പിണറായി വിജയന്‍ സര്‍ക്കാരിന്റെ തുടര്‍ ഭരണത്തിന്റെ പ്രധാന കാരണം സൗജന്യ കിറ്റാണ്. കോവിഡ് സമയത്ത് ജനങ്ങള്‍ക്ക് നല്‍കിയ കിറ്റും ക്ഷേമ പെന്‍ഷനും ജനം മറന്നില്ല. വലിയ ആരോപണങ്ങള്‍ പ്രതിപക്ഷം കൊണ്ടു വന്നപ്പോഴും രക്ഷിച്ചത് ഈ കിറ്റായിരുന്നു.

അതേ മാതൃകയില്‍ ജനങ്ങളെ കൈയ്യിലെടുക്കാനിരിക്കുകയാണ് മോദി സര്‍ക്കാരും. എങ്ങനെ പ്രശസ്തി ഉണ്ടാക്കണമെന്ന് മോദിയെ ആരും പറഞ്ഞ് പഠിപ്പിക്കേണ്ട. വാക്‌സിന്‍ സര്‍ട്ടിഫിക്കറ്റിലൂടെ സകല സഖാക്കളുടെ കയ്യില്‍ പോലും മോദിയുടെ ചിത്രം വന്നു. അതുപോലെ മറ്റൊരു പ്രചരണം ആരംഭിക്കുകയാണ്.

സൗജന്യ അരി വിതരണത്തില്‍ കേന്ദ്രത്തിന്റെ പങ്ക് പ്രചാരണത്തിലൂടെ ജനങ്ങളെ ബോദ്ധ്യപ്പെടുത്തി രാഷ്ട്രീയ നേട്ടം സ്വന്തമാക്കാന്‍ കേന്ദ്ര സര്‍ക്കാരും. സൗജന്യ ഭക്ഷ്യക്കിറ്റ് വിതരണത്തിലൂടെ സംസ്ഥാന സര്‍ക്കാര്‍ തുടര്‍ച്ചയായി ഗോളടിക്കുമ്പോഴാണ് കേന്ദ്ര സര്‍ക്കാര്‍ ഒരുപടി കൂടി കടന്ന് പോസ്റ്റര്‍ പ്രചാരണത്തിനിറങ്ങുന്ന്. സംസ്ഥാന പൊതുവിതരണ വകുപ്പിന്റെ മേല്‍നോട്ടത്തില്‍ തന്നെയാണ് കേന്ദ്രം പ്രചാരണ പരിപാടികള്‍ നടത്തുക.

പ്രധാനമന്ത്രി ഗരീബ് കല്യാണ്‍ അന്നയോജന (പി.എം.ജി.കെ.എ.വൈ) പദ്ധതിപ്രകാരം നല്‍കുന്ന ഭക്ഷ്യധാന്യങ്ങളുടെ വിവരങ്ങള്‍ ഉള്‍ക്കൊള്ളുന്ന പോസ്റ്റര്‍ എല്ലാറേഷന്‍ കടകളിലും പതിക്കണമെന്ന നിര്‍ദ്ദേശം നല്‍കാന്‍ കഴിഞ്ഞ മൂന്നിന് കേന്ദ്ര സര്‍ക്കാര്‍ തീരുമാനിച്ചിരുന്നു. അതിന്റെ അടിസ്ഥാനത്തിലാണ് എല്ലാ റേഷന്‍ കടകളിലും ഉടന്‍ പോസ്റ്റര്‍ പതിക്കണമെന്ന് സിവില്‍ സപ്ലൈസ് ഡയറക്ടര്‍ കഴിഞ്ഞ ദിവസം ഉത്തരവിറക്കിയത്. ഇവ റേഷന്‍കടകളില്‍ പതിച്ചിട്ടുണ്ടോയെന്ന് ജില്ലാ സപ്ലൈ ഓഫീസര്‍മാരും റേഷന്‍ ഇന്‍സ്‌പെക്ടര്‍മാരും ഉറപ്പാക്കണം.

