അര്‍ജന്‍റീനയുടെ കടുത്ത ആരാധകനാനണ് മുന്‍മന്ത്രിയും സിപിഎം നേതാവുമായ എം എം മണി. അര്‍ജന്‍റീന കളത്തിൽ ഇറങ്ങുമ്പോഴൊക്കെ ആവേശത്തോടെയാണ് മണിയാശാന്‍ ഫേസ്ബുക്കില്‍ കുറിപ്പുകളുമായി എത്തുന്നത്.ഇതോടൊപ്പം തന്നെ ഇത്തവണ അര്‍ജന്‍റീന കപ്പടിക്കുമെന്ന ഉറച്ച ആത്മവിശ്വാസവും അദ്ദേഹത്തിന് ഉണ്ടായിരുന്നു. ഏതായാലും ആരാധകര്‍ കാത്തിരുന്ന കോപ്പ അമേരിക്ക ചാംപ്യന്‍ഷിപ്പില്‍ ചിരവൈരികളായ ബ്രസീലിനെ തറപറ്റിച്ചതിന് പിന്നാലെ മണിയാശാന്‍റെ പ്രതികരണം ഫേസ്ബുക്കില്‍ എത്തിയിരിക്കുകയാണ്. 'നമ്മളെ അനാവശ്യമായി ചൊറിയാന്‍ വന്നാ നമ്മളങ്ങ് കേറി മാന്തും, അല്ല പിന്നെ'- എന്നാണ് ഫേസ്ബുക്കില്‍ മണിയാശാന്‍ എഴുതിയത്.

അതേസമയം അര്‍ജന്‍റീന ജയിച്ചതില്‍ സന്തോഷമുണ്ടെന്ന് എം എം മണി മത്സരശേഷം ഒരു പ്രമുഖ മാധ്യമത്തോട് പ്രതികരിച്ചു. സാഹചര്യമെല്ലാം ഒത്തു. ഒരു ഗോള്‍ അര്‍ജന്‍റീന അടിച്ചു. ബ്രസീലിന് തിരിച്ചടിക്കാനും സാധിച്ചില്ല. ഇരു ടീമുകളും നന്നായി കളിച്ചതായും എം എം മണി പറഞ്ഞു. തിരിച്ചടിക്കാന്‍ ബ്രസീല്‍ നല്ല ശ്രമം നടത്തിയെങ്കിലും അതെല്ലാം തടയാന്‍ അര്‍ജന്‍റീനയ്ക്ക് കഴിഞ്ഞുവെന്ന് അദ്ദേഹം പറയുകയുണ്ടായി. ഈ ജയത്തില്‍ അര്‍ജന്‍റീനയുടെ ഗോള്‍കീപ്പര്‍ നല്ല പങ്കു വഹിച്ചു എന്നുമാ അദ്ദേഹം കൂട്ടിച്ചേർത്തു.

ആവേശം നുരഞ്ഞുപൊന്തിയ കലാശപ്പോരാട്ടത്തിൽ ബ്രസീലിനെ വീഴ്ത്തി അർജന്റീനയ്ക്ക് കോപ്പ അമേരിക്ക കിരീടം നേടിയിരിക്കുകയാണ്. മൂന്നു പതിറ്റാണ്ടോളമെത്തുന്ന കാത്തിരിപ്പിന് വിരാമമിട്ടാണ് അർജന്റീനയുടെ ഈ കിരീടധാരണം. അതും ബദ്ധവൈരികളായ ബ്രസീലിന്റെ മണ്ണിൽ അവരെത്തന്നെ തോൽപ്പിച്ചാകുമ്പോൾ ഈ കിരീടനേട്ടത്തിന് ഇരട്ടിമധുരം കൂടിയാകുകയാണ്. ആദ്യ പകുതിയിൽ തന്നെ ബ്രസീൽ പ്രതിരോധത്തിന്റെ പിഴവ് മുതലെടുത്ത എയ്ഞ്ചൽ ഡി മരിയ നേടിയ ഗോളാണ് അർജന്റീനയ്ക്ക് വിജയവും കിരീടവും സമ്മാനിച്ചിരിക്കുന്നത്. രണ്ടാം പകുതിയിൽ അലകടലായെത്തിയ ബ്രസീൽ ആക്രമണങ്ങളെ ഗോൾകീപ്പർ എമിലിയാനോ മാർട്ടിനസിന്റെ നേതൃത്വത്തിൽ വിജയകരമായി പ്രതിരോധിച്ചാണ് അർജന്റീന കിരീടം തൊട്ടത് തന്നെ.

അതോടൊപ്പം തന്നെ കിക്കോഫ് മുതൽ ആവേശത്തിനൊപ്പം പലപ്പോഴും പരുക്കനായും മാറിയ മത്സരത്തിലാണ് എയ്ഞ്ചൽ ഡി മരിയയുടെ തകർപ്പൻ ഗോൾ മത്സരത്തിന്റെ ഗതി നിർണയിച്ചത്. 1993നുശേഷം അർജന്റീന നേടുന്ന ആദ്യത്തെ പ്രധാന കിരീടം കൂടിയാകുകയാണ് കോപ്പ അമേരിക്ക. ലോക ഫുട്ബോളിലെ ഇതിഹാസമായി വളർന്നപ്പോഴും സൂപ്പർ താരം ലയണൽ മെസ്സിയുടെ പേരിൽ അർജന്റീന ജഴ്സിയിൽ കിരീടങ്ങളില്ലെന്ന പരിഹാസത്തിനും അറുതിയായിരിക്കുന്നു. 1916ൽ തുടക്കമായ കോപ്പ അമേരിക്ക ടൂർണമെന്റിൽ 15–ാം കിരീടവുമായി യുറഗ്വായുടെ പേരിലുള്ള റെക്കോർഡിനൊപ്പമെത്താനും അർജന്റീനയ്ക്കായി.