കുഞ്ഞിമംഗലം വണ്ണാച്ചാലില്‍ പാചകവാതക സിലിണ്ടര്‍ പൊട്ടിത്തെറിച്ച് വീടുകള്‍ തകര്‍ന്നു. ആര്‍ക്കും പരിക്കില്ല. അടുത്തടുത്തുള്ള രണ്ട് വീടുകള്‍ക്ക് സാരമായ നാശനഷ്ടം സംഭവിച്ചു.

പി.വി. കമലാക്ഷിയുടെ വീട്ടിലെ നിറയെ വാതകമുള്ള സിലിണ്ടറാണ് വെള്ളിയാഴ്ച പുലര്‍ച്ച 12.45ന് പൊട്ടിത്തെറിച്ചത്. കമലാക്ഷിയുടെ വീടിനും ബന്ധു പി.വി. പവിത്രന്റെ തൊട്ടടുത്ത വീടിനുമാണ് നാശം സംഭവിച്ചത്. ഉഗ്രശബ്ദം കേട്ടാണ് വീട്ടുകാര്‍ ഉണര്‍ന്നത്. കമലാക്ഷിയുടെ വീടിനോടുചേര്‍ന്ന വര്‍ക്ക് ഏരിയയാണ് അടുക്കളയായി ഉപയോഗിക്കുന്നത്.

ഇതിനകത്ത് സ്റ്റൗ വെക്കുന്ന കോണ്‍ക്രീറ്റ് തട്ടിനുതാഴെ ഉപയോഗിക്കാന്‍ കൊണ്ടുവെച്ച പുതിയ സിലിണ്ടറാണ് പൊട്ടിത്തെറിച്ചത്. സിലിണ്ടര്‍ പൂര്‍ണമായും തകര്‍ന്നു. തൊട്ടടുത്ത് ഉപയോഗിച്ചുകൊണ്ടിരുന്ന സിലിണ്ടര്‍ വളഞ്ഞ നിലയിലാണ്. കമലാക്ഷിയുടെ വീടിന്റെ അടുക്കള ഭാഗം പൂര്‍ണമായി തകര്‍ന്നു. ഗ്രില്‍സുകളും കല്ലുകളും ഇളകി. ഇതിനു പുറമെ വീടിന്റെ നിരവധി ജനല്‍ ഗ്ലാസുകളും മുകള്‍നിലയിലെ മച്ചും തകര്‍ന്നുവീണു.

പവിത്രന്റെ വീടിന്റെ 14ഓളം ജനല്‍ ഗ്ലാസുകള്‍ തകര്‍ന്നു. വിവരമറിഞ്ഞ് പയ്യന്നൂര്‍ പൊലീസ് രാത്രിതന്നെ സ്ഥലത്തെത്തി. പകല്‍ പാചകവാതക കമ്ബനി അധികൃതരും സ്ഥലത്തെത്തി.

അത്യപൂര്‍വമായാണ് ഈ രീതിയില്‍ സിലിണ്ടറുകള്‍ പൊട്ടാറുള്ളതെന്ന് ബന്ധപ്പെട്ടവര്‍ പറഞ്ഞു. രാത്രിയായതിനാല്‍ അടുക്കളയില്‍ ആളുകളില്ലാത്തതും തീയില്ലാത്തതുമാണ് വന്‍ദുരന്തത്തിന് തടയിട്ടത്.