ക്യാമ്പ് ചെയ്ത് തിരച്ചിലിന് നേതൃത്വം നല്കേണ്ട തഹസില്ദാര് അന്ന് എവിടെയായിരുന്നു..?ആര്. രാജേഷിനെ കണ്ടെത്തുന്നതിലും, നാലു ദിവസത്തിന് ശേഷം കണ്ടെത്തിയ മൃതദേഹം നാട്ടിലെത്തിക്കുന്നതിലും കുറ്റകരമായ അനാസ്ഥ..
തിരുവനന്തപുരം കല്ലിയൂര് സ്വദേശി ആര്. രാജേഷിനെ കണ്ടെത്തുന്നതിലും, നാലു ദിവസത്തിന് ശേഷം കണ്ടെത്തിയ മൃതദേഹം നാട്ടിലെത്തിക്കുന്നതിലും കാണിച്ച കുറ്റകരമായ അനാസ്ഥയില് പയ്യന്നൂര് തഹസില്ദാര്ക്കെതിരെ നടപടിക്ക് നീക്കം ശക്തമാകുന്നു. മറ്റൊരു ജീവനായി സ്വന്തം ജീവിതം തൃണവല്ഗണിച്ച രക്തസാക്ഷിയോട് റവന്യൂ, ആരോഗ്യ വകുപ്പുകളും പ്രാദേശിക ജനപ്രതിനിധികളും കാണിച്ച അനാദരവ് കേവലം നിരുത്തരവാദിത്തമല്ല, മറിച്ച് മനുഷ്യത്വത്തോടുള്ള വെല്ലുവിളിയാണ്.
ഞെട്ടിക്കുന്ന വിവരമാണ് പുറത്തുവരുന്നത്. മതിയായ ഉപകരണങ്ങളോ പരിശീലനം ലഭിച്ച സംഘങ്ങളെയോ തിരച്ചിലിനായി ഇറക്കാതിരുന്ന അധികൃതര്, ദിവസങ്ങള്ക്ക് ശേഷം ജീര്ണ്ണിച്ച അവസ്ഥയില് മൃതദേഹം കിട്ടിയപ്പോഴും അല്പം പോലും മര്യാദ കാട്ടിയില്ല. 500-ലധികം കിലോമീറ്റര് അകലെയുള്ള തിരുവനന്തപുരത്തേക്ക് ദിവസങ്ങള് പഴക്കമുള്ള മൃതദേഹം കൊണ്ടുപോകാന്
ഫ്രീസര് സംവിധാനമില്ലാത്ത സാധാരണ ആംബുലന്സാണ് ഏര്പ്പാടാക്കിയത്. ഇത്രയും വലിയ ദൂരത്തേക്ക് അഴുകിയ ഭൗതികശരീരം ഫ്രീസറില്ലാതെ അയച്ചത് റവന്യൂ, ആരോഗ്യ വകുപ്പുകളുടെ ഭാഗത്തുനിന്നുണ്ടായ അക്ഷന്തവ്യമായ അപരാധമാണ്.കണ്ണൂര് ഗവ. മെഡിക്കല് കോളേജില് പോസ്റ്റ്മോര്ട്ടം പൂര്ത്തിയാക്കിയ ശേഷം മൃതദേഹം വെറുമൊരു പ്ലാസ്റ്റിക് കവറില് പൊതിഞ്ഞാണ് ബന്ധുക്കള്ക്ക് വിട്ടുനല്കിയത്.
മെഡിക്കല് കോളേജിന് സ്വന്തമായി മൊബൈല് മോര്ച്ചറി ആംബുലന്സ് സംവിധാനമില്ലെന്ന് വ്യക്തമായിട്ടും, പുറത്തുനിന്ന് ആ സൗകര്യമുള്ള ആംബുലന്സ് വിട്ടുനല്കാന് റവന്യൂ അധികൃതര് തയ്യാറായില്ല. ദുരന്തനിവാരണ ഫണ്ടില് നിന്നും സ്വന്തം അധികാരമുപയോഗിച്ചും സ്വകാര്യ ഫ്രീസര് ആംബുലന്സ് ഏര്പ്പെടുത്താന് തഹസില്ദാര്ക്ക് പൂര്ണ്ണ സ്വാതന്ത്ര്യമുണ്ടായിരുന്നിട്ടും അത്തരം നിലപാട് നിഷേധിക്കുകയാണ് ഇയാള് ചെയ്തത്.
https://www.facebook.com/Malayalivartha
