തെരഞ്ഞെടുപ്പിന് തൊട്ട് മുമ്പ് മുതിര്‍ന്ന നേതാവും മുന്‍മന്ത്രിയുമായ ജി സുധാകരന്‍ പത്രക്കാരെ ആക്രോശിക്കാന്‍ വേണ്ടി നിരവധി തവണയാണ് ആലപ്പുഴയില്‍ വാര്‍ത്താ സമ്മേളനം വിളിച്ചത്. അന്നൊക്കെ പറഞ്ഞത് പത്രക്കാര്‍ തന്നെ കുഴപ്പക്കാരനാണെന്ന് ചിത്രീകരിക്കാന്‍ വേണ്ടി ശ്രമിക്കുന്നെന്നാണ്. പാര്‍ട്ടിക്ക് തന്നെ പൂര്‍ണ വിശ്വാസമുണ്ടെന്നും വെറുതേ കുഴപ്പങ്ങള്‍ ഉണ്ടാക്കാന്‍ ശ്രമിക്കരുതെന്നാണ് പറഞ്ഞത്. എന്നാല്‍ പത്രക്കാര്‍ പറഞ്ഞത് വെറുതേയല്ലെന്ന് സിപിഎമ്മും അടിവരയിടുകയാണ്.

അമ്പലപ്പുഴ മണ്ഡലത്തില്‍ ജയിച്ചെങ്കിലും ജി. സുധാകരന്‍ ഉള്‍പ്പെടെ തിരഞ്ഞെടുപ്പ് പ്രവര്‍ത്തനത്തില്‍ അലംഭാവം കാട്ടിയെന്ന ജില്ലാ കമ്മിറ്റിയുടെ വിമര്‍ശനം പരിശോധിക്കാന്‍ രണ്ടംഗ കമ്മിഷനെ സി.പി.എം സംസ്ഥാന കമ്മിറ്റി യോഗം നിയോഗിച്ചു. കേന്ദ്രകമ്മിറ്റി അംഗം എളമരം കരീമും സംസ്ഥാന സെക്രട്ടേറിയറ്റംഗം കെ.ജെ. തോമസുമാണ് അംഗങ്ങള്‍. സംസ്ഥാനകമ്മിറ്റി അംഗമാണ് സുധാകരന്‍.

അല്പം കൂടി ജാഗ്രത കാട്ടിയെങ്കില്‍ ജയിക്കാമായിരുന്നെന്ന് വിലയിരുത്തിയ കുണ്ടറ, കരുനാഗപ്പള്ളി, തൃപ്പൂണിത്തുറ, പാലാ, കല്പറ്റ മണ്ഡലങ്ങളിലെ പ്രവര്‍ത്തനവീഴ്ചകള്‍ ജില്ലാതലത്തില്‍ പരിശോധിക്കും. ഘടകകക്ഷികള്‍ ആക്ഷേപമുയര്‍ത്തിയ പെരുമ്പാവൂര്‍, പിറവം മണ്ഡലങ്ങളിലും പരിശോധനയുണ്ടാകും. അരുവിക്കര മണ്ഡലത്തില്‍ ജില്ലാ സെക്രട്ടേറിയറ്റംഗം വി.കെ.മധുവിനെതിരെയും അന്വേഷണമുണ്ട്.

ജി. സുധാകരനെതിരെ ആലപ്പുഴ ജില്ലാ കമ്മിറ്റി യോഗത്തിലെന്നപോലെ സംസ്ഥാന കമ്മിറ്റിയോഗത്തിലും വിമര്‍ശനമുണ്ടായി. ജില്ലാ കമ്മിറ്റി യോഗത്തില്‍ നിന്ന് വിട്ടുനിന്ന സുധാകരന്‍ വെള്ളിയാഴ്ചയും ഇന്നലെയും ചേര്‍ന്ന സംസ്ഥാന കമ്മിറ്റി യോഗത്തിലും പങ്കെടുത്തില്ല.

