സംസ്ഥാന വിജിലന്‍സ് നിഷ്‌ക്രിയമായി. ഒന്നാം പിണറായി സര്‍ക്കാരിന്റെ കാലത്ത് തന്നെ വിജിലന്‍സിനെ നിഷ്‌ക്രിയമാക്കിയെങ്കിലും വിജിലന്‍സ് ഡിജി പി സുധേഷ്  കുമാറിനെ സംസ്ഥാന പോലീസ് മേധാവി സ്ഥാനത്ത് പരിഗണിക്കാതായതോടെ വിജിലന്‍സ് വകുപ്പ് പേരിന് മാത്രമായി.

അനില്‍ കാന്ത് വിരമിക്കാന്‍ ഏതാനും മാസങ്ങള്‍ മാത്രമാണ് ബാക്കിയുള്ളത്. സര്‍ക്കാര്‍ പറയുന്നതെല്ലാം അനുസരിച്ചാല്‍ വിജിലന്‍സ് ഡയറക്ടര്‍ സ്ഥാനത്ത് നിന്നും തനിക്ക് സംസ്ഥാന പോലീസ് മേധാവിയായി സ്ഥാനക്കയറ്റം കിട്ടുമെന്ന് സുധേഷ് കുമാര്‍ പ്രതീക്ഷിക്കുന്നു. സര്‍ക്കാര്‍ പറയുന്നതെല്ലാം അനുസരിക്കാനാണ് തീരുമാനം.

പാലക്കാട് ചെക്ക്‌പോസ്റ്റുകളിലെ മോട്ടോര്‍ വാഹന വകുപ്പ് അഴിമതി വിജിലന്‍സ് കണ്ടെത്തിയിട്ടും ഉദ്യോഗസ്ഥര്‍ക്ക് സര്‍ക്കാര്‍ സംരക്ഷണം നല്‍കുന്നത് ഇതുകൊണ്ടാണ്. കഴിഞ്ഞമാസം 27 ന് വാളയാറില്‍ നിന്നും ഒന്നേമുക്കാല്‍ ലക്ഷം കോഴപ്പണം കണ്ടെത്തിയിട്ടും ഒരുദ്യോഗസ്ഥനെതിരെ പോലും നടപടിയെടുത്തില്ല. ചെക്ക് പോസ്റ്റ് വരുമാനത്തിന്റെ മൂന്നിരട്ടി കോഴപ്പണമായിരുന്നു വാളയാറില്‍ കണ്ടെത്തിയത്.

വാളയാറും വേലന്താവളവും ഉള്‍പ്പെടുന്ന പാലക്കാട്ടെ അതിര്‍ത്തി ചെക്ക് പോസ്റ്റുകളിലേക്ക് ട്രാന്‍സ്ഫര്‍ ലഭിക്കാന്‍ ഉദ്യോഗസ്ഥര്‍ മത്സരിക്കുന്നെന്നായിരുന്നു വിജിലന്‍സ് മൂന്നുമാസം മുന്‍പ് സംസ്ഥാന സര്‍ക്കാരിനെ അറിയിച്ചത്. ഇവിടെയെത്തുന്ന ഉദ്യോഗസ്ഥരുടെ ഉന്നം കോഴയാണെന്നും അഞ്ച് വര്‍ഷത്തിനിടെ നടത്തിയ 62 മിന്നല്‍ പരിശോധനകളുടെ വെളിച്ചത്തില്‍ വിജിലന്‍സ് റിപ്പോര്‍ട്ട് നല്‍കി.

കഴിഞ്ഞ മാസം 27 ന് രാത്രി നടത്തിയ പരിശോധനയില്‍ 1.71 ലക്ഷം രൂപയാണ് കോഴപ്പണമായി കണ്ടെത്തിയത്. അവിടെ ഡ്യൂട്ടിയിലുണ്ടായിരുന്ന ആറ് ഉദ്യോഗസ്ഥരുടെ ആറ് മണിക്കൂറിലെ കോഴ വരുമാനമായിരുന്നു ഇത്. സര്‍ക്കാരിലേക്ക് നികുതിയിനത്തില്‍ ലഭിച്ചതാവട്ടെ 63000 രൂപ മാത്രമായിരുന്നു.

