സംസ്ഥാനത്ത് കനത്ത മഴ തുടരുമെന്ന് കേന്ദ്ര കാലാവസ്ഥ വകുപ്പിന്റെ മുന്നറിയിപ്പ്.... മലയോരമേഖലകളില്‍ രാത്രിയാത്ര നിരോധിച്ചു, കേരള തീരത്ത് ഉയര്‍ന്ന തിരമാലകള്‍ക്കും മണിക്കൂറില്‍ പരമാവധി 60 കിമി വരെ വേഗതയില്‍ ശക്തമായ കാറ്റിനും സാധ്യത.

തിരുവനന്തപുരം, കൊല്ലം ഒഴികെയുള്ള 12 ജില്ലകളില്‍ മഴമുന്നറിയിപ്പ് നല്‍കി. മലപ്പുറം, കോഴിക്കോട്, വയനാട്, കണ്ണൂര്‍, കാസര്‍ഗോഡ് ജില്ലകളില്‍ ഓറഞ്ച് അലര്‍ട്ട് പ്രഖ്യാപിച്ചു. മലയോരമേഖലകളില്‍ രാത്രിയാത്ര നിരോധിച്ചു.

നദീതീരങ്ങള്‍, താഴ്ന്ന പ്രദേശങ്ങള്‍, മണ്ണിടിച്ചില്‍ ഉരുള്‍പൊട്ടല്‍ ഭീഷണിയുള്ള മേഖലകളില്‍ താമസിക്കുന്നവര്‍ അറിയിപ്പ് കിട്ടുന്ന മുറയ്ക്ക് മാറി താമസിക്കാന്‍ തയ്യാറാകണമെന്നും മുന്നറിയിപ്പ് സന്ദേശത്തില്‍ പറയുന്നു.കേരള തീരത്ത് ഉയര്‍ന്ന തിരമാലകള്‍ക്കും മണിക്കൂറില്‍ പരമാവധി 60 കിമി വരെ വേഗതയില്‍ ശക്തമായ കാറ്റിനും സാധ്യതയുണ്ട്.

രണ്ടാഴ്ചയിലേറെ നീണ്ട മണ്‍സൂണ്‍ ഇടവേളയ്ക്കു ശേഷം കാലവര്‍ഷക്കാറ്റ് കേരളത്തില്‍ അനുകൂലമാണ്. അഞ്ചര കി.മി ഉയരത്തില്‍ വരെ വീശുന്ന കാറ്റിന് ഇന്ന് നല്ല വേഗതയുണ്ട്. പടിഞ്ഞാറന്‍ കാറ്റാണ് ഈ ഉയരത്തില്‍ വീശുന്നത്. 7.3 കി.മി വരെ കാറ്റ് തെക്കുപടിഞ്ഞാറന്‍ ദിശയിലാണ്.



കേരളത്തിനൊപ്പം ലക്ഷദ്വീപ്, മാലദ്വീപ്, ശ്രീലങ്ക എന്നിവിടങ്ങളിലും മഴ തകര്‍ത്തു പെയ്യാന്‍ ഇതു കാരണമാകും. തിങ്കളാഴ്ച വരെ ശക്തമായ മഴ കേരളത്തില്‍ എല്ലായിടത്തും പ്രതീക്ഷിക്കാമെന്നും തുടര്‍ന്ന് കാലവര്‍ഷക്കാറ്റ് വടക്കോട്ട് നീങ്ങുന്നതിനാല്‍ തെക്കന്‍ ജില്ലകളില്‍ മഴ കുറയാമെന്നുമാണ് നിരീക്ഷകര്‍ പറയുന്നത്. വടക്കന്‍ ജില്ലകളില്‍ തുടര്‍ന്നുള്ള ദിവസങ്ങളിലും മഴ തുടരാന്‍ ഇത് സഹായകമാകും. ബുധനാഴ്ചയോടെ മഴയുടെ ശക്തിയും തോതും നന്നേ കുറയും.

ഇന്നു രാത്രി മുതല്‍ ചൊവ്വാഴ്ച വരെ കിഴക്കന്‍ മലയോരത്തുള്ളവരും താഴ്ന്ന പ്രദേശങ്ങളിലുള്ളവരും ജാഗ്രത പുലര്‍ത്തണം.