കുതിരാന്‍ തുരങ്കം ജനങ്ങള്‍ തുറന്നു നല്‍കുന്നത് കേന്ദ്രമന്ത്രിയുടെ ട്വീറ്റിലൂടെ അറിയേണ്ടി വന്ന സംസ്ഥാന പൊതുമരാമത്ത് മന്ത്രി പി.എ. മുഹമ്മദ് റിയാസിന്റെ പ്രതികരണം ഒരു ഭാവി മുഖ്യമന്ത്രിയുടേത് പോലെ പക്വമായതായി രാഷ്ട്രീയ നിരീക്ഷകര്‍ വിലയിരുത്തുന്നു.

കുതിരാന്‍ തുരങ്കങ്ങളില്‍ ആദ്യത്തേത് തുറക്കുന്നത് സംസ്ഥാന സര്‍ക്കാറിനെ അറിയിച്ചിരുന്നില്ല. എന്നാല്‍ റിയാസ് അതില്‍ പരിഭവിച്ചതേയില്ല.

തുരങ്കം ജനങ്ങള്‍ക്കായി തുറന്നുകൊടുക്കുന്നവെന്നതാണ് പ്രധാനം. ഇതില്‍ ക്രെഡിറ്റ് എടുക്കാന്‍ ആഗ്രഹിക്കുന്നില്ല. എല്‍ഡിഎഫ് സര്‍ക്കാരിനെ സംബന്ധിച്ച് വീണ്ടും അധികാരത്തിലെത്തിയപ്പോള്‍ തന്നെ തുരങ്കം തുറക്കുന്നതിന് വേണ്ടി നിരന്തരം പ്രവര്‍ത്തിച്ചിരുന്നുവെന്നാണ് മന്ത്രി റിയാസ് പ്രതികരിച്ചത്.

ഒരു വിവാദം പ്രതീക്ഷിച്ച് മന്ത്രിയെ കാണാനെത്തിയ ചാനല്‍ പ്രവര്‍ത്തകരെ ഞെട്ടിക്കുന്ന പ്രതികരണമാണ് മന്ത്രി നടത്തിയത്. തിരിച്ചും മറിച്ചും ചോദിച്ചെങ്കിലും മന്ത്രി തന്റെ നിലപാടില്‍ ഉറച്ചു നിന്നു. പണ്ട് കെ എം മാണിയൊക്കെ പ്രകടിപ്പിച്ചിരുന്ന അതേ പക്വത.

നാഷണല്‍ ഹൈവേയ്‌സ് അതോറിറ്റി ഓഫ് ഇന്ത്യയാണ് പദ്ധതി നടപ്പിലാക്കുന്നത്. പല കാരണങ്ങള്‍ കൊണ്ട് പദ്ധതി വൈകിയിരുന്നു. ജനങ്ങള്‍ക്ക് സഹായകമാകുന്ന കാര്യത്തില്‍ തുരങ്കം വേഗം തുറക്കാന്‍ വേണ്ട നടപടികളാണ് സര്‍ക്കാര്‍ ചെയ്തിട്ടുള്ളത്. അത് ക്രെഡിറ്റ് കിട്ടാനോ അല്ലെങ്കില്‍ ട്രോഫി നേടാനോ ആയിരുന്നില്ലെന്നും റിയാസ് പറഞ്ഞു. താന്‍ നേരിട്ട് മൂന്ന് തവണ കുതിരാനില്‍ പോയെന്നും ദിവസവും അവിടെ നിന്ന് റിപ്പോര്‍ട്ട് തേടിയെന്നും മന്ത്രി പറഞ്ഞു.

എന്‍എച്ച്എഐ പ്രവര്‍ത്തനങ്ങള്‍ വൈകുമ്പോള്‍ നോക്കി നില്‍ക്കാന്‍ സംസ്ഥാന സര്‍ക്കാരിന് കഴിയില്ല. ട്രാഫിക് പ്രശ്‌നങ്ങളും അപകടവും ഒക്കെയായി ജനങ്ങള്‍ക്ക് വലിയ ബുദ്ധിമുട്ടാണ് തുരങ്കം തുറക്കാന്‍ വൈകുന്നത് കാരണം ഉണ്ടായത്. ഇത് പരിഹരിക്കാന്‍ വേണ്ടിയുള്ള ഇടപെടലുകളാണ് സംസ്ഥാന സര്‍ക്കാര്‍ നടത്തിയിട്ടുള്ളത്. ഔദ്യോഗികമായി അറിയിപ്പ് കിട്ടിയില്ലെന്നും മന്ത്രി പറഞ്ഞു.

