ട്രാന്‍സ്‌ജെന്‍ഡര്‍ ആക്ടിവിസ്റ്റ് അനന്യ കുമാരി അലക്‌സിന്റെ മരണത്തിന്റെ ഞെട്ടലിലായിരുന്നു കേരള സമൂഹം. അതിന് പിന്നാലെ കൂടെ താമസിച്ച പങ്കാളി ജിജുവും (36) ജീവനൊടുക്കിയ വാര്‍ത്തയാണ് പുറത്ത് വരുന്നത്. ഇതോടെ സമഗ്രമായ അന്വേഷണം ആവശ്യപ്പെട്ട് ട്രാന്‍സ്‌ജെന്‍ഡര്‍ സമൂഹം രംഗത്തെത്തി.

അനന്യയുടെ മരണത്തിനു പിന്നാലെ ജിജു കടുത്ത മാനസിക സമ്മര്‍ദത്തിലായിരുന്നെന്നും ഇരുവരും വിവാഹിതരാകാന്‍ തീരുമാനിച്ചിരുന്നെന്നും സുഹൃത്തുക്കള്‍ പറഞ്ഞു. തിരുവനന്തപുരം ജഗതി സ്വദേശിയായ തിരുവനന്തപുരം ജഗതി തൈക്കാട് ആറ്റുവരമ്പത്ത് ജിജുരാജ്, ഹെയര്‍ സ്‌റ്റൈലിസ്റ്റാണ്. കഴിഞ്ഞ നിയമസഭാ തെരഞ്ഞടുപ്പുകാലം മുതലാണ് അന്യനയും ജിജുവും ഒരുമിച്ച് താമസിക്കാന്‍ തുടങ്ങിയത്.

വൈറ്റില തൈക്കൂടത്ത് ജവഹര്‍ റോഡിലുള്ള വീട്ടില്‍, വെള്ളിയാഴ്ച ഉച്ചകഴിഞ്ഞ് മൂന്നോടെയാണ് ജിജുവിനെ തൂങ്ങിമരിച്ച നിലയില്‍ കണ്ടെത്തിയത്. ഭക്ഷണം വാങ്ങാന്‍ പുറത്തുപോയ സുഹൃത്തുക്കള്‍ തിരിച്ചു വന്നപ്പോഴാണ് മൃതദേഹം കണ്ടത്. വിവരമറിയിച്ചതിനെ തുടര്‍ന്ന് മരട് പോലീസും ഫൊറന്‍സിക് വിദഗ്ധരും സ്ഥലത്തെത്തി പരിശോധന നടത്തി. മൃതദേഹം എറണാകുളം ജനറല്‍ ആശുപത്രിയിലേക്ക് മാറ്റി.

ട്രാന്‍സ്‌ജെന്‍ഡര്‍ ആക്ടിവിസ്റ്റ് അനന്യകുമാരി അലക്‌സിന്റെ മരണത്തിനു പിന്നാലെയാണ് ഒപ്പം താമസിച്ച സുഹൃത്തും ജീവനൊടുക്കിയത്. ജിജുരാജിനെയാണ് ഇന്നലെ തൈക്കൂടത്ത് സുഹൃത്തിന്റെ വാടക വീട്ടില്‍ തൂങ്ങിമരിച്ച നിലയില്‍ കണ്ടെത്തിയത്. 3 ദിവസം മുന്‍പാണ് അനന്യകുമാരി ഇടപ്പള്ളിയിലെ ഫ്‌ലാറ്റില്‍ ജീവനൊടുക്കിയത്. ഇതു സംബന്ധിച്ച അന്വേഷണം പുരോഗമിക്കുന്നതിനിടെയാണു ജിജുവിന്റെ മരണം.

തിരുവനന്തപുരത്തു ബ്യൂട്ടി പാര്‍ലര്‍ നടത്തുകയായിരുന്ന ജിജുരാജ് 4 മാസം മുന്‍പാണു കൊച്ചിയിലെത്തിയത്. അനന്യ നിയമസഭ തെരഞ്ഞെടുപ്പില്‍ മത്സരിക്കുന്ന സമയത്താണ് ഇരുവരും പരിചയപ്പെടുന്നത്. പിന്നീട് കുറച്ചു കാലമായി അനന്യയ്‌ക്കൊപ്പം ഇടപ്പള്ളിയിലെ ഫ്‌ളാറ്റിലാണു താമസിച്ചിരുന്നത്. ചൊവ്വാഴ്ച രാത്രി അനന്യയെ മരിച്ച നിലയില്‍ ആദ്യം കണ്ടതു ജിജുവായിരുന്നു. അതിനു ശേഷം ജിജു മാനസികമായി തളര്‍ന്ന നിലയിലായിരുന്നുവെന്ന് സുഹൃത്തുക്കള്‍ പറയുന്നു.

കൊല്ലത്ത് അനന്യയുടെ സംസ്‌കാരച്ചടങ്ങുകള്‍ക്കു ശേഷം വ്യാഴാഴ്ച രാത്രിയാണു ജിജു തൈക്കൂടത്തെ വീട്ടിലെത്തിയത്. സുഹൃത്ത് സ്വദേശമായ തിരുവനന്തപുരത്തേക്കു പോയിരുന്നു. മറ്റു 2 പേര്‍ കൂടി വീട്ടില്‍ താമസിച്ചിരുന്നു. ഇവര്‍ പുറത്തുപോയി തിരിച്ചെത്തിയപ്പോഴാണ് ജിജുവിനെ മരിച്ച നിലയില്‍ കണ്ടെത്തിയത്. അനന്യയുടെ മരണവുമായി ബന്ധപ്പെട്ടു പൊലീസ് ജിജുവിന്റെ മൊഴിയെടുത്തിരുന്നു.

അനന്യയുടെ മരണം ആത്മഹത്യ തന്നെയെന്നു വ്യക്തമാക്കുന്നതായിരുന്നു പോസ്റ്റ്‌മോര്‍ട്ടം റിപ്പോര്‍ട്ട്. കളമശേരി മെഡിക്കല്‍ കോളജ് ആശുപത്രിയില്‍ രണ്ടു ഡോക്ടര്‍മാരുടെ പ്രത്യേക സംഘമാണു മൃതദേഹ പരിശോധന നടത്തിയത്.

അതേസമയം മരണത്തില്‍ ദുരൂഹതയുണ്ടെന്ന സുഹൃത്തുക്കളുടെ ആരോപണത്തിന്റെ പശ്ചാത്തലത്തില്‍ പൊലീസ് അസ്വാഭാവിക മരണത്തിനു കേസെടുത്തിട്ടുണ്ട്. കളമശേരി പൊലീസാണു കേസെടുത്തത്. ഇവര്‍ക്ക് ഒരു വര്‍ഷം മുന്‍പു സ്വകാര്യ ആശുപത്രിയില്‍ നടന്ന ലിംഗമാറ്റ ശസ്ത്രകിയയില്‍ പിഴവുണ്ടായോ എന്നറിയാന്‍ ചികില്‍സാരേഖകള്‍ പരിശോധിക്കുമെന്ന് പൊലീസ് അറിയിച്ചു. ആശുപത്രിയില്‍ നിന്ന് ശേഖരിച്ച ചികില്‍സാ രേഖകള്‍ പൊലീസ് പോസ്റ്റുമോര്‍ട്ടം നടത്തിയ ഡോക്ടര്‍മാര്‍ക്കു കൈമാറിയിട്ടുണ്ട്.