മിന്നല്‍ പരിശോധനയ്ക്ക് പിന്നാലെ മോട്ടോര്‍വാഹന വകുപ്പ് ഉദ്യോഗസ്ഥര്‍ക്കെതിരെ നടപടി ആവശ്യപ്പെട്ട് വിജിലന്‍സ് റിപ്പോര്‍ട്ട് നല്‍കി. എന്നാല്‍ ഒരു നടപടിയുമുണ്ടായില്ല. ഈ ആറുപേരും അടുത്ത ഷിഫ്റ്റില്‍ ഡ്യൂട്ടിയില്‍ പ്രവേശിക്കുകയും ചെയ്തു. ഇതേ വിജിലന്‍സ് സംഘം രണ്ടുമാസം മുന്‍പ് നടത്തിയ മിന്നല്‍ പരിശോധനയില്‍ കൈക്കൂലി വാങ്ങിയ പൊലീസ് ഉദ്യോഗസ്ഥരെ പിടികൂടിയിരുന്നു. അവരിപ്പോഴും സസ്പന്‍ഷനിലാണ്. ദിവസവും ലക്ഷങ്ങള്‍ കോഴവാങ്ങുന്ന മോട്ടോര്‍ വാഹന വകുപ്പ് ഉദ്യോഗസ്ഥര്‍ മാത്രം സര്‍ക്കാര്‍ തണലില്‍ സുരക്ഷിതരായിരിക്കുന്നു.

മോട്ടോര്‍ വാഹന വകുപ്പിന്റെ കാര്യത്തില്‍ മാത്രമല്ല വിജിലന്‍സും സര്‍ക്കാരും ഇരട്ടത്താപ്പ് കാണിക്കുന്നത്. മിക്കവാറും എല്ലാ വകുപ്പുകളിലും ഉദ്യോഗസ്ഥരെ കൈയയച്ച് സഹായിക്കാനാണ് സര്‍ക്കാര്‍ ശ്രമിക്കുന്നത്. ഇപ്പോള്‍ നടന്നു കൊണ്ടിരിക്കുന്നത് സര്‍ക്കാര്‍ വിലാസം അഴിമതിയാണ്. സര്‍ക്കാറിന്റെ എല്ലാ വകുപ്പുകളിലും അഴിമതി നിര്‍ബാധം നടക്കുന്നു.

സാധാരണ റിപ്പോര്‍ട്ട് നല്‍കിയിട്ട് നടപടിയെടുത്തില്ലെങ്കില്‍ വിജിലന്‍സ് സര്‍ക്കാരിനെ സമീപിക്കാറുണ്ട്. എന്നാല്‍ സുധേഷ് കുമാര്‍ ചുമതലയേറ്റതോടെ അതും നിന്നു. താന്‍ എന്തിന് പുലിവാല്‍ പിടിക്കുന്നു എന്നാണ് സുധേഷ് കുമാറിന്റെ ചിന്ത.ഡി ജി പിയുടെ ഒന്നാം ഊഴം പോയെങ്കിലും രണ്ടാം ഊഴത്തില്‍ താന്‍ പരിഗണിക്കപ്പെടുമെന്ന് തന്നെ അദ്ദേഹം വിശ്വസിക്കുന്നു. അതിനുള്ള കരുക്കള്‍ ഡല്‍ഹി കേന്ദ്രീകരിച്ച് അദ്ദേഹം നടത്തുന്നുണ്ട്. കേന്ദ്ര സര്‍ക്കാറിന്റ പിന്തുണ സുധേഷിനാണ്.



മറ്റൊരു ജേക്കബ് തോമസാകാന്‍ സുധേഷ് കുമാര്‍ തയ്യാറല്ല. പിണറായി ഇരിക്കാന്‍ പറഞ്ഞാല്‍ കിടക്കുന്നതാണ് അദ്ദേഹത്തിന്റെ ശീലം.