ജനങ്ങളെ ഭീതിയിലാക്കി വീണ്ടും തെരുവുനായയുടെ വിളയാട്ടം. കരിങ്ങാച്ചിറ, ഹില്‍പാലസ് മ്യൂസിയം കവല ഭാഗങ്ങളില്‍ പതിമൂന്നു പേര്‍ക്കാണു നായയുടെ കടിയേറ്റത്. ഇന്നലെ രാവിലെ ആറു മുതല്‍ ഒന്‍പതര വരെയാണു ജനങ്ങളെ തെരുവുനായ് ഭീതിയിലാക്കിയത്. അപകടകാരിയായ നായയെ നാട്ടുകാര്‍ കൊന്നു.

രാവിലെ ആറുമണിയോടെ കരിങ്ങാച്ചിറ പള്ളിയിലേക്കു പോയ പുന്നയ്ക്കല്‍ ചിന്നമ്മ ഐസക്കി (73) നാണ് ആദ്യം കടിയേറ്റത്. തുടര്‍ന്നു പലര്‍ക്കും കടിയേറ്റു. പരുക്കേറ്റവര്‍ തൃപ്പൂണിത്തുറ താലൂക്ക് ആശുപത്രിയില്‍ എത്തിയപ്പോഴാണു നായയുടെ ആക്രമണം വ്യാപകമാണെന്ന വിവരം അറിയുന്നത്. എആര്‍ ക്യാംപിലെ സീനിയര്‍ സൂപ്രണ്ട് തിരുവനന്തപുരം സ്വദേശി തങ്കം ഫിലിപ്പിന്റെ കാല്‍ നായ കടിച്ചുകീറി.

വെണ്ണിക്കുളം സെന്റ് ജോര്‍ജ് എച്ച്എസ്എസ് ഏഴാം ക്ലാസ് വിദ്യാര്‍ഥി ഹില്‍പാലസ് പറയന്തര വീട്ടില്‍ ഐവിന്‍ ജോസഫ് (12), പിറവം കക്കാട് ചെറുകരയില്‍ സി.കെ. മോഹനന്‍ (52), കണ്ടനാട് തുരുത്തിപ്പിള്ളില്‍ വീട്ടില്‍ ടി.എസ്. അശ്വതി (26), കരിങ്ങാച്ചിറയില്‍ പെട്രോള്‍ പമ്പ് ജീവനക്കാരനായ തമിഴ്‌നാട് സ്വദേശി ടി.എം. വെങ്കിടേഷ് (26), കരിങ്ങാച്ചിറ കുരിശുപള്ളിയ്ക്കു സമീപം താമസിക്കുന്ന പി.ജെ. ജയിംസ് (58), തൃപ്പൂണിത്തുറ സ്വദേശി ആസിഫ് (20), കരിങ്ങാച്ചിറ സ്വദേശി വേണു (50), മുളന്തുരുത്തി സ്വദേശി അമ്മിണി (53), പളനി സ്വാമി (35), തൃപ്പൂണിത്തുറ സ്വദേശി ജോസഫ് റോയ് (56) തുടങ്ങിയവര്‍ക്കാണു നായയുടെ അക്രമണത്തില്‍ പരുക്കേറ്റത്.

ഇവരെ ആദ്യം തൃപ്പൂണിത്തുറ താലൂക്ക് ആശുപത്രിയിലും തുടര്‍ന്ന് എറണാകുളം ജനറല്‍ ആശുപത്രിയിലും പ്രവേശിപ്പിച്ചു. ജനറല്‍ ആശുപത്രിയില്‍ മരുന്നില്ലാത്തതിനെ തുടര്‍ന്നു പരുക്കേറ്റവര്‍ മണിക്കൂറോളം കാത്തിരുന്നാണു പ്രതിരോധ കുത്തിവയ്‌പ്പെടുത്തത്. എല്ലാവരെയും ഇന്നലെ വൈകിട്ടോടെ ആശുപത്രിയില്‍ നിന്നു വിട്ടയച്ചു.

കുറച്ചുനാള്‍ മുന്‍പു വയനാട്ടില്‍ നിന്നു ഹില്‍പാലസ് മ്യൂസിയം സന്ദര്‍ശനത്തിനെത്തിയ വിദ്യാര്‍ഥികളില്‍ ഒരാളെ മ്യൂസിയം വളപ്പിനുള്ളില്‍ തെരുവുനായ് ആക്രമിച്ചിരുന്നു. എന്നിട്ടും നായകളെ നിയന്ത്രിക്കാന്‍ നടപടി സ്വീകരിച്ചിരുന്നില്ല. എആര്‍ ക്യാംപ്, ഹില്‍പാലസ് പരിസരങ്ങളിലായി ഒട്ടേറെ തെരുവുനായ്ക്കളാണ് അലഞ്ഞു നടക്കുന്നത്.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha