മുസ്ലിം ലീഗ് സംസ്ഥാന പ്രസിഡന്റ് പാണക്കാട് ഹൈദരലി ശിഹാബ് തങ്ങളെ ഇഡി വിളിച്ചതിന് പിന്നില്‍ കുഞ്ഞാലിക്കുട്ടിയാണെന്ന് മുന്‍ മന്ത്രി കെ.ടി. ജലീല്‍ ഇന്നലെ പത്രസമ്മേളനം നടത്തി പറഞ്ഞിരുന്നു. മാത്രമല്ല തങ്ങളെയല്ല ഇഡിയെയാണ് ചോദ്യം ചെയ്യേണ്ടതെന്നുവരെ പറഞ്ഞു. എന്നാല്‍ പറഞ്ഞ് മണിക്കൂറുകള്‍ക്കുള്ളില്‍ തന്നെ തങ്ങളുടെ കുടുംബാംഗ പ്രതികരിച്ചു.

പാണക്കാട് ഹൈദരലി ശിഹാബ് തങ്ങള്‍ക്ക് എന്‍ഫോഴ്‌സ്‌മെന്റ് ഡയറക്ടറേറ്റിന്റെ നോട്ടീസ് ലഭിച്ചതിന്റെ പേരില്‍, പാര്‍ട്ടി ദേശീയ ജനറല്‍ സെക്രട്ടറി പി.കെ കുഞ്ഞാലിക്കുട്ടിയ്‌ക്കെതിരെ കടുത്ത വിമര്‍ശനവുമായി തങ്ങളുടെ മകന്‍ മു ഈന്‍ അലി ശിഹാബ് തങ്ങള്‍ രംഗത്തെത്തി. യൂത്ത് ലീഗ് ദേശീയ വൈസ് പ്രസിഡന്റ് കൂടിയായ മു ഈന്‍ അലി പാര്‍ട്ടി മുഖപത്രവുമായി ബന്ധപ്പെട്ട വിവാദത്തില്‍ കാര്യങ്ങള്‍ തുറന്നടിക്കുകയായിരുന്നു. പാര്‍ട്ടി ഒരു വ്യക്തിയിലേക്ക് ചുരുങ്ങിയെന്നുംലീഗ് ഹൗസില്‍ ഇന്നലെ വൈകിട്ട് നടന്ന വാര്‍ത്താസമ്മേളനത്തില്‍ അദ്ദേഹം ആക്ഷേപമുയര്‍ത്തി.

പത്ത് കോടിയുടെ കള്ളപ്പണം വെളുപ്പിച്ചെന്ന കേസില്‍ എന്‍ഫോഴ്‌സ്‌മെന്റ് ഡയറക്ടറേറ്റ് നേരത്തെ ഹൈദരലി തങ്ങളില്‍ നിന്ന് മൊഴിയെടുത്തിരുന്നു. ഇപ്പോള്‍ വീണ്ടും ഇ ഡി യുടെ നോട്ടീസ് വന്ന സാഹചര്യത്തിലായിരുന്നു മുഈന്‍ അലിയുടെ വിമര്‍ശനം. ആശുപത്രിയില്‍ ചികിത്സയില്‍ കഴിയുന്ന പിതാവിന്, പാര്‍ട്ടി പത്രവുമായി ബന്ധപ്പെട്ട കേസ് മാനസിക സംഘര്‍ഷം കൂടി അടിച്ചേല്പിച്ചതായും അദ്ദേഹം പറഞ്ഞു.

ചന്ദ്രിക അഭിഭാഷകന്‍ കൂടിയായ കേരളാ ലോയേഴ്‌സ് ഫോറം പ്രസിഡന്റ് അഡ്വ. മുഹമ്മദ് ഷായാണ് വാര്‍ത്താസമ്മേളനം വിളിച്ചത്. ലീഗിന്റെ വിശദീകരണമെന്ന നിലയില്‍ ആദ്യഘട്ടത്തില്‍ അദ്ദേഹമാണ് സംസാരിച്ചത്. പിന്നീട് ചോദ്യങ്ങളുയരാന്‍ തുടങ്ങിയതോടെയാണ് തനിക്കും ചിലത് പറയാനുണ്ടെന്ന് പറഞ്ഞ്മു ഈന്‍ അലി തങ്ങള്‍ പ്രതികരിച്ചത്.

നാല് പതിറ്റാണ്ടായി ചന്ദ്രികയുടേതുള്‍പ്പെടെ ലീഗ് ഫണ്ട് കൈകാര്യം ചെയ്യുന്നത് കുഞ്ഞാലിക്കുട്ടിയായിട്ടും പത്രത്തിന്റെ പ്രതിസന്ധിയില്‍ അദ്ദേഹം ഇടപെട്ടില്ലെന്ന് മുഈന്‍ അലി പറഞ്ഞു. പത്രത്തിന്റെ ഫിനാന്‍സ് മാനേജരായി ഷമീറിനെ നിയമിച്ചത് കുഞ്ഞാലിക്കുട്ടിയാണ്. ഷമീര്‍ ചന്ദ്രികയില്‍ വരുന്നത് പോലും കണ്ടിട്ടില്ല. ഇത്തരത്തിലുള്ള കെടുകാര്യസ്ഥതയാണ് പത്രത്തെ 12 കോടിയുടെ ബാദ്ധ്യതയിലെത്തിച്ചത്. എന്നാല്‍ കുഞ്ഞാലിക്കുട്ടിയെ ഭയന്ന് ഷമീറിന്റെ നടപടിയെ ആരും ചോദ്യം ചെയ്തില്ല.

പാണക്കാട് കുടുംബത്തിന്റെ ചരിത്രത്തില്‍ , കേന്ദ്ര ഏജന്‍സിയുടെ നോട്ടീസ് നേരിടേണ്ടിവന്ന സംഭവമുണ്ടായിട്ടില്ലെന്നും മുഈന്‍ അലി പറഞ്ഞു. അതിനിടെ, റാഫി പുതിയകടവിന്റെ നേതൃത്വത്തില്‍ ഏതാനും ലീഗ്പ്രവര്‍ത്തകര്‍ മുഈന്‍ അലിയ്ക്കും മുഹമ്മദ് ഷായ്ക്കും നേരെ ആക്രോശിച്ചെത്തിയെങ്കിലും ഓഫീസിലുള്ളവര്‍ ഇടപെട്ട് പിന്തിരിപ്പിച്ചു.

വാര്‍ത്താ സമ്മേളനവും അതോടെ അവസാനിപ്പിച്ചു. ലീഗ് ഹൗസിന് മുന്നില്‍ വച്ച് മാദ്ധ്യമപ്രവര്‍ത്തകര്‍ വീണ്ടും മു ഈന്‍ അലിയെ കാണാന്‍ ശ്രമിച്ചെങ്കിലും, ഏതാനും ലീഗ് പ്രവര്‍ത്തകര്‍ തടയാനെന്നോണം എത്തിയതോടെ അദ്ദേഹം വേഗം മടങ്ങി.