്തില്‍ ഒഴുക്കിയത്.

മുഖ്യമന്ത്രിക്കും മുന്‍ വനം റവന്യു വകുപ്പ് മന്ത്രിമാര്‍ക്കും സി.പി.ഐ, സി.പി.എം കക്ഷികള്‍ക്കും കൊള്ളയില്‍ തുല്യ പങ്ക് ആണുള്ളത്. കളവ് പുറത്തു വന്നപ്പോള്‍ ഉദ്യോഗസ്ഥരുടെ തലയില്‍ കെട്ടിവെക്കാനാണ് സര്‍ക്കാര്‍ ശ്രമിക്കുന്നത്. വനംകൊള്ളയ്ക്ക് സൗകര്യമൊരുക്കാന്‍ കൊള്ള നടന്ന സ്ഥലങ്ങളിലെ നാല് ഫോറസ്റ്റ് ഓഫിസുകള്‍ മുന്‍കൂട്ടി അടച്ച്‌ പൂട്ടിയത് മുഖ്യമന്ത്രിയുടെ അറിവോടുകൂടിയാണ് മരംകൊള്ള നടന്നിട്ടുള്ളത് എന്നതിന് തെളിവാണ്. വീരപ്പനെ പോലും വെല്ലുന്ന വനം കൊള്ളക്ക് നേതൃത്വം നല്‍കിയ മുഖ്യമന്ത്രി കൊള്ളക്കാരുടെ ക്യാപ്റ്റന്‍ ആണെന്നും പി.കെ. കൃഷ്ണദാസ് പറഞ്ഞു.

വനം കേന്ദ്രത്തിന്‍റെയും അധികാര പരിധിയില്‍ ആയതിനാല്‍ നിയമ നടപടികള്‍ക്ക് ബി.ജെ.പി കേന്ദ്ര സര്‍ക്കാരിനോട് ആവശ്യപ്പെട്ടിട്ടുണ്ട്. കേരളത്തെ ഞെട്ടിച്ച വനം കൊള്ളക്കെതിരെ സംസ്ഥാനത്തു ശക്തമായ പ്രക്ഷോഭം സംഘടിപ്പിക്കുമെന്നും അദ്ദേഹം പറഞ്ഞു.