പി.എം.ജി.കെ.എ.വൈ പദ്ധതി പ്രകാരം കഴിഞ്ഞ മൂന്ന് ഘട്ടങ്ങളിലായി 6.48 ലക്ഷം ടണ്‍ അരിയും 0.79 ലക്ഷം ടണ്‍ ഗോതമ്പുമാണ് സൗജന്യ നിരക്കില്‍ സംസ്ഥാനത്തെ മുന്‍ഗണനാ വിഭാഗത്തിന് കേന്ദ്രം അനുവദിച്ചത്.സൗജന്യ റേഷന്‍ വിതരണം രണ്ടു സര്‍ക്കാരുകളും രാഷ്ട്രീയ ആയുധമാക്കാനാണ് ശ്രമിക്കുന്നത്.

ഇതോടെ ബി.ജെ.പിയുടെ പരാതിക്ക് പരിഹാരമാകുകയാണ്. കേന്ദ്രം നല്‍കുന്ന ഭക്ഷ്യധാന്യത്തിന് പ്രചാരണം നല്‍കുന്നില്ലെന്ന പരാതി കേരളത്തിലെ ബി.ജെ.പി നേതൃത്വത്തിനുണ്ടായിരുന്നു. പോസ്റ്റര്‍ പതിക്കണമെന്ന നിര്‍ദ്ദേശത്തോടൊപ്പം ഫുഡ് കോര്‍പ്പറേഷന്‍ ഒഫ് ഇന്ത്യ (കേരളം) ജനറല്‍ മാനേജരോട് പദ്ധതിയുടെ പ്രചാരണം സംസ്ഥാനത്ത് ശക്തമാക്കാനും കേന്ദ്രം നിര്‍ദ്ദേശിച്ചിട്ടുണ്ട്.

ബി.ജെ.പി ഭരിക്കുന്ന ഇടങ്ങളില്‍ മോദിയുടെയും അതത് സംസ്ഥാനത്തെ മുഖ്യമന്ത്രിയുടെയും ചിത്രങ്ങള്‍ക്കാണ് ഇടം. എന്നാല്‍, കേരളത്തില്‍ മോദിയുടെ ചിത്രവും പദ്ധതിയിലൂടെ ലഭിക്കുന്ന ഭക്ഷ്യധാന്യങ്ങളുടെ വിവരങ്ങളും മാത്രമാണുണ്ടാവുക.

കിറ്റിന് കേന്ദ്രത്തിന്റെ സാമ്പത്തിക സഹായമില്ലെന്നും നാളിതുവരെ 4648.29 കോടിയാണ് കിറ്റിന് മാത്രം മുഖ്യമന്ത്രിയുടെ ദുരിതാശ്വാസനിധിയില്‍നിന്ന് ചെലവാക്കിയതെന്നും ബി.ജെ.പിയുടെ അവകാശവാദത്തിന് മറുപടിയായി ഭക്ഷ്യമന്ത്രി ജി.ആര്‍. അനില്‍ നിയമസഭയില്‍ വ്യക്തമാക്കിയിരുന്നു.

ഗ്ലോസി ആര്‍ട്ട് പേപ്പറില്‍ തയ്യാറാക്കേണ്ട പോസ്റ്ററിന്റ മാതൃക കേന്ദ്ര ഭക്ഷ്യമന്ത്രാലയം സംസ്ഥാന ഭക്ഷ്യ സെക്രട്ടറിക്ക് ഇമെയിലില്‍ കൈമാറിയിട്ടുണ്ട്. റേഷന്‍ കടകള്‍ക്ക് പുറമെ ഗോഡൗണുകളിലും പൊതുജനശ്രദ്ധ പതിയുന്ന സ്ഥലങ്ങളിലും പോസ്റ്റര്‍ പതിക്കണം. പോസ്റ്ററില്‍ മാറ്റം വരുത്തുകയോ കൂട്ടിച്ചേര്‍ക്കലുകളോ പാടില്ലെന്ന നിര്‍ദ്ദേശമുണ്ട്.

എന്തായാലും കേന്ദ്രത്തിന്റെ കൂര്‍മ്മ ബുദ്ധിയോടെ എല്ലാ റേഷന്‍ കടകളിലും ഇനി മോദി ചിരിക്കുന്നതാണ്. റേഷന്‍ വാങ്ങാന്‍ ക്യൂ നില്‍ക്കുന്നവര്‍ അത് കാണുകയും വായിക്കുകയും ചെയ്യും.