തുരങ്കം തുറക്കുന്നത് സംബന്ധിച്ച് സംസ്ഥാന മന്ത്രി അല്ല അഭിപ്രായം പറയേണ്ടത് എന്ന കേന്ദ്ര മന്ത്രി വി. മുരളീധരന്റെ പ്രസ്താവനയെ റിയാസ് പക്വമായി പരിഹസിച്ചു. ഒരു മന്ത്രിക്ക് വേണമെങ്കില്‍ ജനങ്ങള്‍ക്ക് ഉപകാരപ്രദമായ എന്തെങ്കിലും ചെയ്യാം, അല്ലെങ്കില്‍ വെറുതെ പ്രസ്താവനയൊക്കെ നടത്തി വിവാദമുണ്ടാക്കാം. ഇതില്‍ രണ്ടാമത് പറഞ്ഞ കാര്യത്തില്‍ തനിക്ക് താത്പര്യമില്ലെന്നും റിയാസ് പറഞ്ഞു.

സംസ്ഥാന സര്‍ക്കാരിനെ സംബന്ധിച്ച് രണ്ടാമത്തെ തുരങ്കം കൂടി തുറക്കാനുള്ള പ്രവര്‍ത്തനങ്ങള്‍ക്ക് എന്‍എച്ച്എഐയെ സഹായിക്കാന്‍ പറ്റുന്ന കാര്യങ്ങള്‍ ചെയ്യുന്നതിനാണ് മുന്‍ഗണനയെന്നും റിയാസ് പറഞ്ഞു.

മുഖ്യമന്ത്രി പിണറായി വിജയന്റെ ലക്ഷ്യത്തിലേക്ക് കുതിക്കുന്ന റിയാസിനെയാണ് കഴിഞ്ഞ കുറെ നാളുകളായി കേരളം കണ്ടു കൊണ്ടിരിക്കുന്നത്. രണ്ടാം പിണറായി മന്ത്രിസഭയിലെ ഏറ്റവും മികച്ച മന്ത്രി എന്ന ഖ്യാതി നേടിയിരിക്കുന്നത് റിയാസാണ്. ഒന്നാം പിണറായി സര്‍ക്കാരില്‍ കെ കെ ഷൈലജ അലങ്കരിച്ചിരുന്ന സ്ഥാനമാണ് ഇപ്പോള്‍ റിയാസ് കരസ്ഥമാക്കിയത്. പരിപക്വമായ തീരുമാനങ്ങളാണ് റിയാസിന്റെത്. തൊട്ടാല്‍ കൈ പൊള്ളുന്ന വകുപ്പ് കിട്ടിയിട്ടും അദ്ദേഹം വിവാദങ്ങള്‍ ഉണ്ടാക്കുന്നില്ല. പിണറായിയുടെ മരുമകനാണെന്ന് ഭാവിച്ചുകൊണ്ട് അദ്ദേഹം ആരെയും ഭരിക്കാന്‍ പോകുന്നില്ല. സ്വന്തം കാര്യം നോക്കിയാണ് അദ്ദേഹം മുന്നോട്ടുപോകുന്നത്.

മൂന്നാം ഇടതു മുന്നണി മന്ത്രിസഭയെ റിയാസ് നയിക്കുമെന്ന് കരുതുന്നവര്‍ നിരവധിയാണ്. അതിനുള്ള കരുക്കളാണ് പിണറായി നടത്തുന്നത്. മരുമകനെ രാജ്യഭാരം ഏല്‍പ്പിച്ച് അധികാരത്തില്‍ നിന്നും വിരമിക്കാനാണ് പിണറായി ആഗ്രഹിക്കുന്നത്. റിയാസിനാണെങ്കില്‍ സമുദായത്തിന്റെ പിന്തുണ കൃത്യമായി ലഭിക്കും. മറ്റ് സമുദായങ്ങളുടെ വോട്ടുകള്‍ പലവഴിക്ക് തിരിയുമ്പോള്‍ മൂന്നാമതും അധികാരത്തിലെത്താന്‍ ഇതാണ് വഴിയെന്ന് പിണറായി കരുതിയാല്‍ എങ്ങനെയാണ് അദ്ദേഹത്തെ തെറ്റ് പറയാനാവുക?