ബി ജെ പിയുടെ തെരഞ്ഞടുപ്പ് പ്രചരണത്തിന് 43 കോടിയുടെ ഹവാല പണം കേരളത്തിലെത്തിയ വിവരം തെരഞ്ഞടുപ്പ് കമ്മീഷനെ അറിയിക്കാന്‍ കേരള പോലീസ് തീരുമാനിച്ചതോടെ സി പി എമ്മിന്റെ അണിയറ രഹസ്യങ്ങള്‍ ഒന്നൊന്നായി പുറത്തുവന്നു തുടങ്ങി.

കേരള പോലീസിന്റെ തീരുമാനം പുറത്തുവന്നതിന് പിന്നാലെ കരുവന്നൂര്‍ ബാങ്ക് തട്ടിപ്പില്‍ ആദായനികുതി, സിബിഐ അടക്കം സമഗ്രമായ അന്വേഷണം വേണമെന്ന് ആവശ്യപ്പെട്ട് ബിജെപി സംസ്ഥാന അധ്യക്ഷന്‍ കെ സുരേന്ദ്രന്‍ രംഗത്തെത്തി.

106 സഹകരണ ബാങ്കുകളില്‍ തട്ടിപ്പ് നടന്നതായുള്ള ഞെട്ടിക്കുന്ന വിവരമാണ് സുരേന്ദ്രന്‍ പുറത്തുവിട്ടത്. എ വിജയരാഘവനും എസി മൊയ്തീനും തട്ടിപ്പില്‍ പങ്കുണ്ടെന്ന് പറയാന്‍ സുരേന്ദ്രന്‍ മറന്നില്ല.

വിജയരാഘവന്റെ ഭാര്യ പ്രൊഫസര്‍ ബിന്ദു മത്സരിച്ച മണ്ഡലത്തില്‍ തട്ടിപ്പ് പണം ഉപയോഗിച്ചെന്നും കെ സുരേന്ദ്രന്‍ ആരോപിച്ചു. െ്രെകംബ്രാഞ്ച് അന്വേഷണം സിപിഎം നേതാക്കളെ രക്ഷിക്കാന്‍ വേണ്ടിയാണ്. തെരഞ്ഞെടുപ്പ് കമ്മീഷനില്‍ ബിജെപി പരാതി നല്‍കുമെന്നും കെ സുരന്ദ്രന്‍ പറഞ്ഞു.

ശരിക്കും ഇരിക്കപ്പൊറുതിയില്ലാതായത് തെരഞ്ഞടുപ്പ് കമ്മീഷനാണ്. സി പി എമ്മും ബി ജെ പിയും മത്സരിച്ചാണ് തെരഞ്ഞടുപ്പ് കമ്മീഷന് പരാതി നല്‍കുന്നത്.

എ . വിജയരാഘവന്‍ അടക്കമുള്ള സിപിഎം നേതാക്കള്‍ക്കെതിരെ ഗുരുതര ആരോപണമാണ് ബിജെപി ഉന്നയിക്കുന്നത്. കൊടകര കുഴല്‍പ്പണക്കേസില്‍ കുടുങ്ങിയ ബിജെപി കരുവന്നൂര്‍ ബാങ്കില്‍ നിന്നും തട്ടിച്ച പണം സിപിഎം നിയമസഭാ തെരഞ്ഞെടുപ്പില്‍ ഉപയോഗിച്ചെന്ന ആക്ഷേപവും ബിജെപി ഉയര്‍ത്തുന്നുണ്ട്. 80% ല്‍ അധികം രൂപ സഹകരണ ബാങ്കിലുള്ളവര്‍ തട്ടിയെടുത്തു. സിപിഎം നേതാക്കളാണ് പണം തട്ടിയെടുത്തത്. ഉന്നത സിപിഎം നേതാക്കളാണ് ഈ തട്ടിപ്പിന് പിന്നിലെന്നും സുരേന്ദ്രന്‍ ആരോപിച്ചു. വമ്പന്‍ സ്രാവുകള്‍ ഇപ്പോഴും പുറത്താണെന്നും സുരേന്ദ്രന്‍ ആരോപിച്ചു.



യഥാര്‍ത്ഥത്തില്‍ സിപിഎമ്മിന്റെ കള്ളപ്പണമാണ് സഹകരണ ബാങ്കുകളില്‍ സൂക്ഷിക്കുന്നതെന്ന ആരോപണത്തിന് വര്‍ഷങ്ങളുടെ പഴക്കമുണ്ട്. തെരെഞ്ഞെടുപ്പില്‍ എല്ലാ പ്രധാന രാഷ്ട്രീയ പാര്‍ട്ടികളും കള്ളപ്പണം ഉപയോഗിക്കാറുണ്ട്. എന്നാല്‍ അക്കാര്യം ആരും സമ്മതിക്കാറില്ലെന്ന് മാത്രം.

