ഗൗരിയമ്മയ്ക്കെതിരായ പരാമര്ശത്തില് താക്കീത്; ആദരവോടെ അംഗീകരിക്കുന്നുവെന്ന് ജോര്ജ്
പിസി ജോര്ജ്ജിന്റെ കടിഞ്ഞാണില്ലാത്ത നാവിന് കുടുക്കിട്ട് നിയമസഭ. കെ.ആര് ഗൗരിയമ്മയ്ക്കെതിരായ വിവാദ പരാമര്ശത്തില് പി.സി ജോര്ജിന് നിയമസഭയുടെ താക്കീത്. മുഖ്യമന്ത്രി ഉമ്മന് ചാണ്ടി വായിച്ച പ്രമേയം നിയമസഭ ശബ്ദവോട്ടൊടെ പാസാക്കി. നടപടി ആദരവോടെ അംഗീകരിക്കുന്നതായി ജോര്ജ് നിയമസഭയില് വ്യക്തമാക്കി. നിയമസഭയ്ക്ക് പുറത്തുനടന്ന ഒരു വിഷയത്തില് എത്തിക്സ് കമ്മിറ്റി തെളിവിടെുപ്പ് നടത്തി സഭാംഗത്തെ താക്കീത് ചെയ്യുന്ന അപൂര്വ്വം സംഭവം സഭയില് അരങ്ങേറി.
കെ.മുരളീധരന് അധ്യക്ഷനായ പ്രിവിലേജ് ആന്റ് എത്തിക്സ് കമ്മിറ്റി നടത്തിയ അന്വേഷണ റിപ്പോര്ട്ടിന്റെ അടിസ്ഥാനത്തിലായിരുന്നു മുഖ്യമന്ത്രി പ്രമേയം അവതരിപ്പിച്ചത്. സ്പീക്കറുടെ റൂളിംഗോടെയാണ് പ്രമേയം അവതരിപ്പിച്ചത്. ഒരു നിയമസഭാംഗം പാലിക്കേണ്ട മര്യാദ ജോര്ജ് പാലിച്ചില്ല. ഭാവിയില് ഒരംഗവും ഇത്തരം പരാമര്ശം നടത്താന് പാടില്ലെന്ന് സ്പീക്കര് എന്.ശക്തന് റൂളിംഗ് നല്കി. 2013 മാര്ച്ച് 14ന് ജോര്ജ് ഈരാട്ടുപേട്ടയിലെ വീട്ടില് വച്ച് ചില മാധ്യമങ്ങളുമായി നടത്തിയ സ്വകാര്യ സംഭാഷണത്തില് മോശം പരാമര്ശം നടത്തിയത്.
നടപടി ആദരവോടെ അംഗീകരിക്കുന്നുവെന്നും തന്റെ പാര്ട്ടിയിലെ രണ്ടംഗങ്ങള് കൂടി ചേര്ന്നെടുത്ത നടപടിയാണെന്നും ജോര്ജ് മറുപടി നല്കി. തന്റെ വീട്ടിലെത്തിയ മാധ്യമ പ്രവര്ത്തകരുമായി നടത്തിയ സ്വകാര്യ സംഭാഷണത്തിനിടെ പറഞ്ഞുപോയ കാര്യം ചില മാധ്യമങ്ങള് ചോര്ത്തി വാര്ത്തയാക്കുകയായിരുന്നുവെന്നും ജോര്ജ് പറഞ്ഞു. ഭാവിയില് നേതാക്കള് മാധ്യമങ്ങളോട് സംസാരിക്കുമ്പോള് സൂക്ഷിക്കണമെന്നും ജോര്ജ് പറഞ്ഞു.
നിയമസഭയ്ക്ക് പുറത്തുനടന്ന ഒരു വിഷയത്തില് എത്തിക്സ് കമ്മിറ്റി തെളിവിടെുപ്പ് നടത്തി സഭാംഗത്തെ താക്കീത് ചെയ്യുന്ന അപൂര്വ്വം സംഭവത്തിനാണ് ഇന്ന് സഭ വേദിയായത്.
https://www.facebook.com/Malayalivartha