ജി. സുധാകരനെതിരെ സംസ്ഥാന കമ്മിറ്റിയില്‍ സജി ചെറിയാന്‍, സി.ബി. ചന്ദ്രബാബു തുടങ്ങിയവര്‍ വിമര്‍ശനമുയര്‍ത്തി. സിറ്റിംഗ് എം.എല്‍.എയായിരുന്ന ജി. സുധാകരന്റെ ഓഫീസിന്റെ അറിവോടെയാണ് താന്‍ എസ്.ഡി.പി.ഐക്കാരനാണെന്ന് ആരോപിക്കുന്ന പോസ്റ്ററുകള്‍ അമ്പലപ്പുഴയില്‍ പ്രത്യക്ഷപ്പെട്ടതെന്ന് അവിടെ ജയിച്ച എച്ച്. സലാം, ആലപ്പുഴ ജില്ലാകമ്മിറ്റി യോഗത്തില്‍ തുറന്നടിച്ചിരുന്നു.

പോസ്റ്റര്‍ പ്രചാരണമുണ്ടായപ്പോള്‍ ആലപ്പുഴയില്‍ തോമസ് ഐസക് തള്ളിപ്പറഞ്ഞതു പോലെ സുധാകരന്‍ ചെയ്തില്ലെന്നും എ. വിജയരാഘവന്റെ സാന്നിദ്ധ്യത്തില്‍ ചേര്‍ന്ന ജില്ലാ കമ്മിറ്റി യോഗം വിമര്‍ശിച്ചിരുന്നു. വിഷയം ഗൗരവമായി പരിശോധിക്കുമെന്ന് വിജയരാഘവന്‍ അന്ന് അറിയിച്ചതാണ്.

സംസ്ഥാന കമ്മിറ്റിയില്‍ വിജയരാഘവന്‍ അവതരിപ്പിച്ച അവലോകന റിപ്പോര്‍ട്ടിലും അമ്പലപ്പുഴയിലെ വീഴ്ച ചൂണ്ടിക്കാട്ടി. റിപ്പോര്‍ട്ടിന്റെ ചര്‍ച്ചയ്ക്ക് ഇന്നലെ വിജയരാഘവന്റെ മറുപടിയിലാണ് രണ്ടംഗ കമ്മിഷനെ നിയോഗിച്ചത്.

ഭരണത്തുടര്‍ച്ച വീണ്ടുമുണ്ടാകാനുള്ള പ്രവര്‍ത്തനം പാര്‍ട്ടിയിലും ഭരണത്തിലും ഇപ്പോഴേ ഉണ്ടാകണമെന്ന് സംസ്ഥാന കമ്മിറ്റി യോഗം നിര്‍ദ്ദേശിച്ചു. ഇതിനുള്ള കര്‍മ്മപരിപാടികള്‍ പിന്നീട് നിശ്ചയിക്കും. ഭരണം സംഘര്‍ഷങ്ങളില്ലാതെ, സമാധാനപൂര്‍ണമായി കൊണ്ടുപോകാന്‍ ജാഗ്രത കാട്ടണം. ഒന്നാം പിണറായി സര്‍ക്കാരിന്റെ വികസനപ്രവര്‍ത്തനങ്ങള്‍ ശക്തമായി തുടരണം.

അമ്പലപ്പുഴയിലെ പ്രചാരണത്തിന് ജി സുധാകരനില്‍ നിന്നും വേണ്ടത്ര പിന്തുണ കിട്ടിയില്ലെന്ന് സ്ഥാനാര്‍ത്ഥിയായിരുന്ന എച്ച് സലാം ആണ് പരാതി ഉന്നയിച്ചത്.

ചില കേന്ദ്രങ്ങളില്‍ നിന്ന് താന്‍ എസ്ഡിപിഐ ആണെന്ന പ്രചാരണവും ഉണ്ടായെന്നും സലാം പരാതിപ്പെട്ടു. ഇത്തരത്തില്‍ പോസ്റ്ററുകളും പ്രത്യക്ഷപ്പെട്ടിരുന്നു. തിരഞ്ഞെടുപ്പ് അവലോകനത്തിനായി ചേര്‍ന്ന ജില്ലാ കമ്മിറ്റി യോഗത്തിലും, സംസ്ഥാന കമ്മിറ്റി യോഗത്തിലും ജി സുധാകരന്‍ പങ്കെടുത്തിരുന്നില്ല.