ബിജെപി നേതാക്കള്‍ ഉള്‍പ്പെട്ട കൊടകര കുഴല്‍പ്പണ കവര്‍ച്ചാക്കേസില്‍ സംസ്ഥാന പൊലീസ് പ്രത്യേക റിപ്പോര്‍ട്ട് തയാറാക്കുന്നതിനിടയിലാണ് സുരേന്ദ്രന്‍ സി പി എമ്മിനെതിരെ രംഗത്തെത്തിയത്. കൊടകരയിലെ ഹവാല ഇടപാട് സംബന്ധിച്ച റിപ്പോര്‍ട്ട് സംസ്ഥാന തെരഞ്ഞെടുപ്പ് കമ്മീഷന്‍, ആദായ നികുതി വകുപ്പ്, എന്‍ഫോഴ്‌സ്‌മെന്റ് തുടങ്ങിയ വിവിധ ഏജന്‍സികള്‍ക്ക് ഉടന്‍ നല്‍കാനാണ് പോലീസിന്റെ തീരുമാനം. കളളപ്പണ ഇടപാടന്വേഷിക്കേണ്ടത് കേന്ദ്ര ഏജന്‍സിയായതിനാലാണ് സംസ്ഥാന പൊലീസ് പ്രത്യേക റിപ്പോര്‍ട്ട് തയ്യാറാക്കി നല്‍കുന്നത്. കേന്ദ്രത്തിന്റെ തലയിലിട്ട് രക്ഷപ്പെടാനാണ് സംസ്ഥാനത്തിന്റെ ശ്രമം.

നിയമസഭാ തെരഞ്ഞെടുപ്പ് പ്രചാരണത്തിനായി ബി ജെ പിക്ക് വേണ്ടി കേരളത്തിലേക്ക് 43 കോടി രൂപ ഹവാല ഇടപാടിലൂടെ വന്നെന്ന് തെരഞ്ഞെടുപ്പ് കമ്മീഷനെ അറിയിക്കാനുള്ള കത്തിന്റെ കരട് തയ്യാറായി കഴിഞ്ഞു.

എന്‍ഫോഴ്‌സ്‌മെന്റും ആദായനികുതി വകുപ്പും ഇക്കാര്യം പരിശോധിക്കണമെന്നും ആവശ്യപ്പെടും. മാര്‍ച്ച് 16 മുതല്‍ 9 തവണയായി 43 കോടിയാണ് ബിജെപിക്ക് വേണ്ടി കേരളത്തിലേക്ക് കൊണ്ടുവന്നത്. കാസര്‍കോ!ഡ്, കോഴിക്കോട്, കണ്ണൂര്‍, തിരുവനന്തപുരം, ആലപ്പുഴ, തൃശൂര്‍ ജില്ലകളിലേക്കാണ് പണമെത്തിയത്. 7 തവണ ഹവാല ഇടപാടുവഴിയാണ് കോഴിക്കോട് പണമെത്തിച്ചത്. രണ്ടുതവണ നേരിട്ടും കൊണ്ടുവന്നു.

അതേ സമയം കൊടകര കുഴല്‍പ്പണ കവര്‍ച്ചാ കേസില്‍ അന്വേഷണ സംഘം കുറ്റപത്രം സമര്‍പ്പിച്ചു. സംസ്ഥാന ബിജെപി അധ്യക്ഷന്‍ കെ. സുരേന്ദ്രനും മകനും ഉള്‍പ്പെടെ 19 ബിജെപി നേതാക്കളെ സാക്ഷികളാക്കിയാണ് കുറ്റപത്രം. 22 പേര്‍ക്ക് എതിരെയാണ് കുറ്റപത്രം. ബിജെപി സംസ്ഥാന അധ്യക്ഷന്‍ കെ സുരേന്ദ്രന്‍ ഏഴാം സാക്ഷിയാണ്.

ബിജെപി കൊണ്ടുവന്ന കള്ള പണം മുമ്പും കവര്‍ന്നതായി പൊലീസ് കണ്ടെത്തിയിട്ടുണ്ട്. സേലം കൊങ്കണാപുരത്ത് വച്ചായിരുന്നു ഈ കവര്‍ച്ച. കേരളത്തിലെ തെരഞ്ഞെടുപ്പ് ചെലവുകള്‍ക്കായി അനധികൃതമായി ബിജെപി കൊണ്ടുവന്ന പണമാണിതെന്നാണ് കുറ്റപത്രത്തിലെ പരാമര്‍ശം. മാര്‍ച്ച് ആറിനായിരുന്നു ഈ കവര്‍ച്ച. നാല് കോടി നാല്‍പ്പത് ലക്ഷം രൂപയാണ് അന്ന് കവര്‍ന്നത്. കൊടകരക്കേസിലെ സാക്ഷിയും പ്രധാനപരാതിക്കാരനുമായ ധര്‍മരാജന്റെ അടുത്ത ബന്ധുവിനായിരുന്നു പണം കൊണ്ടുവരാനുള്ള ചുമതലയെന്ന് കുറ്റപത്രത്തില്‍ പറയുന്നു.

കെ.സുരേന്ദ്രനെതിരായ ഇടതു സര്‍ക്കാരിന്റെ കളി തീക്കളിയാവാനാണ് സാധ്യത. കാരണം സി പി എമ്മിന്റെ കളികളെല്ലാം സുരേന്ദ്രനറിയാം.