എഡിജിപി ഋഷിരാജ് സിങ്ങും ആഭ്യന്തര മന്ത്രി രമേശ് ചെന്നിത്തലയും വീണ്ടും പൊതുവേദിയില്‍ ഒന്നിച്ചെത്തിയെങ്കിലും ഋഷിരാജ് സിംഗ് സല്യൂട്ട നല്‍കിയില്ല. ആക്കുളത്ത് ആഭ്യന്തരവകുപ്പിന്റെ പരിപാടിക്കാണ് ഇരുവരും വീണ്ടും ഒന്നിച്ചു പങ്കെടുത്തത്. മുമ്പത്തെ പരിപാടിയില്‍ ചെന്നിത്തലയ്ക്ക് സല്യൂട്ട് നല്‍കാന്‍ സിങ്കം തയ്യാറാകാത്തതിനാല്‍ എറെ വിവാദമുണ്ടായി. പക്ഷെ ഇപ്രാവശ്യവും സല്യൂട്ട് നല്‍കുകയോ അറ്റന്‍ഷനാകുകയോ ചെയ്തില്ല. പകരം കൈകൂപ്പി വണങ്ങുകയായിരുന്നു.
ഇതു കണ്ട് അടുത്തേക്കു വന്ന രമേശ് ചെന്നിത്തല ചെറുപുഞ്ചിരിയോടെ ഋഷിരാജിനു ഹസ്തദാനം നല്‍കി. തുടര്‍ന്ന് ഇരുവരും സ്‌റ്റേജിലേയ്ക്ക് കയറുകയായിരുന്നു.
തൃശൂരിലെ പാസിങ് ഔട്ട് പരേഡില്‍ മന്ത്രിയെത്തിയിട്ടും ഇരിപ്പിടത്തില്‍ നിന്ന് എഴുന്നേല്‍ക്കുക പോലും ചെയ്യാതിരുന്ന സിങ്കത്തിന്റെ നടപടി വിവാദമായിരുന്നു. ഇതിനുശേഷം ആദ്യമായാണ് ഇരുവരും ഒരു പരിപാടിയില്‍ ഒന്നിച്ചു പങ്കെടുക്കുന്നത്.
ട്രാഫിക് പൊലീസ് ആക്കുളത്ത് എംജിഎം സ്‌കൂളില്‍ സംഘടിപ്പിച്ച ബോധവല്‍ക്കരണ പരിപാടിയായിരുന്നു വേദി. ഉദ്ഘാടകനായ ആഭ്യന്തരമന്ത്രി രമേശ് ചെന്നിത്തല വേദിയിലേക്കെത്തുമ്പോള്‍ ലോക്‌നാഥ് ബഹ്‌റക്കൊപ്പം മുന്‍ സീറ്റിലിരിക്കുകയായിരുന്നു ഋഷിരാജ് സിങ്. ഇരുവരും യൂണിഫോമിലായിരുന്നില്ല. മന്ത്രി വന്നതോടെ ലോക്‌നാഥ് ബഹ്‌റക്കൊപ്പം ഋഷിരാജ് സിങും എഴുന്നേറ്റു. എന്നാല്‍ ലോക്‌നാഥ് ബഹ്‌റ അറ്റന്‍ഷനായി നിന്ന് ഉപചാരമര്‍പ്പിച്ചപ്പോള്‍ ഋഷിരാജ് സിങ് അതിന് തയ്യാറായില്ല. കൈകൂപ്പിയാണ് ഋഷിരാജ് സിങ് മന്ത്രിയെ വണങ്ങിയത്. കൈകൂപ്പിയ ഋഷിരാജ് സിങിന് ഷേക്ക് ഹാന്‍ഡ് നല്‍കിയാണ് മന്ത്രി വേദിയിലേക്കു പോയത്.
തൃശൂര്‍ പൊലീസ് അക്കാദമിയിലെ ചടങ്ങിനിടെ ചെന്നിത്തലയെ ഗൗനിക്കാതിരുന്ന സംഭവത്തില്‍ മുഖ്യമന്ത്രി ഉള്‍പ്പെടെ സിംഗിനെ തള്ളിപ്പറഞ്ഞിരുന്നു. എന്നാല്‍ ഋഷിരാജ് തന്റെ നിലപാടില്‍ ഉറച്ചു നിന്നു. വിഐപികള്‍ വരുമ്പോള്‍ എഴുന്നേറ്റ് നില്‍ക്കണമെന്ന് പ്രോട്ടോക്കോളില്‍ പറയുന്നില്ലെന്നായിരുന്നു ഋഷിരാജ് സിങ് പറഞ്ഞത്.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha